Hebreu 7 - Yálá laawoo hɛɓɛ (dc)

Mɛlkisedɛkə, tɔɔmun da ɉaláá laa həli mun

¹ Mɛlkisedɛkə ti ɓə kɛ a, Salɛmə tɔɔmun, a Hɛn Gəlee Mɛ̨imun Yálá ŋą haláá laa həli mun gɛnɛ̨mun, yaa tii ɓə li Abrahamə laakwiɛn ɉii, ɓɛlɔwai yili ə həɠə la gɔ mɛ̨i, yai ə bɛlɛ dɔɔɓɛlaa diɛ; ə lúwɔ́ kɛ laa Abrahamə ɓa.

² Melkisedɛkə ɓə Abrahamə ə ɲəi hɛnŋąa kəlee bow nąą tɛɛ bɔ. Naai tii mą, mukulaa ɓaa: «Tələnmo tɔɔmun», yili pulu, yɛ ɓo a Salɛmə tɔɔmun, mukulaa ɓaa: «Liilaa tɔɔmun».

³ Yaa ti, nąn və mą, nee hvo mą, nu ta hvo ɉuwu həɠəi kɔlɔn, ŋą yɛnɛ̨ɛ̨ gɔwɔ tɔɔi hvo mą, naa kulɔi hvo mą. Kɛlaa gɛ pələ kaa yɛ Yálá lon, yai a ɉaláá laa həli mun a yələ kəlee.

⁴ 'Ká nui ti kɛnɛ̨ pələ kaa, a yai Abrahamə ə ŋą kɔ-hon bɔw nąą nɛlɛɛmun dɛɛ bɔ, a yai mun ti a gu kalaɓɔlɔi.

⁵ Ya pa, Levi nu huwui ɉaláá mɛ̨nį kaa di nwuɔ̨, yɛ bələi dɔn ə mąąlaa tɛɛ la di pɔ, diɛ ɉɛn bɔw nąą hon Israɛlə lonni yəi, a diɛi a di kaayɔwɔɠaa, di kəlee di kaa a Abrahamə lonnii.

⁶ Kɛlaa, Melkisedɛkə hvo kɛ a Levi nu huwu ta, ə hɛn bɔwnąą hon Abrahamə yəi. Ɛlɛɛ, ə tinɛ̨n, ə lúwɔ́ kɛ nui mɛ̨nį laakwɛlanmoɔ ə kɛ a nwɔɔ, mą.

⁷ Yaan, hɛa hvo ɉu, nu kɛnɛ̨ ɓə a lúwɔ́ kɛ lokolo ɓa.

⁸ Yii ŋɛ̨i yaan, nuąi da ɉɛn bɔw nąą hon, di kaa a nu kanŋaai haa kaa diɛ, kɛlaa, nui di mąą mɛ̨nį ɓoi, gaa a vúlúmąą haa hvo mą.

⁹ Ɛlɛɛ, gwa mɛ̨nį kəlee ɓo kpɔ tii Abrahamə ŋą nu kɔlɔ hu pələi, Levi kpɛlimąn tii kɛi ɉɛn bɔw nąą hon, di dɔn tii laa lɔ di mɛ̨i diɛ gulɔ.

¹⁰ Mąąhɔlɔɓo, ə kɛ galaɓɔ́lɔ hu, ɓɛlɔwai Mɛlkisedɛkə ə pa naakwiɛn ɉii la.

Ɉaláá laa həli mun gɛnɛ̨ yɛ Mɛlkisedɛkə

¹¹ Ə li kɛ, ɉaláá mɛ̨nįi kɛ naa Levi nu huwu nwuɔ̨, ə pɛli mɛ̨nį kəlee laa kulɔi kɛi, hvo gaai, ya ɓə kɛ giti mɛ̨nį kəlee kɔwɔ hvilɛnŋąąi kɛ mɛ̨i nuą yəi; di li tɔɔ pələ kɛ ləi, diɛ haláá laa həli mun dakpɛli mɛ̨nį ɓo, yɛ kɛ yɛ Mɛlkisedɛkə, kɛlɛi di li lɔ kɛ mą, yɛ: Aarɔn?

¹² Mąąhɔlɔɓo, ɉaláá laa həliɛ mąą a hvalin nɔ, hvo kɛli di dɔ́n yaa kpɛlimąn mąąhvalin.

¹³ Ɛlɛɛ, nui di mąą mɛ̨nį ɓo, yai ɉɛɓɛ́ ə kɛli vaa ɓo, di hvo ɉuwu ta laa ɓo li ɉaláa kulɔ nu huwu hu.

¹⁴ Gaa a mɛ̨nįi nu kəlee di gɔlɔn, diɛ, gu Ną́mu ə kulɔ Ɉuda huwu hu, a huwui Moisə hvo mɛ̨nį ta ɓo, naa mɛ̨i, ŋą hɛɓɛ́ɠaai hu yɛ hvilɛn na, ɉaláá laa həli nuą kpɛa-kpɛaa ɓa.

