Ikilisiati 4 - Yálá laawoo hɛɓɛ (dc)

Mɛ̨nį kpəlaan ŋąąi a kɛ kɛi yɛnɛ̨ɛ̨

¹ Mɛ̨nį nwɔ̨nɔ̨i ŋą́ gaa yələkɔlɔn mu, kɛɛnąą tamąą ɓa, ya ka, ya ɓaa: Mɛ̨nį kpəlaan ŋąąi nuą da gɛ lɔi mɛ̨i. Nuą da kɛ mɔ̨nɔ̨ laai di ɓɛlaa mɛ̨i, yiliɠaai diɛ wɔlɔ di yəi, Kɛlaa, nu hva hɔlɔɓo hvo di mąą kpɔmąą ɓo. Ɉeemɛ̨i nuą tii ɓə huwalawala kaa di yəi, diɛ pɛli kpɔmąą kɛi, Kɛlaa, di tɔ̨nɔ̨ kpɛli hva kpɔmąą tɛɛ mɔ̨nɔ̨ mįi nuą tii pɔ.

² Yii ŋį́ gaa yili hu, ya ɓaa: Nuąi daa haa, di nwun na nɛ̨ɛ̨i ə tɛɛ nu hvulúɠaa diɛ.

³ Lon di hvo ni gaa li, nwun na nɛ̨ɛ̨i, ə tɛɛ la nu heei hveelɛi tii ɓa. Mąąhɔlɔɓo, lon di hvo ni gaa li, mɛ̨nį kpəlaan ŋąąi kɛi ɓɛ lɔi mɛ̨i, hvo nąą kaa li.

⁴ Ŋą́ą́ nwɔ̨nɔ̨ mɛ̨nį takpɛli kaa, ya ɓaa: Mɔ̨nɔ̨i nuą da mįi di kɛ kóló hu, gaa a tolo kulaa, ə gɛ, yii gaa gɛi, ə lɛlɛɛ ə tɛɛ mɛlaa di wɛi ɓa. Yili kaa a kpɛli-kpɛli mɛ̨nį, yɛ nu aa kɛi hvaŋą tənən dɔɔ.

⁵ A tɛ̨ą, kilikpɛɛgwəi mun a hee, ə ɲee pili gee hui, yaa lɔ ɓə pulu a baa.

⁶ Kɛlaa, viɛlaɓoɔi nu ə́ ə́ hvįitɔɔ, ə tɛɛ la nu woɓə yaliɛ kóló gbɛli hu ɓa, yii nwun və mą.

⁷ Ŋą́ mɛ̨nį takpɛli kaa nwɔ̨nɔ̨ lɔi mɛ̨i, yii a nu kwəi pili mą, ya ɓaa:

⁸ Nu ta a kɛ laa, veelɛ hvo mą, yaa tɔ̨nɔ̨ lɔ ɓə nwɛi hu yɛnɛ̨ɛ̨; ɉiɛ gee pulu hvo mą, gaayɔwɔ hvə mą, ɛlɛɛ, lon və kpɛli mą. Kɛlaa, hva kpɛla kóló kɛɛ ɓa, yɛ mɔ̨nɔ̨ mįi, hvóló kəlee gaa lɔ hɛn gɔw gwɛliɛ hu; bələi mąn a góló himąi tii kɛ la, hva ɲąąnɛ̨ɛ̨ kulɔ ɉɛn gaa gwɛlii ɉu, yɛ kɛ gbɔwɔ ɓa: Akɛti, gbɛɛ kpɔ ɓə gáá ɉɛn ŋɛ̨i kwɛlii ma-oo?. Yili kaa nwɔ̨nɔ̨ a mɛ̨nįi a nu kwəi pili mą, ɛlɛɛ, nu nwɔ yɛnɛ̨ɛ̨ kɛ pələ a kɛ tii, yili ɲąąnwąnąąi.

⁹ Nu hveelɛ yee a kɛ a nɔɔ gee hu, da kɛ di nɛ̨ɛ̨ hu ə tɛɛ la nu kɛɛ dɔ̨nɔ̨ kan ɉu ɓa. Nu hveelɛi tii di yee a tɛɛ di kɛ kóló ɓa.

¹⁰ Di nu hveelɛi, nu tɔ̨nɔ̨ a too, mɛlan a muhəɠə. Kɛlaa, nu a kɛ dɔ̨nɔ̨ kan ɉu, mąąwɛliɛi. Mąąhɔlɔɓo, a too, nu hvə ɲəi ə muhəɠə.

¹¹ Bələ lɔ ɓə gaa la, nu hveelɛ da laa kpin dɔ̨nɔ̨ ŋą, di kɔ́lɔ hulɔ a gee hon. Kɛlaa, nu tɔ̨nɔ̨ a laa kpin ŋą, kwɛlɛ a gɛ.

¹² Huwalawala mun dɔ̨nɔ̨ a kɔ́ pɛlɛ nu hveelɛ ɓa, di yee kulɔ laa walaai ə tɛɛ, nu tɔ̨nɔ̨ ɓa. Ɛlɛɛ, yɛli a kɛ gee pɔ haaɓa, ɉu hva tee ɉa.

¹³ Hulɔnon gilimąąi nuą ɲɛ̨i tɛɠɛɓoɔ ɉu viɛlaɓoɔi ə tɛɛ, tɔɔmun ɉulɔgolo ɓa, yai gili hvo ɲəi, ɛlɛɛ, hvo nwɔ̨nɔ̨ bɔ di hvo niɛwoo kɛ.

¹⁴ Mąąhɔlɔɓo, ɉulɔnon tii a pɛli kulɔi gaho pɛlɛ́ mu ə kɛ a tɔɔmun, a wala kɛ tii, ə kɛ a yeehvowolomun nwɔ tɔɔlaai gaa pai gɛi ɉu.

¹⁵ Ŋą́ gaa yələkɔlɔn mu ɓɛ, nuą diɛ kpuluun diɛ lɛɠɛ ɉulɔnon ŋɛ̨i pai heei a tɔɔmun bɔɔyɔwɔi mą.

¹⁶ Nu kpulu kɛnɛ̨ ɓə ə kɛ di nwun na. Kɛlaa, ə mą kɛ tii, həɠə gee pɔ yii gaa pulu yɛ pa, di hvo pai di kwəinɛ̨ɛ̨i mąą mɛ̨nį hu. Mąąhɔlɔɓo, mɛ̨nįɠaa tii kaa lɔ a kpɛli-kpɛli mɛ̨nį, yɛ nu a kɛi hvaŋą tənən dɔɔ.

'Hvó hvaa tamąą Yálá ɲɛ̨i ɓa

¹⁷ Gbɛa ə́ kiliŋąhiɛ, yɛ́ təɠa lɔ Yálá yəi bɛlɛn. Ya lɔ Yálá yəi bɛlɛn, ə́ wəli tɔɔ kiliŋąhiɛ ə́ kɛ yɛ́, yɛ́ lɔ la, yili hviɛlaɓoɔi ə tɛɛ Yálá kɔ́ɔ ɲəi bɛlɛn a kilikpɛɛgwəi ɓa, yɛ bələi kilikpɛɛgwəi nuą da gɛ la, di hvo gɔlɔn diɛ kɛ a kɛ tii, di kaa mɛ̨nį ɲɔ̨n gɛi.