Ikilisiati 6 - Yálá laawoo hɛɓɛ (dc)1 Ŋą́ą́ nwɔ̨nɔ̨ mąąwɛli mɛ̨nį ta kaa ɓɛ lɔi mɛ̨i, gaa a mɛ̨nį ŋąąnwąnąą kɛnɛ̨ nu lonnii diɛ; 2 ya ɓaa: Nu ta ka tii Yálá aa hvaa mą, aa hɛn gɔw da yeelahvólóon dɛɛ bɔ, ɛlɛɛ, mąąwia. Nui tii, hɛn kpɔ gaa bɔ, aa gəlee hɔlɔɓo, Kɛlaa, Yálá hva nɛɛ laa hvo nwɔ hɛnŋąą tii ɲąąnɛ̨ɛ̨ kulɔ; nu takpɛli ɓə a ɲąąnɛ̨ɛ̨ kulɔ. Yili kaa a kpɛli-kpɛli mɛ̨nį da mɔ̨nɔ̨ ɲąąnwąnąą mįiɛ. 3 Nu ta a pɛli mą ə lon ɉɔlɔɓo nwun dɔ̨nɔ̨, mąą nu ə kwɛlan damąą kɛ yɛnɛ̨ɛ̨, akɛ hvo ɲąąnɛ̨ɛ̨ kulɔ li ɲíi hvóló tamąą tii hu, ɛlɛɛ nwɔ̨nɔ̨, di hvo kpɛli bowa loo li a nɛlɛɛ, yili ɲąąnɛ̨ɛ̨ ɓaa a lə? Nwɔ́ kwəi, yəikalalon viɛlaɓoɔi mąą nu ɓa. 4 Mąąhɔlɔɓo, yəikalalon, ə too lɔ nee kwəi, kpɛli-kpɛli, nee hvo gaa li, hvo mɛ̨nį ta kɛ yɛnɛ̨ɛ̨. Nu ta hva gili lɛɛ mąą mɛ̨nį hu; 5 Hvo kɛ hvóló kaa li, hvo yɛnɛ̨ɛ̨ mɛ̨nį ta kɔ́lɔn. Nwɛi, nwɔ hvįitɔɔi kɛnɛ̨i, ə tɛɛ nui ŋɛ̨i kwɛlan damąą kɛ yɛnɛ̨ɛ̨, mą. 6 Ə mą kpɛli kɛ aa kwɛlan nwaa-hveelɛ kɛ yɛnɛ̨ɛ̨, a kɛ a wala ɲąąnɛ̨ɛ̨ kulɔ, lə ɓə yili a gɛ nu ɓa? Kɛlɛi nɔ̨ɔ̨-nɔ̨ɔ̨ hɛn gəlee ŋąąkpɛɛi kaa tanɔ̨n-e? 7 Nu kɛ kóló kaa lɔ a niiɓa ɲąąnɛ̨ɛ̨ mɛ̨nį. Kɛlaa, ɲąą hvo ta nɛ̨ɛ̨ li hvo kulɔ nu liiɓa. 8 Lə ɓə Kilimąą mun ɲəi viɛlaɓoɔ ə tɛɛ la kilikpɛɛgwəi mun ma? Tɔlɔ ləi kpɔ ɓə yeehvowolomun a nwɔlɔɓo, aa kɛi ɉiɛ pələ ɲɛlɛ kɛ nuą ɲɛ̨i ɓa? 9 Viɛlaɓoɔi, hɛn gaa nu yəi ə gwəinɛ̨ɛ̨, ə tɛɛ nu kpɔwɔ ɲąą kɛnɛ̨ɛ̨ ɓa, mąąhɔlɔɓo, yili kaa a kpɛli-kpɛli mɛ̨nį, yɛ nu a kɛi hvaŋą tənən dɔɔ. Kilimąą mun nwɔ liɛwoo 10 ɉɛn kpɔ gaa yɛnɛ̨ɛ̨, laa kaa wɔlɔ gəlee ɓa. Ɛlɛɛ, bələi nu kan gaa la, gu gɔlɔn. Nu da naa tɛɛ mąąmun di hva kiti kɛ. 11 Bələi lɔ gwa hɛatoo la kɛnɛ̨, bələ lɔ ɓə gwa lan na. Yili dɔlɔ ɓaa a lə? 12 Yɛ bələi nu yii hvóló hu hvo kwɛa li li la, yii nɛlɛɛ nu lonnii mąą mɛ̨nį ɓa, gbɛɛ ɓə a pɛli nɛi diɛ, ɲíi kuu kpuɔ lon ŋɛ̨i yee mu? Nu hva pɛli ɉaa pulu mɛ̨nį kaai. |