Hebreu 9 - Yálá laawoo hɛɓɛ (dc)

Kwɛli hvilɛn bələ nįnɛ̨, da bɔlɔ

¹ Mįnɛ̨ pɔlɔi ti yaa kpɛlimąn, kpaaləɠaa di kɛ ɉu, vilɛnŋąą kwɛli hvilɛn bələ ɓa, da nwɔ Yálá hee pɛlɛ́, yai kɛ ɓɛ lɔi mɛ̨i.

² Di həɠə pɛlɛ́ ta tɔɔ, yɛ ɓo ɉu hveelɛ, bələ tɔ̨nɔ̨ laa ɓa kɛ a: Gɛɛnąą mąąhəɠɛɛ. Nąą ɓə, nwulɔ nwɔ̨n ɉeɛ kɛ laa, da Yálá kɔ́ lɛɠɛ laa hɛn.

³ A həɠə laa, ɉəɠə ɓɛla veelɛnąą pulu pələ, haláá kulɔi ə kɛ laa, diɛ kɛ mą: Gɛɛnąą mąąhəɠɛɛ kpɔ tɛakpa-tɛakpa.

⁴ Nąą ɓə lansan kələn ə kɛ laa a hɛni, ɛlɛɛ, mįnɛ̨ kon yɛ ɓo laa mɛ̨ikpulɔɔ a hɛni. Gon ti hu, hɛn ɲąŋą ə kɛ laa, manə yɛ ɓo ɉu, ə mą kɛ, Aarɔn nwɔ tunwɔ̨n kɛ ɲəi, yai powa; da mįnɛ̨ gwɛni ɓɛlaɠaa.

⁵ Mįnɛ̨-kon ti mɛ̨i, mąąkpɛ malaka mąą nįnįnŋaa di kɛ laa, yɛ Yálá mąąwiɛ pələ lɛ, di koon ɉɛlɛnŋąąi ɓɛi da kɛ nɛ̨ŋɛ̨n mąąhvaalɛɛ haláá kulɔi laa. Kɛlaa, mɛ̨nįɠaa ti hukulɔi lɔwai hvəə ni.

⁶ Yɛ bələi mɛ̨nįɠaa hee pələ ə kɛ la ti, yələ ɓɔ pələ tɛitɛi, ɉaláá laa həli nuą kpɛa-kpɛaa di kɛli lɔ bɛlɛ́ dɔlɔɔ mu, diɛ di kɛ kólo kɛ.

⁷ Kɛlaa, bɛlɛ́ veelɛnąą mu nwɛi, ɉaláá laa həli mun gɛnɛ̨, a lɔ laa, taanɔ̨n gbən yaa tɔ̨nɔ̨, kwɛlan mą; ɛlɛɛ, a kɛi lɔ laa, a lɔ a huwɔ ɲąmą, ə gulɔ a haláá, gbɔwɔ mąą mɛ̨nį ɓa, da nɛ̨ŋɛ̨n nwɔ lɔi nuą hu di ɉəɠə, di mąą mɛ̨nį ɓa.

⁸ Kili-Mąąhəɠɛɛ ə kɛi nɛ tii, yɛ kɛ, bələi a lɔ ɉəɠə pɛlɛ́ mu, hvo ni too li pono ɲą, yii kpɔ dɔlɔɔ tii kaa ni ɓɛ.

⁹ Ɉəɠə pɛlɛ́ tɔlɔɔ ti ə kɛ a háákələi nwɛi, mąąnįnįn, bɛlɛ́ dɔlɔɔ tii, di kɛli, Yálá kɔ hɛnŋaa da haláá hɛnŋaa laa həli mu, yili hvo pɛli li, nui gwɛli hvilɛn ɉii, ŋą nɛ̨ŋɛ̨nŋaa nwaai kpɔ tɛ̨ɛ̨tɛ̨ɛ̨?.

