Izikiɛ 12 - Yálá laawoo hɛɓɛ (dc)Babilonə luwɔlaa veelɛnąą 1 Yai-Laa wóó ə həli mą́ą́, yɛ mą́ą́: 2 «Hulɔnu lon, ə́ kaa kulɔ nwoo mu nuą lɔwai; ɲɛ̨i kɔ́w kaa diɛ, kɛɛ kaa mɛ̨nį ɓa, kɛlaa di hva kɛɛ kaa; wəli kaa diɛ mɛ̨nį mɛ̨n mɛ̨nį ɓa, kɛlaa di hva mɛ̨nį mɛ̨n; mąąhɔlɔɓo kulɔ nwoo mu nu huwu li. 3 Ə́ wəli tɔɔ, hulɔnu lon; ə́ tiɛ̨ pɛli yɛ nui di kaa lííla luwɔlaa hu, hvóló ɲąą ɉə-ɉə, gɛ ti di ɲɛ̨i ɓa; ə́ kaa lii luwɔlaa hu, yɛ́ həɠə ɓɛ, yɛ́ li kɛɛnąą ta kpɛli ɓa; kiɛ-o, di kili kaa pai pui ɉu, diɛ kɛ kulɔ nwoo mu nuą ɓaa a diɛ. 4 Ə́ kaa pai yɛ́ tiɛ̨ɠaai kulɔi yɛ nui di kaa lííla luwɔlaa hu nwɔ tiɛ̨; hvóló ɲą, di ɲɛ̨i ɓa; ɛlɛɛ, yɛ́n, ə́ kaa pai kulɔi yələ wilii pɔ, di ɲɛ̨i ɓa, yɛ bələi kɔluwɔɠaa da kulɔ la taai. 5 Di ɲɛ̨́i kwəleen ma, ə́ kaa pai wolo ɓɔi daa mąąkpɛ hį́i ɓa; ɛlɛɛ, ə́ ə́ wɔ tiɛ̨ɠaai tɛɛ nwolo ɓa pələ. 6 Ə́ kaa pai di laai ə́ nwuɔ̨ di ɲɛ̨i ɓa, yɛ́ di kulɔ kpinįi, ə́ kaa pai həɠə yɛɛi a ə́ nwun, ə gɛ hvo pa nɔi kaa. Mąąhɔlɔɓo, gáá ə́ kɛi a hanwon Israɛlə nwɔ pɛlɛ́i mąą mɛ̨nį ɓa.» 7 Ŋą́ gɛ yɛ bələi di mo la mą́ą́, ŋą́ díɛ̨ kulɔ hvóló ŋą; yɛ nui di kaa líí la luwɔlaa hu, nwɔ tiɛ̨. Ɛlɛɛ, ŋą́ wolo ɓɔ ɉį́i hu a ɲéé yələ wilii pɔ; kpinį pɛlɛɛ kɛa, ŋą́ nwɔ́ tiɛ̨ɠaai kulɔ ŋą́ di laa gálan ŋą, ɲą́ą́ dɔ̨nɔ̨, di ɲɛ̨i ɓa. 8 Yələ wala pɔ, Yai-Laa ə mɛ̨nį ɓo mą́ą́, yɛ mą́ą́: 9 «Hulɔnu lon, Israɛlə nwɔ pɛlɛ́i, a gulɔ nwoo mu nu huwui tii; di hvo ə́ mąąnin kɛ?» 10 'Mo diɛ, yɛ́ diɛ, Mɛ̨nį kəlee ŋą Hééɓomun Yálá woo ka, yɛ: «Ɉanwon ŋɛ̨i kaa a dɔɔmun tii Ɉerusalɛmə mąą hanwon, da Israɛlə nu huwu kəlee. 11 'Mo diɛ, yɛ́ diɛ: ‹Gáá mɛ̨nį lɛɛi kwɛala, gɛ́ nɛ kaa. Bələi ŋɛ̨i ŋą́ gɛ la, bələ ɓə gaa pai laai la diɛ. Di kaa pai lii kɔluwɔlaa hu, da mąąkilɛ pələi. 12 Dɔɔmun tii di lɔwai, gaa pai tiɛ̨ laai galan ŋą; gaa pai kulɔi kwii hąą daa mąąkpɛ hį́i wolo ɓa pələ. Di gbɛa wolo ɓɔ laa, dɛɛ mɛ̨nį ɓa lɔ. Gaa pai həɠə pɛlɛi nwun mɛ̨i, hvo pa lee nɔi kaa a ɲɛ̨i kɔ́w. 13 Gáá pai hɛlɛn dɛi dɔwɔ, gaa pai kɔ́i a nwɔ́ hɛlɛn; gáá pai lííla Babilonə, Kalde lɔi hu. Gaa pai haai nɔi tii hu, ɛlɛɛ yaan hva kɛa pənə hvo ɲɛ̨i tɔɔi mą. 14 Gwɛlɛ nuą kəlee, mąąkpɛ kɔ́kulááɠaa da nwɔ kɔ́kulááɠaa, gáá pai di taɠa-taɠai lɔi kəlee hu. Yili pulu ŋą́ hvilɛn di pulu a kɔ́ kɔ́ ɓɔwa. 15 Da gili kɔ́lɔn gea diɛ kɛ, ɲą́ą́ ɓə gáá a Yai-Laa; ɓɛlɔwai gáá pai di taɠa-taɠai la nɔiɠaa hu, gɛ́ di ɲąąkwɛlɛ nɔiɠaa lɔwai. 