Izikiɛ 1 - Yálá laawoo hɛɓɛ (dc)

Ezekiɛlə da ɉɛn vulú mąą nąąn

¹ Gwɛlan bow haaɓa ɲąnin nąąn naa nwɔ hvóló nɔɔli yələ, ŋą́ kɛ gɔ́ luwɔɠaa lɔwai; Kebarə yá kwɛlɛ, yələkɔlɔn naa ə ɓo, ɛlɛɛ, ŋą́ kpalo mɛ̨nį kaa yɛ həɠə Yálá pɔ.

² Tɔɔmun Yoyakin liɛ gɔ́ luwɔlaa hu, gwəlan nɔɔli nąą, ɲąnįn nwɔ hvóló lɔɔli yələ;

³ Yai-Laa ə hvaa ɉaláá laa həli mun Buzi lon Ezekiɛlə pɔ, Kalde lɔi hu, Kebarə yá kwɛlɛ. Yai-Laa ə ɲee pɛlɛ laa mɛ̨́i.

⁴ Ɲɛ̨́i ə lɛɛ laa, tulɔ hvaŋą ə kɛi həɠə ɲánwuɔ̨ pələ, tulɔ kpinįn ɉu wiaa da nwɔ̨n gɛnɛ̨, ɛlɛɛ, gwɛ́lɛ́ kəlee pɔ̨nɔ̨ɔ̨ kɛ a nwɔ̨n nə́n; ɛlɛɛ, nwɔ̨n tii hąą ə kɛ yɛ nwɔ̨n gbaalən gbɔluɔ tamąą da kɛi kulɔ nwɔ̨n tii hu.

⁵ Ŋą́ hɛn vulúmąą nąąn gaa ɉąąi, di kɛ pələ ka: Di kulaa kɛ nuą diɛ,

⁶ di tɛitɛi di ɲɛ̨ilai ə kɛ nąąn, ɛlɛɛ, di tɛitɛi di koon ə ɓo diɛ nąąn.

⁷ Di kɔ́wɔ wuluɠaa di kɛ a ɉaŋąą, di kɔ́wɔ ə ɓo yɛ nįŋɛ̨ kɔ́wɔ; yɛ lən yɛ ɓala kwɛli hunwɔ̨ a kɛi lən.

⁸ Nu yeeɠaa di kɛ di koonŋaa mu, di tinɛ̨n ŋąąi kɛ nu ɲɛ̨ilai heei nąąn ma pələ, ə mą kɛ di ɲɛ̨ilai da di koonŋaa, gəlee nąąn kɛ pələ ə kɛ lɔ tii.

⁹ Di koonŋaa di kɛi di keeni kaa, da kɛi hiɛ di kɛi di pulu tinɛ̨n; kɛlaa nu kəlee ɲɛ̨i haŋąą kɛ dɔwɔ pələ.

¹⁰ Di ɲɛ̨ilai gulaa kɛ nu ɲɛ̨ilai ma, di nu nąąn, Yala ɲɛ̨ilai ə kɛ di ɓa-mįi-yee hu pələ; nįŋɛ̨ hilɛ ɲɛ̨ilai ə ɓo di kɔ́ɓɛyee hu pələ, kuwɔ ɲɛ̨ilai ə kɛ di nu nąąn diɛ.

¹¹ Di ɲɛ̨ilai gɛ pələ ka tii kɛ. Di koonŋaa di wɛi, veelɛ tɛɛi kɛ di mɛ̨i, diɛ di kee kaa. Ɛlɛɛ, veelɛ yɛ di kɔ́lɔ mąą kpulu.

¹² Di tɛitɛi di ɲɛ̨i haŋąą kɛ di ɲɛ̨i tɔwɔ diɛ li. Di kɛi li ɓɛ pələi kili ə kɛi di tənən dɔɔ la, di hvo kɛi hiɛ di hɛŋɛnɛn ma, di hvo kɛi di pulu kaa.

¹³ Di kulaa kɛ hɛn vulúmąąɠaa diɛ, di kɛ pələ ə kɛ yɛ nwɔ̨n dəŋa; ə ɓo yɛ ŋą́ kɛi kpalanŋaa kaa, diɛ li, diɛ pa ɉɛn vulúmąąɠaai tii lɔwai. Nwɔ̨n nən ə kɛi tɛ, ɛlɛɛ mąną-mąnąɠaa diɛ kulɔ nwɔ̨n nən ɉu.

¹⁴ Ɉɛn vulúmąąɠaai tii, di kɛi wean ɓɛ pələ, diɛ wean ɓɛ pələ yɛ yələgbąnąą a kɛi gɛ.

¹⁵ Ɲɛ̨́i ə kɛ ɉɛn vulúmąąɠaai tii diɛ, ya ɓə, ŋą́ hɛn gɔwɔ kiliɠilin gɛɛ kaa nɔi ɓa, ɉɛn vulúmąąɠaai tii kwɛlɛ, di ɲɛ̨ilai tɛitɛi tənən ma.

