Izikiɛ 10 - Yálá laawoo hɛɓɛ (dc)

Ezekiɛlə ə Yai-Laa nwɔ mąąwiɛ kaa nwɔ̨nɔ̨

¹ Dulɔ kpinįn tii kɛ mąąkpɛ malakaɠaa nwun mɛ̨i, ŋą́ nąą kaa, hɛn da ə kɛ laa yɛ Kúwɔ́-kwɛni kɛ pələ; hɛn da ə ɓo yɛ tɔɔkpəlin gɛ pələ.

² Yálá ə mo ɉəɠə kwəlɛɛ Nąmu ɓa, yɛ mą: «'Li, nwotoloɠaai ŋɛ̨i mąąkpɛ malakaɠaa mu di lɔwai, ə́ ə́ yee hvɛɛ laa nwɔ̨n dəŋa hu; ə́ daɠa-taɠa daa mɛ̨i.» Ɉulɔnui tii ə lɔ laa, gɛ́ gaa.

³ Ɓɛlɔwai ɉulɔnui tii ə kɛi lɔ la laa, kɛnaa mąąkpɛ malakaɠaa tɔɔi kɛ bɛlɛ́ mamįiyee hu pələ, ɓɛi nuą di kɛi hee laa, tulɔ kpinį ə nąą laahvɛɛ.

⁴ Yai-Laa nwɔ mąąwiɛ ə tɛ ŋələi pələ, mąąkpɛ malaka nwun mɛ̨i bɛlɛ́ laaləi pələ. Bɛlɛ́ laa ə hvɛɛ a tulɔ kpinįn, ɛlɛɛ, ɓɛi nuą da hee laa, Yai-Laa nwɔ mąąwiɛ nwɔ kɛɛ pɔ̨nɔ̨ ə naa laahvɛɛ.

⁵ Di kɛi mąąkpɛ malakaɠaa koon di mɛ̨n bɛlɛ́ kwɛlɛ, ɲɛnɛ̨ɛ̨ pələ, nwoo ə ɓo yɛ Huwalawala Kəlee Nąmu, a kɛi pələ ɓo.

⁶ Ɓɛlɔwai ə kɛ la ɉəɠə kwəlɛɛ nąmu ɓa nwɔ̨n dəŋą həɠə nwotolo kɔ́wɔɠaa lɔwai, mąąkpɛ malakaɠaa lɔwai, nui tii ə pa ə tɔɔ nwotolo kɔ́wɔɠaa kwɛlɛ.

⁷ Mąąkpɛ malaka tɔ̨nɔ̨ ə ɲee haŋą mąąkpɛ malakaɠaa lɔwai, nwɔ̨n tii kɛ mąąkpɛ malakaɠaa lɔwai, ə da həɠə; ə ɉəɠə kwəlɛɛ nąmu yee hvɛɛ la, yili ə ɉon ə kulɔ.

⁸ Nąąlɔwai, nu yee ə kulɔ mąąkpɛ malakaɠaa koon mu;

⁹ ŋą́ nąą kaa, wotolo kɔ́wɔ nąąn ə kɛ mąąkpɛ malakaɠaa kwɛlɛ, nwotolo kɔ́wɔ tɛitɛi ə ɓo mąąkpɛ malaka tɛitɛi kwɛlɛ. Nwotolo kɔ́wɔ kɛ pələ ə kɛ yɛ kúwɔ́-kwɛni a kɛi lən.

¹⁰ Di nąąn tii, di kəlee di kɛ pələ ə kɛ lɔ tanɔ̨n; di pili-pilɛɛ kɛ gee hu.

¹¹ Da kɛi kɛ hiɛ, di kɛi li nu ɲɛ̨i heei nąąn hu pələ; di hvo kɛi di pulu kaa, kɛlaa di kɛi li ɓɛ pələi di nwun dinɛn ŋąą kɛ la, di hvo kɛi di pulu kaa.

