Ikilisiati 11 - Yálá laawoo hɛɓɛ (dc)Ɲɔw kɛnɛ̨ a mɛ̨nį pɛlɛ nu ɓa 1 Ə́ kɔ̨nɔ̨n gulɔ ə́ la, ə́ bili yɛa, ə́ hee, yələ ta, ɉu a kɛnɛ̨ yɛ pa ə́ pɔ. 2 Ə́ yəi hɛn gɔw lɔ mɛ̨nį tamąą hu, mąąhɔlɔɓo, ɓɛlɔwai kpaan mɛ̨nį kaa pai həli la lɔi mɛ̨i, hvó ɲələ kɔ́lɔn. 3 Tulɔ kpinįn ɲa a kɛ mą, ya ɓə a tulɔ pu. Wulu a too, ə too ɉɛgɛɛ pələ, ə too yánwuɔ̨ pələ, yii mą a tɛ̨ą, ya ɓaa: ɓɛi kɛa a laa la, hva kɛa tinɛ̨n gbɔwɔ ɓa. 4 Nu a ɲɔw yɛ kɛ diɛ: «Gwɛlan ŋɛ̨i ɓa, tulɔ mɛ̨nį kaa ləi ŋɛ̨i-o?» A wala kɛ tii, «Vaŋą tɛɛ pələ kaa ləi ŋɛ̨i?» Mąą nu hva hihɛn ɉi, yaan hva hihɛn da ma hɔlɔɓo. 5 Bələi nu a kɛ la a nu hvulú nɛ̨ɛ̨nu kwəi; hvó bələ kɔ́lɔn. Yálái hɛn gəlee pɛli, nu hva pɛli mą nwɔ̨nɔ̨ gɛ mɛ̨nįɠaa kpaɠala kaa. 6 Yili ɓa, 'humó a ə́ wɔ hihɛn ɉiɛ, ə həɠə yələ wala pɔ ɓa, ə həli la yələ wulii ɓa, hvo kpɛla mą. Mąąhɔlɔɓo, ə́ kɛ kólóɠaai tii lɔwai, yii pai kɛi a nɛlɛɛ hvo gɔlɔn, ɛlɛɛ, akɛ gəlee ɓə tɔ̨nɔ̨ kaa pai kɛi ɉu, hvó gɔlɔn. 7 Yələ ɓɔɔ kɛɛ pɔ̨nɔ̨ ɲąąnɛ̨ɛ̨i, ɛlɛɛ, nu kɛɛ a vulú ɲąąnɛ̨ɛ̨. 8 Gwɛlanŋąąi Yálá aa dɛɛ nu lonnii pɔ, mąąnɛ̨ɛ̨ dɛitɛi kəlee həli pələ, di di kwəinɛ̨ɛ̨; ə mą kɛ, daa kwɛlan damąą kɛ. Kɛlaa, mąąnɛ̨ɛ̨ di di kili lɛɛ ɉu, diɛ kɛ: kpinį nwɔ hvóló tamąąi kɛɛ pɔ̨nɔ̨ɔ̨ ɓa. Mąąhɔlɔɓo, tínąą hva nu kilaa pɔ̨nɔ̨. Ka gu gu wɔ yɛnɛ̨ɛ̨ ɲąąnɛ̨ɛ̨ kulɔ, gu gu kpɔwɔ hu hon 9 Yɛ́i a nunwunu, ə́ wɔ nunwunulaa ɲąąnɛ̨ɛ̨ kulɔ, ə́ ɲąąnɛ̨ɛ̨ kulɔ nąąlɔwai. Yii kpɔ a nɛ̨ɛ̨ yɛ́, gɛ. Yii yá gaa a nɛlɛɛ, yili kɛ. Kɛlaa, ə́ kili lɛɛ ɉu a nɛlɛɛ, yɛ́ kɛ: Yálá kaa pai ə́ kɛ mɛ̨nįɠaa tii kəlee kiti teei. 10 Mɛ̨nįi kpɔ a liihɛlɛn doo nu ɓa, da ɲɔw mɛ̨nįɠaa, yiliɠaa kəlee mąą kwɛa yɛ́; mąąhɔlɔɓo, nunwunulaa, da nwɔ kpakololaa, di kaa a kpɛli-kpɛli mɛ̨nį. |