Ikilisiati 7 - Yálá laawoo hɛɓɛ (dc)

¹ Nu laa lɛlɛɛ tɛɛ viɛlaɓoɔi ə tɛɛ wulɔ mąąkun nɛ̨ɛ̨ ɓa. Nu haa hvóló hviɛlaɓoɔi nu kaa hvóló ɓa.

² Pɛlɛ́i di kaa haa wɔlɔ ɓoi mu, nu liɛ laa hviɛlaɓoɔi, ə tɛɛ, pɛlɛ́i di kaa kulɔ-yɛnɛ̨ɛ̨ kɛi mu, ma. Mąąhɔlɔɓo nu kəlee ɲąąkpɛɛi ɓaa haa, viɛlaɓoɔi nu kəlee di di gili lɛɛ ɉu.

³ Mɔ̨nɔ̨ mįiɛ hviɛlaɓoɔi yɛlɛ kɛɛ ɓa. Mąąhɔlɔɓo mɔ̨nɔ̨ a nu ɲɛ̨ilai ɲɔ̨n, Kɛlaa, a nu kili ta kɛ mą.

⁴ Kilimąą nuą da di kiliŋąhiɛ haa ɓa, kilikpɛɛgwəi nuą di wɛi, pə́lə́ lɔ ɓə da di kiliŋąhiɛ mą.

⁵ Nu wəli tɔɔ kilimąą mun nwɔ liɛwoo ɓa hviɛlaɓoɔi, ə tɛɛ nu wəli tɔɔ kilikpɛɛgwəi nuą di wɔ wələ wooɠaa diɛ.

⁶ Mąąhɔlɔɓo, bələi lɔ ɲąąlən gwɛi a pola ləɠi mu, bələ lɔ ɓə kilikpɛɛgwəi mun a hvaa la mɛ̨lɛ̨-mɛ̨lɛ̨, nwun və mą.

⁷ Yaan, mɔ̨nɔ̨ laa nu mɛ̨i a kilimąą mun gɛ yɛ ɓowo mun, nɔgwəi hɛn gɔw a nu nwɔ tələnmolaa kulɔ ɲəi.

⁸ Nu kɛ kóló laa kulɔi hviɛlaɓoɔi ə tɛɛ gɔwɔ tɔɔi ɓa. Nu liikpəlɛɛ hviɛlaɓoɔi ə tɛɛ huɲąŋą kɛnɛ̨mun ma.

⁹ Mąą hvo nɛ̨ɛ̨li nu hvo níiholi ɉą, kilikpɛɛgwəi mun mə níiholi laa nɛ̨ɛ̨.

¹⁰ Mąą hvo nɛ̨ɛ̨li gu hvo kɛ mą: Lə mɛ̨nį ɓa, wɛi lɛlɛɛi kɛ háákələi ɓa? Kilimąą mun na woo hvə li.

¹¹ Kili kɛɛ nu ɓa ɓɛlɛ kaa mą ə tɛɛ la, nu kwɛlin ma. Mąąhɔlɔɓo, kili kɛ ɲəi dɔlɔ a həli nu kəlee ɓa.

¹² Hvó gaai, bələi lɔ wali a nu mɛ̨i kpulu la, bələ lɔ ɓə kili a kilimąą mun mɛ̨i kpulu la, mąąhɔlɔɓo, nui kili kaa mą a dɔlɔ hɔlɔɓo. Mɛ̨nįi gɛi mąąnɛ̨ɛ̨ nu kili ə kɛ la ɲəi, yaa li.

¹³ Ka gu Yálá kɛ mɛ̨nįɠaa mąąkpɛɛ tai! Hɛn Yálá ə mąą pɛlɛ, nu ta hva pɛli ɉaŋąi.

¹⁴ Ɓɛlɔwai ɲɛnɛ̨ɛ̨ ɲąą a nɛ̨ɛ̨ la gu yəi, ka gu gu kwəinɛ̨ɛ̨. Ɲąąnwąnąą a həli la guɔ, ka gu gu kiliŋąhiɛ, ɲąąnɛ̨ɛ̨ da ɲąąnwąnąą, Yálá kɛ mɛ̨nį ɓaa a gəlee, Ə yili kɛ tii, əgɛ, nu hvo pɛli Yálá kɛ mɛ̨nįɠaa kpun ɉu kaai.

¹⁵ Ɲíi kuu kpuɔ lon ŋɛ̨i ŋą́ gɛ lɔi mɛ̨i, yii ŋį́ gílí lɛɛ ɉu, ya ɓaa: mɛ̨nį kəlee da pɛli kɛi. Nu haŋąą a tee kpə, bələi mąn ɉaŋąąi la. Nwąnąlɔmun yɛ lamun yɛnɛ̨ɛ̨, bələi mąn nwąnąlɔi la.