¹⁵ Mɛ̨nįi ŋɛ̨i ɓə a pɛli mɛ̨nįɠaa ti hu ponoi kpɔ kɛnɛ̨, ya ɓaa: ɉaláá laa həli mun dakpɛli aa kulɔ, yai gaa yɛ Mɛlkisedɛkə;

¹⁶ ɛlɛɛ, hvo kɛ a ɉaláá laa həli mun gɛnɛ̨ɛ̨, a kulɔ nu ta huwu hu, kɛlaa ə kɛ a ɉaláá laa həli mun gɛnɛ̨ɛ̨i, huwalawala yɛnɛ̨ɛ̨i kala hvo mą, ɉáálai.

¹⁷ Gaa kpɔ tii a tɛ̨ą, ɉɛɓɛ́ mąąhəɠɛɛ a mo kpɔ tii, yɛ kɛ: «Ə́ kaa a ɉaláá laa həli mun a yələ kəlee da nwɔɔ, yɛ Mɛlkisedɛkə.»

¹⁸ Yili ɓa, dɔ́n ŋɛ̨i kɛ laai, ɲɛ̨i aa paa. Mąąhɔlɔɓo, vaŋą hvo kɛ ɉu, ɛlɛɛ, viikpɛɛ;

¹⁹ Gbala ə tɔɔ, dɔ́n və pɛli mɛ̨nį kəlee laa kulɔi; kɛlaa kilitɔɔmąą laa hviɛlaɓoɔ aa pa, yaa ɉáálai, gwa pɛli gu gu mąąlɛɠɛ Yálá ɓa.

²⁰ Ɛlɛɛ, yili hva pɛli kɛi, akɛ kwɛla woo hvo ɉu. Gbala ə tɔɔ, akɛ kwɛla mɛ̨nįi hvo kɛ yiiɠaa tii di wɔɔ háálaa laa həli mɛ̨nį hui,

²¹ Jesus nwɛi, kwɛla mɛ̨nį ə kɛ ɉu, gu Nąmu ə gwɛla mąą mɛ̨nį hu, yɛ mą: mɛ̨nįi ŋą́ mo hva ɉəɠəi mą: «Ə́ kaa a ɉaláá laa həli mun, a yələ kəlee mɛ̨nį.»

²² Yili mąą mɛ̨nį ɓa, Jesus ɓə a mįnɛ̨i tii hukɔw.

²³ Yili pulu, nu kanŋaa di wɛi, di kpulu tamąąi kɛ ɉaláá laa həli mɛ̨nį hu; mąąhɔlɔɓo, haa ə kɛ diɛ.

²⁴ Kɛlaa, Jesus nwɛi tii, yɛ bələi haa hvo la mą, gaa a ɉaláá laa həli mun a yələ kəlee mɛ̨nį, nu ta hva mąąhvalin.

²⁵ Ɛlɛɛ, nuąi da di mąąlɛɠɛ Yálá ɓa, yaa ɉáálai, a pɛli mą ə di nwun mąąɓo, gbala ə tɔɔ, yaa tii gaa lɔ laa a yələ kəlee, yɛ di mąą mɛ̨nį laa həli a nɛlɛɛ kɔlɔi.

²⁶ Ɉaláá laa həli mun gɛnɛ̨ɛ̨i bɛliɛi gu mąą mɛ̨nį ɓa, yaa li, yai mąąhəɠɛɛ, hɔn və mą, mąąkwɛaa nɛ̨ŋɛ̨n ma, yɛ ɓo heeni yələkɔlɔn mɛ̨i pələ.

²⁷ Nwɛi hvo yɛ ɉaláá laa həli nuą kpɛa-kpɛaa tɔlɔɔ tii kɛ, a diɛi, yələ ɓɔ pələ kəlee, hvo kɛli di di kpɔwɔ mąą haláá kulɔ, di hvo tɛɠa kɛ pai nɔi nuą mąą haláá kulɔi. Nwɛi ə gbɔwɔ kulɔ lɔ a haláá tanɔ̨n gbən, gu mąą mɛ̨nį ɓa.

²⁸ Dɔ́n nwɛi, ə kɛli, nu kanŋaai di mąą mɛ̨nį laa hvo kulɔ li, di hee a haláá laa həli mun gɛnɛ̨; Yálá kwɛla wooi lɛɛ dɔn nwoo pulu, ə Non ɉulɔnu kɛ a ɉaláá laa həli mun gɛnɛ̨ɛ̨ a yələ kəlee mɛ̨nį, ya ɓə mɛ̨nį kəlee pɔ mɛ̨nį kɛ, ə naa kulɔ kpɔ hva-hva.