Ikilisiati 5 - Yálá laawoo hɛɓɛ (dc)

¹ 'Hvó hvaa ɉą, 'hvó ə́ laa mąąhulɔ ə́ woo kwɛlɛi Yálá ɓa; Mąąhɔlɔɓo, Yálá kaa yələi, ɛlɛɛ, yɛ́n ə́ ɓo ɓɛ lɔi mɛ̨i. Yili mąą mɛ̨nį ɓa, Mąąnɛ̨ɛ̨ ə́ hvaa a bɛliɛ mą.

² Mąąhɔlɔɓo, nu a kɛi hvaa tamąą, a da ɓo, yii hvo giliŋąhiɛ li mą, ɛlɛɛ, bələi lɔ, liihɛlɛn a kɛnɛ̨ la nu ɓa, bələ lɔ ɓə ya hįi ɲɔ̨nwɔ̨ɔ̨ɠaa kaa la.

³ Nu yá ə́ woo kwɛlɛ Yálá ɓa, ə́ mąąhulɔ ə́ bɔ mɛ̨nį kɛ. Mąąhɔlɔɓo, kilikpɛɛgwəi mun nwɛli hvo Yálá ɓa. Yili ɓa, yii yá naa kwɛlɛnmo Yálá ɓa, ə kili lɛɛ ɉu, ə́ bɔ mɛ̨nį kɛ.

⁴ Yii viɛlaɓoɔ ya ɓaa: Nu hvo mun nwoo kwɛlɛ, ə tɛɛ, ə́ woo kwɛlɛɛ ɓa, hvá bɔ mɛ̨nį kɛ.

⁵ Wooi a ə́ kɛ a hon mąąmun, yili mąąlaa. 'Hvó kɛ Yálá nwɔ tímun ma: «Və́ gíliŋąhiɛ gɛ́ mo», 'hvó pa gɛ, Yálá hvo niiɲąnwąną, hvo ə́ kɛ mɛ̨nįɠaa hukala.

⁶ Gwa hįi tamąą kaa, gwa hvaa tamąą nwun və mą, Kɛlaa, kilimąą mun, ə́ wɛi, ɲɔw Yálá ɓa.

Tɔɔlaa nwɔ heemɛ̨ilaa kɛɛ a dɛɛ gɛi ɓa

⁷ Akɛ ya mąąwɛlimun gaa lɔi diɛ naanɔ̨nwɔ̨ ɓo, diɛ tələnmolaa da mɛ̨nį haŋąą ɓɛlɛkpɛɛ mą, yili hvo ə́ kwəi pili yɛ́. Mąąhɔlɔɓo, nu kɛnɛ̨ ta kaa nu kɛnɛ̨i tii nwun mɛ̨i, yɛ mąąkɔ̨nwɔ̨; gəlee hveelɛi nwun mɛ̨i, nu kɛnɛ̨ takpɛli kaa laa.

⁸ Yii viɛlaɓoɔ lɔi nuą diɛ, ya ɓaa: tɔɔmun da ə kɛ di yəi, yɛ tíi yɛa kóló ɓɛlɛ kɛ mą. Mąąhɔlɔɓo, yɛa kóló ɓə tɔɔmun gɔ̨nɔ̨n a kulɔ ɉu.

Hɛn gɔw nąmulaa kaa a kpɛli-kpɛli mɛ̨nį

⁹ Nui wali wɛlikaamą, hva pilɛ wali hu. Ɛlɛɛ, nui hɛn gɔw wɛlikaamą, hva dɔlɔ kulɔ. Yili kaa nwɔ̨nɔ̨ a kpɛli-kpɛli mɛ̨nį.

¹⁰ Nu nwɔ hɛn gɔw hu a kɛnɛ̨ lɔ, mįi nuą diɛ tamą. Tɔlɔ lə kɛɛ kpɔ ɓə gaa yili hu, akɛ, ɉɛn gɔwi tii ɲəi, ɲɛ̨i gaa dɔɔi mą yaa lɔ hvəi?

¹¹ Kóló kɛmun a yíi nɛ̨ɛ̨ ɓo; kɔ̨nɔ̨n ə ma kɛ ɲəi tiikpə, ə mą kɛ ɲəi kɛnɛ̨. Kɛlaa, hɛn gɔw nąmu nwɔ hɛn gɔwi hu a kɛnɛ̨, hva yíi.

¹² Ŋą́ mɛ̨nį mąąwɛliɛ ta kaa ɓɛ yələkɔlɔn mu, ya ɓaa: Nu ta ə nwɔ wali laaikɛ, gbaan mɛ̨nįɠaa tɔwɔ,

¹³ Kɛlaa, nwɔ hɛn gɔwi tii hu ə kala mɛ̨nį walawala ta hu. Ɓɛlɔwai ə lon ɉulɔnu hɔlɔɓo la, hɛn da hvo kɛa kɛ ɲəi.

¹⁴ Bələi lɔ tii nee ə gaa la, a gbuwulu, bələ lɔ ɓə ə həɠə la lɔi mɛ̨i, hɛn da hva lɛɛ ɲəi. Gɛ kólóɠaai ə kɛi gɛ, hva dɔlɔ kulɔ, Mąąhɔlɔɓo, hɛn da hva lɛɛ ɲəi yɛ bulu pənə la.

¹⁵ Yili kaa a mɛ̨nį ŋąąnwąnąą kɛnɛ̨ɛ, mąąhɔlɔɓo, ə həɠə lɔi mɛ̨i yɛ bələi lɔ ə paa la. Tɔlɔ lə kɛɛ kpɔ ɓə ə ɉɔlɔɓo? Gɛ kóló ə tɛɛ lɔ yɛ hvaŋą.

¹⁶ Yili pulu, nwɔ yɛnɛ̨ɛ̨ kəlee hu, ɲɔw mɛ̨nį tamąą, líiholi da laanɔ̨nwɔ̨, di nwɔ kɛ yɛnɛ̨ɛ̨ hu kpinį.

¹⁷ Yii lɔ kɛa ŋą́ gaa a ŋąąkpɛɛi, ya ka: Yii viɛlaɓoɔi nu lonnii mąą mɛ̨nį ɓa, ya ɓaa: Nu nwɔ kɛ yɛnɛ̨ɛ̨ hu, ə naa mįi, ə gbələ, ə gɛ kóló ɲąąnɛ̨ɛ̨ kulɔ ɲɛnɛ̨ɛ̨ ŋɛ̨i Yálá ə dɛɛ bɔ ɉu; yili lɔ ɓə gaa a nu nwɔɔ nąą.

¹⁸ Yili pulu, Yálá a hɛn gɔw da yee la hvólón dɛɛ nu pɔ, mąą nu yɛ pɛli gɛ kóló dɔlɔ kulɔi, yili kaa a Yálá yəi mɛ̨inɛ̨ɛ̨.

¹⁹ Mɛ̨inɛ̨ɛ̨ tii Yálá a gɛ mąą nu ɓa, yɛ ɲąąnɛ̨ɛ̨ kulɔ, a lɛ̨ą, hva kɛa giliŋąhiɛ, yɛ kɛ: Ɲíi hvóló hu kpuaai.