¹⁶ 'Hvó ə́ kpɔwɔ kaa, ə́ ɲɛ̨i ɓa yɛ nu haŋąą. 'Hvó ə́ kpɔwɔ kaa ə́ ɲɛ̨i ɓa yɛ kilimąą mun. Akɛ tii, mɔ̨nɔ̨ lɔ ɓə gwa naa gu kpɔwɔ ɓa.

¹⁷ 'Hvó nɛɛ laa, nwąnąlɔ mɛ̨nį hvo ə́ yala bɔ pələ, ɛlɛɛ, 'hvó túwɔ́ yɛ kilikpɛɛgwəi mun; yá gɛ tii, yá həɠə ə́ kpələyá tɔwɔ.

¹⁸ Mąąnɛ̨ɛ̨, nu ə nwɔ yɛnɛ̨ɛ̨ kɛ niɛwoo hveelɛi tii mɛ̨i. Mąąhɔlɔɓo, nui a mąąwiɛ tɛɛ Yálá pɔ, mɛ̨nįɠaai tii moɔ, hva pɛli gɛi.

¹⁹ Kili a kilimąą mun daalə tɔɔ, ə tɛɛ, lɔi ɲąąwooɓo nuą pow kɛɛ taalee tɔ̨nɔ̨ ŋąąwoo ɓoi ɓa.

²⁰ Yaan, nui lɔpee ta hvo ɓɛ lɔi mɛ̨i ɉaŋąą, yɛ mɛ̨nį lɛlɛɛ kɛ, yii hva pɛli lan ɉi.

²¹ Mɛ̨nįi a too wəlii, hvó gəlee hvɛ-hvɛ kulɔ; hvó pa ə́ wɔ luwɔ woo mąn yɛ mɛ̨nį ɲɔ̨n mo ə́ laa mɛ̨i.

²² Ə́ kili kaa ɉu yɛ́ kpɛli, yáá ta mɛ̨nį ɲɔ̨n mo nu ta laa mɛ̨i.

²³ Ŋą́ą́ mɛ̨nį kəlee mąąkpɛɛ a kili kɛ ɲəilaa, ya ɓə gɛi, gɛ́ kɛ diɛ: «Gáá túwɔ́i a kilimąą mun dúwɔ́ pələ», Kɛlaa, və́ pɛli həlii nwun gulɔi.

²⁴ Mɛ̨nįi gaa ju, ŋąą kɛnɛ̨ pələ, da gbon ɉu kwɛa pələ, gbɛɛ ɓə a pɛli gbaɠala kəlee kaai?

²⁵ Yili ɓa, ŋą́ gbɔ́wɔ́ lɔ mɛ̨nį kwɛliɛ hu da mɛ̨nįɠaa kɛ mɛ̨nį nwun; ŋą́ kɛ bɔ, ŋą́ kili mɛ̨nį kaa. Yii ŋį́ gaa ya ɓaa: Nwąnąlɔ da kilikpɛɛgwəi di kaa a ɓowo mɛ̨nį.

²⁶ Ŋį́ gaa gɛ́ diɛ: nɛ̨ɛ̨nu gbąnąą, ɲɔ̨nwɔ̨ɔ̨i dɛɛ haa ɓa. Mąąhɔlɔɓo, gaa a hɛlɛn, nwɔ wɛlikɛmąą yɛ ɓo yɛ diŋɛ̨n, ɲeeɠaa di ɓo a nu yili yɛli. Nui nwɛli kaa Yálá ɓa, hva too nɛ̨ɛ̨nu taaləi tii yəi diŋɛ̨n ɉu. Kɛlaa, nɛ̨ŋɛ̨n ɉəɠəmun mə a too ɉu.

²⁷ Kilimąą mun yɛ mą: hvilɛn ŋɛ̨i ŋį́ mo mɛ̨nį kwɛliɛ pulu, da mɛ̨nįɠaa kɛ mɛ̨nį nwun, ə gɛ, ŋį́ gaai;

²⁸ mɛ̨nįi gáá gwɛlii a yələ kəlee və́ ni gaa li, ya ɓaa: hinąą waa-tɔ̨nɔ̨ lɔwai, ŋį́ hulɔnu tɔ̨nɔ̨ kaa laa, yɛ hulɔnulaa mɛlɛ kɛ mą. Kɛlaa, nɛ̨ą kpulu kɛnɛ̨ lɔwai, və́ dɔ̨nɔ̨ kpɛli kaa ɉu, yɛ nɛ̨ɛ̨nulaa mɛlɛ lɛɛ mą.

²⁹ Yii woloi lɔ ŋą́ gaa, ya ɓaa: Yálá ə nu pɛli a ɉaŋąą, hvo gbɛlaan. Kɛlaa, nu kpinįi ɓə gbɔwɔ mąą mɛ̨nį nwun bili.