Izikiɛ 13 - Yálá laawoo hɛɓɛ (dc)Nuąi da mɛ̨nį ɓo a Yálá laa a lɛɛ 1 Yai-Laa ə hvaa bɔ́, yɛ mą́ą́: 2 «Hulɔnu lon! Mɛ̨nįi ŋɛ̨i ɓo Yálá kwəi mɛ̨nį hukulɔ nuąi Israe lɔi hu diɛ, diɛi tii da kɛ di kaa mɛ̨nį ɓoi a Yai-Laa laa, A nuąi da mɛ̨nį kulɔ di kwəi diɛ mo. 'Kɛ diɛ; 'ka ka wəli tɔɔ Yai-Laa woo ɓa. 3 Mɛ̨nį kəlee ŋą Hééɓomun Yálá woo ka, yɛ: Kpalo ɓɛlaai diɛ, diɛi a gili kpɛɛ ɲəi nuąi tii da hvilɛn di kwəi kiliɠaa pului; ɛlɛɛ yaan, di hvo mɛ̨nį ta kaa li. 4 Israɛlə nwɔ Yálá kwəi mɛ̨nį hukulɔ nuą, di kaa yɛ goɓəɠaa da kɛ ta kpoloon ɉu. 5 Ká hvo pɛli li ɉį́i wolo ɓa kpɛli ɔi, ká hvo hįį tɔɔ li Israɛlə nwɔ pɛlɛ́i ɓa, yɛ pɛli tɔɔi la gɔ́ tɔwɔ a Yai-Laa nwɔ hvólói? 6 Gɛɛi da gaa, gaa a lɛɛ, diɛ hvaa a nuą ɓowo pələ, a diɛi tii da kɛ diɛ: ‹Yai-Laa woo ka!› Ɛlɛɛ yaan, Yai-Laa hvo di tí li. Ɛlɛɛ da hee diɛ kɛ Yálá ə di woo pɔ mɛ̨nį kɛ. 7 Kɛlɛi lɛɛ kɛɛ ɓə tii ka gaai, kɛlɛi nuą ɓowo woo ɓə tii ka moi; kaai tii ka kɛ kɛi diɛ, ‹Yai-Laa woo ka› yá pa, ɲą́ą́n və́ mɛ̨nį ta ɓo li. 8 Yili ɓə gɛi Mɛ̨nį kəlee ŋą Hééɓomun Yálá yɛ diɛ: Yii kaa nuą ɓowo mɛ̨nį ɓo, ɛlɛɛ kaa mɛ̨nįɠaa ɓo a nuą nwun ɉu lan mɛ̨nį, gáá heei ka hu; Mɛ̨nį kəlee ŋą Hééɓomun Yálá woo li. 9 Ɲéé kaa pai həlii nɛɛ kɛɛ kaa nuąi tii diɛ, a diɛi tii da nuą ɓowo wo ɓoi; di hvo pai kɛi nwɔ́ lɔi nwɔ nwun dɔɔ hu, di laa hvo pai pɛ̨ɛ̨i Israɛlə pɛlɛ́ nwɔ hɛɓɛ́i hu. Di hvo pai lɔi Israɛlə lɔi hu, bələ ɓə ka gili kɔ́lɔn na káá kɛ, ɲą́ą́ ɓə gáá a Mɛ̨nį kəlee ŋą Hééɓomun Yálá. 10 «Mąąhɔlɔɓo, di kɛi nwɔ́ nuąi ɓowo, diɛ kɛ diɛ liilaa yɛnɛ̨ɛ̨ ka; ya pa, liilaa hvo kɛ laa. Ɛlɛɛ bɛlɛ́ nwąnąi nwɔ́ nuąi di kɛi dɔɔ, di kɛi gɛ a mɛlaiɠaa loo pələ lɔ. 11 Yili mąą mɛ̨nį ɓa, 'mo bɛlɛ́ tɛ-nuąi ti diɛ; yɛ́ diɛ: Tulɔ kɛnɛ̨ kaa pai, hanwon ɲɛ pu, ɛlɛɛ kaai ɲɛ̨́i a ɉanwon gbuɠuluɠaa ka káá pai pui, ɛlɛɛ tulɔ hvaŋą kaa pai mu həɠəi. 12 Bɛlɛ́ nwąną a pa tooi, di kaa pai kɛi kaa: ɉɛn ka kɛi dɛ la ə wɔɔ? 13 Yili mąą mɛ̨nį ɓa, Mɛ̨nį kəlee ŋą Hééɓomun Yálá yɛ: gáá pai tulɔ hvąŋą muhəɠəi a nííholi pələ kɛnɛ̨, ŋą́ líiholi kaa pai tulɔ ɉogbo ɉogbo pui, ŋą́ lii ɲą nwąną yɛ kɛɛ kala hanwon bu. 14 Bɛlɛ́ nwąnąi ti ka dɔɔ, gáá pai bui; gwɛniɠaai ka bu mu, ŋį́ gəlee kulɔ. Gaa pai tooi, ɛlɛɛ ka káá pai haai mu. Ka gili kɔ́lɔn nąą lɔwai kaa kɛ Yai-Laa ɓaa a ɲą́ą́. 