16 Gáá pai nu kpəli wolo tiikpə laa hɔn moi di lɔwai; a nuąi pai kulɔi kɔ́ kɔ́ ɓɔwa da pulu da ɲɔ̨n di yəi. Diɛ ɓə pai di wɔ ɓowo mɛ̨nįɠaa kəlee hukulɔi nɔiɠaai di kaa pai lii ɉu, nąą nuą diɛ. Nuą da gili kɔ́lɔn gea diɛ kɛ ɲą́ą́ ɓə gáá a Yai-Laa.›» 17 Yai-Laa ə hvaa bɔ́, yɛ mą́ą́: 18 «Hulɔnu lon, ə́ kaa pai ə́ kɔ̨nɔ̨n mįi, yɛ́ kpɛlin, yɛ́ ə́ kpələ liihɛlɛn ɉu; yɛ́ ə́ mąąhulɔ. 19 'Kɛ nɔi hu nuą diɛ: Mɛ̨ni kəlee ŋą Hééɓomun Yálá ɓə mɛ̨nįi ŋɛ̨i ɓoi Ɉerusalɛmə nuąi Israɛlə lɔi hu diɛ; di kaa pai kɛi di laa mįi liihɛlɛn ɉu, diɛ ya kpələ ɲɔw ə ɓo di hu, mąąhɔlɔɓo, di kaa pai nɔi hu woloi, diɛ ɉu hɛnŋąą kəlee kulɔ ɉu; a nɔi hu nuą di wɔ hulu mɛ̨nį laa pɔɔ. 20 Daaɠaai tii nuą kaa ɉu, da lɛɛ a taa kpoloonŋaa; nɔi yɛ lɛɛ a lɔi pun. Ká gili kɔ́lɔn nąąlɔwai, kaa kɛ, Ɲą́ą́ ɓə a Yai-Laa.» Yálá wooi tii kaa pai nɛ̨ɛ̨i mą 21 Yai-Laa ə hvaa bɔ́, yɛ mą́ą́: 22 «Hulɔnu lon, lə mɛ̨nį ɓa yai ka kɛ ɉanwon ŋɛ̨i hɔɔi kaa vilɛn Israɛlə ɓa; kaa kɛ diɛ: ‹Voloɠaa kaa lɔ tɛɛi, hįį kaa nuą di hvo gaai.› 23 'Mo diɛ yɛ́ diɛ, Mɛ̨nį kəlee ŋą Hééɓomun Yálá woo ka: Gáá ɉanwon ti kulɔi ka la, di hva kɛa mo Israɛlə lɔi hu. Kɛlaa, 'kɛ́ diɛ: ‹Ɉįįɠaai di gaa, di bɔ mɛ̨nį kɛ yələ yɛ həli.› 24 Mąąhɔlɔɓo, di hvo kɛa pai lɛɛ hįį kaai; di hva kɛa nuą ɓowo mɛ̨nį ɓo Israɛlə nwɔ lɔi hu. 25 Ɲą́ą́ Yai-Laa, mɛ̨nį lɔpee ŋą́ nɛɛ kwɛala gɛ́ mo, ɉu hva kɛa kwɛa mąą mɛ̨nįi yɛ kɛ. Ka lɛɛ ni yɛnɛ̨ɛ̨, kulɔ nwoo mu nuą, nwooi ŋɛ̨i ŋą́ mo, gɛ́ gɛ. Mɛ̨nį kəlee ŋą Hééɓomun Yálá woo li.» 26 Yai-Laa ə pənə yɛ mą́ą́: 27 «Hulɔnu lon, Israɛlə nwɔ pɛlɛ́i a kɛ kɛi diɛ; mɛ̨nįi ə́ ɉulɔnui ŋɛ̨i kaa gaai, tínąą mɛ̨nį hvəli, mɛ̨nį hu kwɛa mɛ̨nį ka tii gaa moi. 28 Yili mąą mɛ̨nį ɓa, 'kɛ diɛ; Mɛ̨nį kəlee ŋą Hééɓomun Yálá woo ka, nwóó ta pɔ mɛ̨nį kɛ mɛ̨nį hu hva kɛa kwɛa, mɛ̨nįi gaa moi, gáá pai kɛi. Mɛ̨nį kəlee ŋą Hééɓomun Yálá woo ka tii.» |