Hebreu 5 - Yálá laawoo hɛɓɛ (dc)

Kristə ɉaláá laa həli mun gɛnɛ̨, ɲɛ̨imąąwɛli kaamun

¹ Ɉaláá laa həli mun gɛnɛ̨ɛ̨ lɔpee di kɛi ɉəɠə, da ɉəɠə kɛ nu kanŋaa lɔwai, di ɉee nu kanŋaa mąą mɛ̨nį ɓa, yɛ di mąą mɛ̨nį laa həli Yálá ɓa. Nwɔɔ mąą tíi ɓaa, ə Yálá kɔ hɛn naa həli, ə nɛ̨ŋɛ̨nŋaa mąą haláá kulɔ.

² Ɉaláá laa həli mun gbinįi tii, vįikpɛɛi, a pɛli mą, nuąi di tɛɠii, nuąi da lan di mąą mɛ̨nį kpaɠala kaai,

³ ɛlɛɛ, yili mąą mɛ̨nį ɓa, hvo kɛli, ə gbɔwɔ mąą haláá kulɔ, yɛ bələi a nɔi lonnii mąąhaláá kulɔ la, di wɔ nɛ̨ŋɛ̨nŋaa mąąhvaalɛɛ mɛ̨nį ɓa.

⁴ Nu hva pɛli yili mąąlaa tɛɛi gbɔwɔ pɔ, Yálá ɓə a nu təli mą, yɛ bələi ə kɛ la, a Aarɔn nwɛi.

⁵ Bələ lɔ ɓə ə kɛ la a Kristə nwɛi. Hvo kɛ lɛɛ li lɔ gbɔwɔ ɓa, hvo ɉaláá laa həli mun gɛnɛ̨ɛ̨ ŋą mąąwiɛlaa tɛɛ gbɔwɔ pɔ yaa kpinįi, ə ɉɔlɔɓo nui ŋɛ̨i kɛ mą: «Ə́ kaa a Nón, ɲą́ą́n, háákələi, ŋą́ą́ ə́ kaa a lon», yaa lɔ ɓə;

⁶ nwɔ̨nɔ̨, yɛ hvilɛn na nwoo tii ɓa, yɛ mą: «Ə́ kaa a haláá laa həli mun a yələ kəlee mɛ̨nį, yɛ Mɛlkisedɛkə.»

⁷ Jesus tii ɓə, gɛɛ ɓɛ lɔi mɛ̨i, ə kɛli Yálá hvɛli, yɛ mąąnɛ̨ɛ̨ ɲɛ̨iyá hu, yɛ tomą, nui a pɛli gulɔi haa yəi, bɔ pələ; ɛlɛɛ, nwɔ hvɛliwoo laa ə hon a nwɔ lɛɛ nwoo mu laa.

⁸ Bələi mąn ti ə kɛ la a Yálá lon, ə lɛɛ nwoo mu laa mąąkwɛli ŋą mɔ̨nɔ̨ɠaa hu.

⁹ Ɛlɛɛ, ə pələ kulɔ, ə həli la mąąhəɠə laa ɓa, Kristə ə kɛ kɛa la tii a nuąi da lɛɛ nwoo mu, di ɓalomun a yələ kəlee mɛ̨nį,

¹⁰ a gɛi di mo a ɉaláá laa həli mun gɛnɛ̨ yɛ Mɛlkisedɛkə.

Ka gɛ a nɛlɛɛ ka hvo pa həɠə bələ mɛ̨i

¹¹ Yii hvilɛn na mɛ̨nįɠaa tii diɛ, mɛ̨nįɠaa kaa laa yii mąąnɛ̨ɛ̨ ku mo, kɛlaa ɉukulɔ laa ɓə nwalaa, mąąhɔlɔɓo, ká wɔɔ mɛ̨nį kpaɠala kaa laa aa wala.

¹² Káá wɔlɔ lamun mɛ̨nįi ŋɛ̨i hu, káá ɓə kɛ, mąąnɛ̨ɛ̨i ká kɛ a nuą mąąkwɛli nuą, ya ka káámun káá kɛ a nuą mąąnɛ̨ɛ̨i di di mąąkwɛli tɛɠa, Yálá laa woo hu mɛ̨nį dɔlɔɔɠaa diɛ; káá kɛ kpɔ la tii kɛa yɛ, lɛapɛlɛɛi da ɲįnį tɔɔ di la, di hva pɛli kɔ̨nɔ̨n nwalawala mįi.

¹³ Ɲįnį-kpələ-lon hva pɛli mɛ̨nį haŋąą gulɔ nɔwai kɔln ɉii, mąąhɔlɔɓo, naa kaa ni ɲįnį ɓa.

¹⁴ Kɛlaa, nuąi daa di mąą-nu-laa kpɛɛ, di wɛi, kɔ̨nɔ̨n nwalawala ɓə da mįi; diɛi tii daa tɛɛ yɛnɛ̨ɛ̨ mɛ̨nį tamąą hui, diɛ ɓə mɛ̨nį tamąą hukpɛ kili kaa diɛ, da pɛli di mɛ̨nį lɛlɛɛ da ɲɔ̨nwɔ̨ɔ̨ di kulɔ ɉu kɛ.