Ikilisiati 8 - Yálá laawoo hɛɓɛ (dc)1 Kili hvo nu ɓa, yɛ pɛli yɛnɛ̨ɛ̨ mɛ̨nįɠaa hee pələ hukulɔi. Kɛlaa, ə mą kɛ tii, kilimąą mun nwɔ kili a ɲɛ̨i pɔ̨nɔ̨, yɛ ɲɛ̨i həɠəən. Tɔɔmun nwoo hon, yili lɛlɛɛi 2 Yii tɔɔmun a mo, mąąnɛ̨ɛ̨ gu nwoo hon; mąąhɔlɔɓo, bələ ɓə gu gu kwɛla la Yálá ɲɛ̨i ɓa. 3 Gu hvo lənə tɔɔlaamun ɓa ɉa. Mɛ̨nįi nwɛli hvo tɔɔmun ma, gu hvo kanąn ma. Mąąhɔlɔɓo, mɛ̨nįi a nɛ̨ɛ̨ mą, ya ɓə a gɛ. 4 Tɔɔmun vaa woo, gaa mɛ̨nį kəlee nwun mɛ̨i, ɛlɛɛ, nu ta hva kɛ mą: «Ə́ mo tii lə mɛ̨nį ɓa?» 5 Nui a tɔ́n ɉon, tɔ́n va too mɛ̨i. Kɛlaa, kilimąą mun ə gɔlɔn yɛ, yələ ta kaa pai həlii, Yálá nwɔ kitii kaa pai nwɔ nąą kɛi ɉu. 6 'Hvó gaai, mɛ̨nį kəlee kiti tee yələ kaa mą, mąąhɔlɔɓo, nu kan níi ɲɔ̨nwɔ̨ɔ̨i gwəi kɛnɛ̨; 7 mɛ̨nįi pai kɛi tínąą, gu hvo gɔlɔn. Bələi mɛ̨nįɠaa kaa pai kɛi la, gbɛɛ ɓə a pɛli nɛi guɔ? 8 Nui lɔpee ta hva pɛli ɲee kąnąn ɉi nɔ̨ɔ̨ ɓa. Nu ta hva pɛli ɉaa yələ həɠəi mą. Kɔ́ a kɛ nu mɛ̨i, ə́ pui hva kɛ mą. Nwąnąlɔ hva mɛ̨nį ɲɔ̨n gɛmun malo. 9 Mɛ̨nįɠaa kpɔ kɛi ɓɛ yələkɔlɔn mu, ŋą́ą́ mąąkpɛɛ, ŋą́ nu lonnii kaa, diɛ hee di ɓɛlaa mɛ̨i, diɛ di mɔ̨nɔ̨ɓo. 10 Ŋą́ą́ nwąnąlɔ nuą kaa, diɛ di haa kuu kɛ! Yaamun, nuą tii, di kɛi lɔ Yálá hee pɛlɛ́ mu, ya ka tii daa lɛ̨ą di túwɔ́ pələ ɓa. Yili kaa nwɔ̨nɔ̨ a kpɛli-kpɛli. 11 Nui a mɛ̨nį ɲɔ̨n gɛ, gwələ hva kulɔ mą ɲąąɓa; mɛ̨nįi a gɛ mɛ̨nį ɲɔ̨n gɛ nuą diɛ mɛ̨nį ɲɔ̨n gɛ la yaa li. 12 Nɛ̨ŋɛ̨n ɉəɠəmun danɔ̨n gbən a pɛli ə mɛ̨nį ɲɔ̨n damąą bələ kulɔ, Kɛlaa yaamun, yɛ lamun yɛnɛ̨ɛ̨. Ɲą́ą́ gbį́nįi gílí kaa ɉu, gɛ diɛ: «Nuąi da ɲɔw Yálá ɓa, diɛ ɓə di kaa a lúwɔ́ lonnii, mąąhɔlɔɓo, diɛ ɓə Yálá nwɔ Heeɓolaa kɔ́lɔn. 13 Nwąnąlɔmun nwɛi, hva pɛli kɛi a lúwɔ́ lon. Nwąnąlɔmun a tɛɛ yɛ nįnįn, a lɛɛ a nu nwunu, ə haa, mąąhɔlɔɓo, hva ɲɔw Yálá ɓa.» 14 Kɛlaa yaamun, mɛ̨nį ta a kɛ kɛi lɔi mɛ̨i gɛ́ gaa, ya ɓaa: Mɛ̨nįi mąąnɛ̨ɛ̨ ə həli nwąnąlɔmun ma, yili yaamun, mə a həli mɛ̨nį haŋąą kɛmun ma. Bələ lɔ ɓə gaa la, nwąnąlɔmun yaamun, gɛ mɛ̨nį hu yɛ nɛ̨ɛ̨, yɛ a kɛ a nu haŋąą. Gɛ́ diɛ: yili kaa a kpɛli-kpɛli mɛ̨nį. 15 Yii ɓaa nwɛ́i, ŋą́ kwəinɛ̨ɛ̨ kulɔ, mąąhɔlɔɓo, hɛn gaa a nu lonnii di wɔ nwuna nɛ̨ɛ̨ ɓɛ lɔi mɛ̨i, ya ɓaa: di di laa mįi, di di kpələ, di di ɲąąnɛ̨ɛ̨ kulɔ. Volói ŋɛ̨i Yálá ə dɛɛ nu lonnii pɔ lɔi mɛ̨i, yili lɔ ɓə mąąnɛ̨ɛ̨ ə kɛ di kɛ kóló pɔ. 16 Bələi nu a tɛɛ la yɛ kɛ a kilimąą mun, ŋą́ą́ nį́í lɔ yili kwɛliɛ hu, ə gɛ, ŋą́ gbaɠala kaa. Ɛlɛɛ, mɛ̨nįi kpɔ nu lonnii yee kaa mą lɔi mɛ̨i, ə gɛ, ŋį́ gaa ŋį́ mąąkpɛɛ. Mąąhɔlɔɓo, ŋą́ą́ gaa, yɛ ə kɛ a kpinį yɛ ə kɛ a hvóló, nu lonnii di yíi, di lɔ a di ɲɛ̨i. 17 Ya ɓə ŋį́ Yálá kɛ mɛ̨nįɠaa kaa, gɛ́ diɛ: nu hva pɛli Yálá kɛ mɛ̨nįɠaa hukpɛi ɓɛ yələkɔlɔn mu; bələi mąn nu kanŋaa kaa tɔɔi la a di nwąnąi diɛ gwɛli. Ə mą kɛ, kilimąą mun a kɛ diɛ: «Ŋą́ gɔlɔn!» Hva pɛli Yálá kɛ mɛ̨nįɠaa pulu kaai. |