Izikiɛ 11 - Yálá laawoo hɛɓɛ (dc)Di kaa pai Ɉerusalɛmə kiti teei nwɔ nɛ̨ŋɛ̨nŋaa mąą mɛ̨nį ɓa 1 Yálá nwɔ Kilii ə gbə́ŋə, ə li a ɲą́ą́ Yálá hee pɛlɛ́ gbon yii tii vóló kulɔi pələ, naaləi. Ŋą́ hinąą pow hveelɛ kɔ́w lɔɔli kaa bɛlɛ́ laaləi kwɛlɛ, ŋą́ Azurə lon Yaazania da Benayahu lon Pelatiahu, diɛi kɛ a nuą ɲɛ̨itɔwɔ nuą hveelɛ. 2 Yai-Laa yɛ mą́ą́: «Hulɔnu lon, nuąi da kɛ piɛn doo mɛ̨nįɠaa mąą kili teei di kwəi, diɛ mɛ̨nį ɲɔ̨n mąą nwun dɔɔ kɛ daai ŋɛ̨i hu, diɛ ka. 3 Da kɛ kɛi diɛ: ‹Pɛlɛ́ tɔɔi lɔwai hvo ni həli li, daa kaa a kwɛli ləɠi, ɛlɛɛ ku ɓo a ɉuwɔ.› 4 Yili mąą mɛ̨nį ɓa hulɔnu lon, gwə́i mɛ̨nį hukulɔ diɛ a di hvala pələ.» 5 Yai-Laa ə nwɔ Kilii tɛɛ bɔ́, yɛ mą́ą́: «'Mo yɛ́ diɛ: Mɛ̨nii Yai-Laa kaa moi ya ka, yɛ: Israɛlə nuą, mɛ̨nįi ka kɛi moi ŋą́ gɔlɔn, ɛlɛɛ, giliŋąhiɛi a kɛ tooi kaa ŋą́ gɔlɔn. 6 Káá paa ɓo kɛ daai ŋɛ̨i hu, bələɠaa mɛ̨i aa kpɛɛ mą a nu powa. 7 Yili mąą mɛ̨nį ɓa, Ną́mu Yálá woo ka: Nu powaɠaai tii kaa bu daa kwəi, diɛ ɓə di kaa a ɉuwɔ; daa ə ɓo a gwɛli ləɠi. Kɛlaa ka wɛi, gáá pai ka kulɔi laa. 8 Ka ɲɔw kɔ́ ɓa, kɛlaa ŋą́ kɔ́ ɲąątɔɔ kaa. Ɲą́ą́ Mɛ̨nį kəlee ŋą Hééɓomun Yálá nwóó li. 9 Gáá pai ka kpɛi daa kwəi, ŋą́ ka tɛɛ nwɛ̨ąą pɔ, mɛ̨nįi ŋą́ mo, gáá pai bɔ mɛ̨nį kɛi. 10 Ka káá pai haai a kɔ́ kɔ́ ɓɔwa laa pɔɔ, gáá pai ka kiti teei ɓɛ Israɛlə lɔi hu. Ɲələ ka gili kɔ́lɔn kaa kɛ diɛ, ɲą́ą́ ɓə gáá a Yai-Laa. 11 Daa ŋɛ̨i hvo pai kɛi ka yəi a kwɛli ləɠi, kaan ka ɓo a ɉu huwɔ, kɛlaa gáá pai ka kiti teei ɓɛ Israɛlə lɔi hu. 12 Ɲələ, ka gɔlɔn kaa diɛ; ɲą́ą́ ɓə gáá a Yai-Laa, ɲą́ą́ ŋɛ̨i ka hvo gɛ ka hvo lɛɛ nwɔ tɔ́n nwooi mui, ka hvo ŋą́ tiɓoɠaai kɛ li. Mąąhɔlɔɓo, kaa hvilɛn ka kwɛlɛ taaɠaa túwɔ pələ pulu.» 13 Gɛ́ɛ́ Yálá kwəi mɛ̨nį ɓoi, Benaya lon Pelatiahu mukulaa ɓaa Yálá nwɔ nu nwun mąąɓoɔ, yili ə haa. Ŋą́ too