¹⁰ Kɛlaa, yiliɠaai kɔwɔ hvilɛnŋąąi lɔ kɛ, laa mįi mə̨nį, da kpələ hɛn mɛ̨nį, da nu mąą waa pələɠaa diɛ, dɔ́nŋaa tii di kɛ lɔ a ɲɛ̨i kɛ mąą, ə lɛɛ ɉu, ɲələ leelee yɛ həli mą.

¹¹ Kɛlaa, Kristə ə pa ə kɛ a ɉaláá laa həli mun gɛnɛ̨, mɛ̨inɛ̨ɛ̨ɠaai gaa pai, di mąą mɛ̨nį ɓa. Ɉəɠə pɛlɛ́i gaa nwɔ tíɓo kɛi mu, gɛnɛ̨i, mąą mɛ̨nį pɛliɛ ɉu kpɔ hvɛɛ-hvɛɛ, hvo a nu kan ɲee pɔɔ, mukulaa ɓaa, hvo a ɲɛnɛ̨ɛ̨ ŋɛ̨i hu mɛ̨nį,

¹² ɛlɛɛ, lɔi ə mo laa, hvo lɔ li a, ɓolu ɲąmą, hvo lɔ li a nįnɛ̨ ɲąmą, ə lɔ laa, a gbɔwɔ ɲąmą, lɔ taanɔ̨n gbən, ɛlɛɛ, ə nu kanŋaa nwun mąąɓo mɛ̨nį tɛ̨ɛ̨tɛ̨ɛ̨ mąąlaa hɔlɔɓo.

¹³ Mąąhɔlɔɓo, akɛ, ɓolu ɲąmą, niŋɛ̨ hilɛ ɲąmą, ɛlɛɛ, da niŋɛ̨ haa kələn nuwui ti di kɛi daɠa nuąi di mąą hvo həɠə li diɛ, ə kɛli di kɔ́lɔ ɓa mąąhəɠə;

¹⁴ gu hvomun kɛ, Kristə ɲąmą, yai viɛlaɓoɔi kpɔ kɛnɛ̨ dɛɛ yili ɓa; hvo gaai Kili-Mąąhəɠɛɛi gaa lɔ laa ɉáálai, Kristə ə gbɔwɔ kulɔ Yálá ɓa a haláá, kiliin ɉii ɲɔ̨nwɔ̨ɔ̨ ta hvo mą, mąąhəɠɛɛ, hvo mɔ̨ɔ̨ pai haa nɛ̨ŋɛ̨n nwaai guɔ, gu tí mɛ̨nį ɓa Yálá hvulúmąą ɓa,

¹⁵ yili ɓə gɛ, gaa a mįnɛ̨ nįnɛ̨ laamun, a mįnɛ̨ nįnɛ̨ hukɔw. Ə haa, əgɛ, ə nu kanŋaa nwun mąąɓo di wɔɔ nɛ̨ŋɛ̨nŋaa yəi, yai di ɉəɠə mįnɛ̨ tɔlɔɔ tii yee mu; yili pɔ pələ ɓə, nuąi Yálá aa di təli, da pɛlimą kɛa, mɛ̨nį nɛ̨ɛ̨ɠaa naakwɛlanmoɔ, di ɉɔlɔɓo a yələ kəlee mɛ̨nį.

¹⁶ Mąąhɔlɔɓo, nu a vɛli, hvo kɛli nui tii vɛli, di ɉaa mɛ̨nį ɓo.

¹⁷ Yaan, nui tii vɛli, a kɛ ni a vulú, vɛli woo ti ɓɛlɛ hva ni kɛ mą. Kɛlaa, a haa, vɛli woo ɓɛlɛ a kɛ mą.

¹⁸ Bələ lɔ ɓə gaa la, mįnɛ̨ pɔlɔi ti hva kɛ pɛli kɛi a mɛ̨nį walawala, akɛ ɲąmą hvo pu li.