15 Gáá pai nwą́ną́ kəlee kulɔi bɛlɛ́ nwąną ɓa, da nuąi ti dɔɔ a ɲɔ̨ŋɔ̨i; gɛ́ kɛ kaa: pɛlɛ nwąną mɛ̨nį hvo kɛa ɉu, dɔɔ-nuą mɛ̨nį hvo ɉu. 16 Israɛlə nwɔ Yálá kwəi mɛ̨nį hukulɔ nuąi kɛi mɛ̨nį ɓo, yɛ hvilɛn na Ɉerusalɛmə ɓa, di hva kɛa da ɓo. Diɛi kɛi liilaa kɛɛ kaa, ya pa liilaa hvo kɛ laa. Mɛ̨nį kəlee ŋą Hééɓomun Yálá wóó li. Nɛ̨ąąi kɛi pələ ɓo a lɛɛ a Yálá laa, da dɔlu kpɛ-nɛ̨ąą 17 «Ə́ wəli tɔɔ, hulɔnu lon: 'ə́ ɲɛ̨́i tinɛ̨n ə́ wɔ lɔi hu nɛ̨ɛ̨lɛa pɔ pələ; diɛi mɛ̨nįɠaa kulɔi di nwun ɉu, diɛ mo a náá, 'gwə́i mɛ̨nį hu kulɔ diɛ. 18 Yá kɛ diɛ: Mɛ̨nį kəlee ŋą Hééɓomun Yálá woo ka: Kpalo ɓɛlaai nɛ̨ąąi ti diɛ; diɛi da həɠə-ɓɛlaɠaa hɔlɔɔn nu a yeekwąną kəlee nwɔɔ; diɛ nɛ̨ąą nwuɔ̨-ɓɔlɔ pɛli a nu tɔɔ nwun ɲą kəlee nwɔɔ; ə gɛ, diɛ pɛli nuą nį́į́ɠaa hon ɉi; ka káá bɔ ka nwɔ́ nu huwui nį́į́ hon? Ɛlɛɛ ka ka wɔɔ nį́į́ɠaai laa hɔnmo yɛnɛ̨ɛ̨? 19 Káá náá pu nwɔ́ nu huwui ɲɛ̨́i ɓa, yeehvɛɛ tɛi tɛi mąą mɛ̨nį ɓa lɔ, da lɛɠɛ kpuo lon; nuąi mąą hvo nɛ̨ɛ̨li di hvo haa, ka káá di paai; ɛlɛɛ nuąi mąą hvo nɛ̨ɛ̨li di hvo lɛɛ yɛnɛ̨ɛ̨, kaa di lɛɛ yɛnɛ̨ɛ̨; nwɔ́ nuąi ɲɛ̨́i di ɓowo la nɛ̨ɛ̨i, bələ ɓə ka di ɓowo la. 20 Yili mąą mɛ̨nį ɓa, Mɛ̨nį kəlee ŋą Hééɓomun Yálá woo ka: ka wɔ həɠə ɓɛlaɠaai ti ɓə vílə́ŋąą di pulu, diɛi ti ka kɛ nuą di wɔ yɛnɛ̨ɛ̨ hon ɉi lai; gáá pai di ɓɛlai ka yee ɓa; ɛlɛɛ nuą kaa di wɔ yɛnɛ̨ɛ̨ hon, ŋą́ di lɛɛ di kpɔwɔ ɓa. 21 Gáá pai ka wɔ ɓɔlɔɠaai hu ɓɛlai; gɛ́ nwɔ́ nu huwui kulɔ ka yee ɲą; di hva kɛa kɛ ka yəi a huwɔi da too ɉu. Ka gili kɔ́lɔn nąą lɔwai, kaa kɛ ɲą́ą́ ɓə gáá a Mɛ̨nį kəlee ŋą Hééɓomun Yálá. 22 Yii ka kɛ tələnmomun ɉupui mą a lɛɛ wooɠaa, ya pa ɲą́ą́i vá gwəi pili mą; yii ka kɛ wɛa mun ɲee kɔ́n gɛi ɉu, ɛlɛɛ hva ɲee kulɔ nwɔ tuwɔ pələ ɲɔ̨n hu, yɛ pɛli yɛnɛ̨ɛ̨ hɔlɔɓoi. 23 Yili mąą mɛ̨nį ɓa, ká hvo kɛa pai lɛɛ kɛɛ kaai; ká hvo kɛa pai mɛ̨nį ta ɓoi. Gáá pai nwɔ́ nu kan gulɔi ka yəi. Bələ ɓə, ká gili kɔ́lɔn gɛaa kaa kɛ ɲą́ą́ ɓə gáá a Yai-Laa, Hééɓo kəlee Nąmu.» |