nɔi ɓa níí ɓa, ŋą́ tomą, gɛ ma: «Ee kə Ną́mu Yálá, ə́ kaa bɔ ə́ Israɛlə nu gbəli paa li?» Yálá ka pai nɔi lonnii ɲąąkpɔn ɉii 14 Yai-Laa yɛ mą́ą́: 15 «Hulɔnu lon, 'mo ə́ kaayɔwɔɠaa kəlee diɛ, ə́ yəi bɛlɛ́n nuą, Israɛlə nwɔ pɛlɛ́i kəlee; a diɛi tii Ɉerusalɛmə nuą da kɛ kɛi diɛ: ‹Ka ká mąą kwɛa Yai-Laa ɓa, mąąhɔlɔɓo kuɔ ɓə di nɔi ŋɛ̨i tɛɛ ku pɔ a ku wɔɔ.› 16 Nwooi ŋɛ̨i ɓo diɛ, ɲą́ą́ Yai-laa Yálá nwóó ka: ‹Ə mą kɛ, ŋą́ą́ tɛɛ kwɛaa la, ɛlɛɛ ŋą́ di taɠa-taɠa nuą lɔwai, ŋą́ kɛ laa di pɔ woloɓo yɛ kɛɛnąą mąąhəɠɛɛ.› 17 'Mo diɛ, yɛ́ diɛ: Mɛ̨nį kəlee ŋą Hééɓomun Yálá woo ka: ‹Gáá pai ka kulɔi nɔiɠaa hu, gɛɛnąąɠaai tii di ka taɠa-taɠa laa, ŋą́ ka həɠə laa ŋą́ pa a kaa kɛɛnąą tɔ̨nɔ̨ ɓa; yili pulu ŋą́ Israɛlə lɔi tɛɛ ka pɔ. 18 Di kaa pai pai laa di gili kpɛɛ ɲəi mɛ̨nįɠaa da mowo mɛ̨nįɠaai tii kəlee kulɔ laa. 19 Gáá pai kaalonnaa kili tooi di hu, gɛ́ kili nįnɛ̨ too ka hu, gwɛnį kilii tii di hu, ŋą́ gulɔ laa, gɛ́ nu lii too di hu. 20 Əgɛ, diɛ pɛli hiɛi a nwɔ́ tɔ́n nwooɠaai; diɛ di yee kanąn nwɔ́ lɔi hu yíi ɓo pələ ɓa, ɛlɛɛ, diɛ bɔ mɛ̨nį kɛ. Di kaa pai kɛi a ŋą́ nu huwu, ɲą́ą́n, ŋį́ ɓo a di wɔ Yálá. 21 Ną́mu Yálá woo li, yɛ: Kɛlaa, nuąi di kili kaa lɔ túwɔ́ bələ ɲɔ̨n bɔ pələ, da mɛ̨nį ɲɔ̨n gɛɛ, gáá pai di wɔ túwɔ́ pələ ɲɔ̨n yɛɛi a di nwun.›» 22 Gɛɛ tii, mąąkpɛ malakaɠaa di koon, di kɔwɔ yɛ tínɛ̨n di mu; Israɛlə nwɔ Yálái mąąɲįnɛ̨n ə kɛ di mɛ̨i, ə ɓo di mɛ̨i nąą kəlee. 23 Yai-Laa mąąɲįnɛ̨n ə muhəɠə daa hɛ̨ąi, ə tɛ ə tɔɔ, ɲee tii volo kulɔi pələ mɛ̨i. 24 Yálá nwɔ Kilii ə gbə́ŋə́ nwɔ̨nɔ̨, ə li a ɲą́ą́ Kalde, gɔ́luwɔɠaa pɔɔli, yili kəlee ə kɛ kwɛlɛɛn gɛɛkaa hu, a Yálá nwɔ Kilii kɛ mɛ̨nį. Yili pulu, gwɛlɛɛn gɛɛ tii ŋį́ kɛli gaa, ə həɠə ɲɛ̨́i. 25 Gɛɛ tii, mɛ̨nįɠaai kpɔ Yai-Laa ə nɛ mą́ą́ gwɛlɛɛn gɛɛ kaa hu, ŋą́ ɉukulɔ gɔ́luwɔɠaa diɛ. |