¹² Mąąkpɛ malaka tii kɔ́lɔ ɓa nąą kəlee, di hɛ̨ą, di yee ɓa, da di koonŋaa ɓa, ə mą kɛ, nwotolo kɔ́wɔɠaa ɓa, di nąąn tii di kɔ́wɔɠaa diɛ, nwɔ̨n gbaalən ə kɛ nąą kəlee ɓa.

¹³ Ŋą́ mɛ̨n diɛ nwotolo kɔ́wɔɠaai tii laa hee a ɉigilin.

¹⁴ Di tɛitɛi di ɲɛ̨i heei ə kɛ nąąn, di ɲɛ̨ilai dɔlɔɔ ə kɛ yɛ mąąkpɛ malaka ɲɛ̨ilai, veelɛnąą ə ɓo a nu ɲɛ̨ilai; ɉaaɓa nąą ə ɓo a yala ɲɛ̨ilai, nąąn nąą ə ɓo a kúwɔ́ ɲɛ̨ilai.

¹⁵ Mąąkpɛ malakaɠaa di tɛ yələi pələ; ɉɛn vulúmąąi ŋą́ gaa Kebarə yá-kwɛlɛ, yaa li kɛ.

¹⁶ Mąąkpɛ malakaɠaa da kɛi hiɛ, nwotolo kɔ́wɔɠaa di kɛi hiɛ di kwɛlɛ; mąąkpɛ malakaɠaa da kɛi di koonŋaa laaɓo diɛ tɛ yələi pələ, nwotolo kɔ́wɔɠaa di hvo kɛi lɛɛ pulu; kɛlaa di kɛi lɔ lɛɛ di kwɛlɛ.

¹⁷ Mąąkpɛ malakaɠaa da tɔɔ kɛ, diɛ kpɛli mąn da tɔɔ. Da kɛi nwɔ̨nɔ̨ tɛ, da diɛni di kɛi tɛ, mąąhɔlɔɓo ɉɛn vulúmąą kili ə kɛ di hu.

Yálá nwɔ mąąwiɛlaa kaa kulɔi Yálá hee pɛlɛ́ mu

¹⁸ Yai-La nwɔ mąąwiɛ ə muhəɠə Yálá hee pɛlɛ́ laaləi, ə tɛ ɲələi pələ ə tɔɔ mąąkpɛ malakaɠaa nwun mɛ̨i.

¹⁹ Mąąkpɛ malakaɠaa di di koonŋaa haŋą, di həɠə nɔi ɓa; diɛ tɛ yələi pələ. Di kulɔ ɲɛ̨́i ɓa a gee da nwotolo kɔ́wɔɠaa. Yálá nwɔ mąąwiɛ ə tɔɔ Yai-Laa nwɔ pɛlɛ́i laaləi, yai tii ɲɛ̨i heɛ ɲánwuɔ̨ pələ; Israɛlə nwɔ Yálá nwɔ mąąwiɛ ə kɛ mąąkpɛ malakaɠaa nwun mɛ̨i pələ kpɔ ləɠə-ləɠə.

²⁰ Ɉɛn vulúmąąɠaai tii ta ŋą́ di kaa Israɛlə nwɔ Yálái mu Kebarə yá kwɛlɛ, diɛ li kɛ; ɛlɛɛ ŋą́ gili kɔ́lɔn gɛ́ kɛ mąąkpɛ malakaɠaa li kɛ.

²¹ Mąąkpɛ malaka nąąn ə tɛɛ, di ɲɛ̨ilai ə ɓo nąąn; di koon ə ɓo nąąn, di koonŋąą mu pələ, nu yee kulɔ mąą ə kɛ laa.

²² Di ɲɛ̨ilai gulaa kɛ ɲɛ̨ilaiŋaai tii ŋą́ di kaa Kebarə yá kwɛlɛ di kɛ pələ ɓa. Di kəlee di kɛi li di ɲɛ̨i tɔwɔ pələ.