Ikilisiati 12 - Yálá laawoo hɛɓɛ (dc)

Pɔlɔ da haa

¹ Yɛ́i ŋɛ̨i a nunwunu! Ə́ nwunu yələi tii, 'hvó lɛ̨ą ə́ pɛli Yálá ɓa. Gɛɛ ə́ pɔlɔ yələ hvo kɛ həli mą, gɛɛ hvó pa kɛ diɛ: «Yɛnɛ̨ɛ̨ kun aa hee ɉú!» Ə́ kili lɛɛ ə́ pɛli Yálá hu.

² Mąą yələ, gɛɛ hvitili hvo kɛ pui, kɛɛ yɛ kpinį; Tulɔ kpinįn yɛ hiɛ ɲąnįn da pɛmɛ̨lɛ̨n-gɔwɠaa ɲɛ̨i; tulɔ yɛ dɛ.

³ A ɲələ tii, ə́ mąąkpɛ nuą hu a haa la, di mąą yɛ kpɛlin. Gbakoloɠaa hu yɛ haa, diɛ yɛɛ pulu. Gwənąi hiɠɛ nɛ̨ąą hvįi yɛ kpɛɛ mąąhɔlɔɓo, di ɓɛlaa daa kulɔ di pɔ. Ɓɛlɔwai, kwɛala kaa da nɛlɛɛ kaa, di hu kaa tɛɠii la.

⁴ A ɲələi tii, gbon hveelɛi laa kaa pɛlɛi la mą, kwənai hiɠɛ tin gɔlɔ yɛ haa mą, nwɛ̨ni hvaa woo yɛ kpɛɛ, wələ woo yɛ kpɛɛ;

⁵ Akɛtii yɛ́ ɲɔw kɛɛ ną laa tumunn ŋąą hiɛ ɓoi, yɛ́ ɲɔw pələ pɔ, a ɲələi tii, ɲéé a kwələ la nwulu ɲą, ponįn aa kpɛɛ a ɲąnįn buɔ ə wuɛ, wɛli mɛ̨nį hva kɛa wɛli lii muhəɠə, ə mą kɛ aa wulaa lɔpee mį́i, kɔ̨nɔ̨n mąą kun-nɛ̨ɛ̨ hva kɛa kɔ̨nɔ̨n nwɛli too yɛ́, mąąhɔlɔɓo, hiɛi ɲali bulu hvo mą, nu aa tɔɔ bələ nwun na; wɔlɔlulu yɛ kpɛlaan gwɛlɛ nuą líi pɔ.

⁶ Gɛɛ ɲɛli mąąwia ŋɛ̨i hvo tee, ɉɛni kpələ kɔ́wɔ hvo wolo, gɛɛ ɲaləɠi hvo wolo ɲá haɠai, gɛɛ ɲá kulɔ hvo ɲɛli tee hvo too nɔwa hu;

⁷ Gɛɛ pɔlɔ hvo pu pɔlɔ ɓa ɓɛi ə həɠə laa, nɔ̨ɔ̨ ə tɛ Yálá pɔ yaai doo ɉu.

⁸ Kilimąą mun yɛ diɛ: kpɛli-kpɛli mɛ̨nį da kpɛli-kpɛli mɛ̨nį, mɛ̨nį kəlee kaa a kpɛli-kpɛli.

Ɉɛɓɛ́ nwoo laa kulɔi ka

⁹ Mąąnɛ̨ɛ̨ nuą di gɔlɔn diɛ kɛ: Kilimąą mun hvo kɛ kpɛla li mɛ̨nį lɛɛ ɓa nuą diɛ a nwɔ kili mɛ̨nį. Ə hanwon damąą mąn, ə mąąkpɛɛ, ə ɉukpɛɛ, ə dɔlɔ kaa yɛ ɉɔɔ nwɔ nuą diɛ.

¹⁰ Kilimąą mun ə gɛ pələ kwɛli kpɔ mą, ə mɛ̨nįɠaai mɛ̨n ŋąą ɲąąnɛ̨ɛ̨, ə di kiliin, yiiɠaai viɛlaɓoɔ, ə nɛ a tɛ̨ą.

¹¹ Kilimąą nuą woo kaa yɛ hɛ́pɛlɛ, a yali nu lii ɓa, ə nu kili nwun. Kilimąą nuą woo a nu kili lɛɛ mɛ̨nį kɔ́lɔn mɛ̨nįɠaa hu. Kilimąą nuą woo a həɠə Yálá tanɔ̨n gbən mə bɔ, yai a nu tənən dɔɔ a tɛ̨ą.

¹² Nón, hvo kɛ ə kaa mɛ̨nį ŋɛ̨i ta pɛlɛi mą. Da pɛli kɛ di hɛɓɛ́ yili tamąą pɛ̨ɛ̨, Kɛlaa, a tamą tii, gəlee hu mɛ̨nį mąąkwɛliɛ a hvaŋą kpɛɛ ə́ yə́i.

¹³ Mɛ̨nįɠaa kpɔ ɓo ɉɛɓɛ́i ŋɛ̨i hu, nwoo laa kulɔ ka: Yii mąąnɛ̨ɛ̨ nu lonnii di gɛ, ya ɓaa: Di Yálá mąąwiɛ, di nwɔ tɔn nwooɠaa pɔ mɛ̨nį kɛ, a lɛɛ nwoo mulaa. Mąąhɔlɔɓo, yili ɓə bɛliɛi nu lonnii diɛ.

¹⁴ Yálá kaa tínąą nu kəlee da di kwɛlanmo Yálá ɓa; yii kpɔ hvilɛn na nu kɛ mɛ̨nįɠaa diɛ, ə kɛ a nɛlɛɛ, ə kɛ a ɲɔ̨nwɔ̨ɔ̨, ə mą kɛ, yiiɠaai di gɛ loo hu, da tínąą gəlee gwɛlanmo kɛ Yálá ɓa.