¹⁹ Ɓɛlɔwai Moisə ə díɓoɠaa tɛɛ la nɔi lonnii pɔ, yɛ bələi dɔn ə mąą liɛwoo kɛ la, ə nɛ̨ŋɛ̨ lon ɲąmą da ɓolu ɲąmą həɠə, ə bɛlɛ yá ɓa, hə́ɠə ɓɛla kwɛlɛɛ, da ɲįnwų-ɲįnwųn, ɛlɛɛ, ə da taɠa ɉɛɓɛ́ kpinįi ɓa, da nɔi lonnii kəlee diɛ,

²⁰ yɛ diɛ: Yii kaa a Yálá ŋą mįnɛ̨i gaa ká diɛni ká lɔwai, ɉu ɲąmą.

²¹ Yili pulu, ə pənə ə ɲąmąi ti ta taɠa ɉəɠə-kələ ɓa, da ɉɛnɲąŋąɠaai di kɛi ɉaláá kulɔ la, mą;

²² ɛlɛɛ, yɛ bələi dɔn ə mo la, ɲąmą ɓə da ɉɛn gəlee mąąhəɠə la, ɛlɛɛ akɛ ɲąmą a wala pu, nɛ̨ŋɛ̨n mąąhvaa hva lɛɛ.

²³ Akɛ yələkɔlɔn ɉu hɛnŋaa mąąnįnįn gaa ɓɛ lɔi mɛ̨i, di mąąhəɠɛɛi a mɛ̨nį huwuɠaai tii, gu hvomun kɛ, neeleeɠaai di kaa yələkɔlɔn ɉu, di mąą ə həɠə a haláá hɛn viɛlaɓoɔ.

Kristə tɛ mə̨nį yələi

²⁴ Ɉəɠə pɛlɛ́i nu ə dɔɔ a ɲee ɓɛ lɔi mɛ̨i, yai gaa a neelee mąą nįnįn, mu hvəə Kristə ə lɔ laa, kɛlaa, ə lɔ kpɔ yələkɔlɔn ɉu leelee, əgɛ, yɛ pɛli tɔɔi Yálá liila gu mąą mɛ̨nį ɓa.

²⁵ Ɛlɛɛ, hvo kɛ li li laa gbɔwɔ kulɔ mɛ̨nį a haláá, geemɛ̨i tamąą, yɛ bələi ɉaláá laa həli mun gɛnɛ̨ ə kɛli lɔ la ɉəɠəpɛlɛ́ mu a kwɛlan ɉəli pələ tɛitɛi, a ɲąmą nįnɛ̨.

²⁶ Akɛ yili ɉuwu ɓə kɛ, Kristə ə li gbɔwɔ kulɔ a haláá geemɛ̨i tamąą, ə həɠə kpɔ yɛnɛ̨ɛ̨ kɔwɔ tɔɔ yələ ɓa. Kɛlaa, a tɛ̨ą. Ə gɛ lɔ taanɔ̨n gbən, a vóló ɲąąkpɛɛi yələi ŋɛ̨i, ə too la pono ɲą, ə nɛ̨ŋɛ̨nŋaa waa, a gbɔwɔ kulɔi ə mo a haláá.

²⁷ Yɛ bələi gaa la, nu kanŋaa da haa lɔ tanɔ̨n gbən, yili pulu, kitii yɛ di mąąkpɔn.

²⁸ Pələ lɔ ɓə ə kɛ la, Kristə yaa kpɛlimąn, ə gbɔwɔ kulɔ a haláá taanɔ̨n gbən, ə nu tamąą di wɔɔ nɛ̨ŋɛ̨nŋaa kulɔ diɛ; ɛlɛɛ, gaa lɔ nwɔ̨nɔ̨ pənəi ə pa tii taanɔ̨n a veelɛnąą, yili hvo hvilɛn ni nɛ̨ŋɛ̨n mąą mɛ̨nį ɓa, kɛlaa, gaa pai, nuąi di kaa mąąkpɔn ɉii, di nwun mąąɓo mɛ̨nį ɓa.