¹⁶ Ɉɛn gɔwɔ kiliɠilin gɛɛɠaa tii kɛ pələ ka, da di pɛli pələ: Di kɛi lən yɛ Kúwɔ́-kwɛni, ɛlɛɛ, di kɛ pələ ə kɛ lɔ tanɔ̨n. Di kɛ pələ ka tii; di tɔɔ pələ nwɛi, di pili-pilɛɛ kɛ di kee hu.

¹⁷ Da kɛi hiɛ, di kɛi li nu ɲɛ̨ilai nąąn ɉu pələ, di hvo kɛi yali di pulu di wɔ hiɛi tii hu.

¹⁸ Di tɔɔmɛ̨i ə kɛi nu mąąɲɔw, ə kɛ lɔ yɛ nwɔ̨n gbaalən a kɛ di nu nąąn tii di nąą kəlee.

¹⁹ Ɉɛn vulúmąąɠaai tii da kɛi hiɛi, ɉɛn giliɠilin gɛɛɠaa tii di kɛi hiɛ di kwɛlɛ. Ɉɛn vulúmąąɠaa da kɛi tɛ yələi, ɉɛn giliɠilin gɛɛɠaa tii di kɛi tɛ.

²⁰ Di kɛi ɉaŋa a pələi kili a kɛ kɛ bɔ ə di tənən dɔɔ la. Ɛlɛɛ, gɔwɔ kiliɠilin gɛɛɠaa tii di kɛi tɛ a gee. Mąąhɔlɔɓo, ɉɛn vulúmąąɠaai tii kili ə kɛ ɉɛn giliɠilin gɛɛɠaa hu.

²¹ Ɉɛn vulúmąąɠaai tii da kɛi hiɛ, ɉɛn giliɠilin gɛɛɠaa tii di kɛi hiɛ, da tɔɔ kɛ, yiliɠaai di kɛi tɔɔ. Da kɛi tɛ yələi pələ, ɉɛn giliɠilin gɛɛɠaa tii di kɛi tɛ a gee; mąąhɔlɔɓo, ɉɛn vulúmąąɠaai tii kili ə kɛ ɉɛn giliɠiliɠaa hu.

²² Ɉɛn vulúmąąɠaai tii nwun mɛ̨i pələ, yələkɔlɔn gulɔ mąą ə kɛ laa; yɛ lən yɛ gaaɉu mąąhəɠɛɛ kpɔ tiakpa-tiakpa, ə kɛ pɛlɛ ni di nwun mɛ̨i ɲələi pələ.

²³ Ɲələ kɔ́lɔn mu pələ, di koonŋaa haŋąąi kɛ di keeni pɔ pələ, di tɛitɛi, di koon veelɛ ə kɛ pɛlɛ ni diɛ, di koon veelɛ yɛ di kɔ́lɔ mɛ̨i kpulu.

²⁴ Ɛlɛɛ, da kɛi hiɛ, di koonŋaa tin ə kɛi kulɔ, gɛ́ mɛ̨n; gulaa kɛ ya hvɛɛ tin ma. Ə ɓo yɛ Yai ɲee a pɛli mɛ̨nį kəlee ɓa nwoo, yɛ nu kpulu tin; ə ɓo yɛ kɔlaɠa kɔ́wɔ mu tin. Da tɔɔ kɛ, di kɛi di koonŋaa pɛlɛ ma.

²⁵ Woo ta ə tɔɔ, yɛ kulɔ ɲələkɔlɔn tii kɛ di nwun mɛ̨i ɉu;

²⁶ Ɲələkɔlɔn tii kɛ di nwun mɛ̨i yili mɛ̨i pələ, kwɛni huwu lɛlɛɛ ta ə kɛ laa; ə ɓo yɛ tɔɔ kpəli gɛ pələ, dɔɔ kpəlin gulɔ mąą mɛ̨i, nu kulɔ mąą ə kɛ laa ɲɛ̨ilai ə ɓo yɛ nu, ə ɓo kpɔ ɲələi pələ ləɠə-ləɠə.

²⁷ Yili pulu, ŋą́ hɛn da kaa, ə ɓo yɛ nwɔ̨n gbaalən gbɔliɔ; yɛ nwɔ̨n gɛ pələ, yɛ mąątinɛ̨n yɛ doo gee hu; yɛ həɠə la ɉɛn tii nįŋɛ̨i, yɛ tɛ la ɲələi pələ, yɛ həɠə nįŋɛ̨i yɛ yɛɛ laa ɉɛɠɛɛ pələ. Ŋą́ hɛn da kaa yɛ nwɔ̨n, da kɛɛ pɔ̨nɔ̨ ta, gwɛlɛ kəlee ɓa.

²⁸ Ə kɛ yɛ gbəimiliin, yai a laa tulɔ kpinįn dɔwɔ, a tulɔ pu yələ. Gɛɛ pɔ̨nɔ̨i tii kɛ naa kwɛlɛ kəlee, gɛ pələ ka tii kɛ. Yai-Laa nwɔ mąąwiɛ gulɔ mąą, da gɛ pələ ka tii kɛ; ŋą́ nąą kaa, ŋą́ pɛlɛ níí ɓa, nɔi ɓa, ŋą́ woo ta mɛ̨n yɛ pələ ɓo mą́ą́.