Hebreu 3 - Yálá laawoo hɛɓɛ (dc)

Jesus kɛnɛ̨i dɛɛ Moisə ɓa

¹ Yili ɓa tii kani, Kristalɛa mąąhəɠɛɛɠaa, káái Yálá aa ká təli, 'ká ká ɲɛ̨i hee Jesus ɓa, yai a ká wɔɔ laa na laa nwun, a kɛla, da ɉaláá laa həli mun gɛnɛ̨i;

² Yai a kulɔ nwoo ɓa, Yálái ɉee ɲɛ̨i ɓa, yɛ bələi lɔ Moisə ə kɛ la Yálá yəi bɛlɛ́n.

³ Kɛlaa, mąąwiɛlaai Jesus ə ɉɔlɔɓo gɛnɛ̨i dɛɛi Moisə nwɛi ɓa, yɛ bələi lɔ pɛlɛ́ tɔɔ mun, ŋą mąąwiɛlaa kɛnɛ̨i la dɛɛ bɛlɛ́i ə dɔɔ mą.

⁴ Pɛlɛ́ lɔpee gəlee, dɔɔ mun gaa mą, ɛlɛɛ, hɛn gəlee pɛlimun maa a Yálá.

⁵ Moisə ə tələnmolaa kɛ Yálá yəi bɛlɛ́n, yɛ tímun, ə gɛ, mɛ̨nįi kɛi pa ɓoi, ə kɛ a mąą kɛla.

⁶ Kɛlaa, Kristə nwɛi, gaa a bɛlɛ́n non, yɛ ɓo ŋą pɛlɛ́i mɛ̨i. Ŋą pɛlɛ́i, ya ɓaa a guɔ, akɛ mɛ̨nįi gu kaa mąąkpɔn ɉii, a ɲɛ̨i pono, a kilitɔɔmąą laa, gwa gu yee kąnąn mą kpąą.

Laa na laa ɓə a nu lɔ Yálá ŋą hviitɔɔi hu

⁷ Yili ɓə gaa mą, yɛ pələi Kili-Mąąhəɠɛɛ ə mo la, yɛ mą: «Háákələi, ká Yálá laa woo mɛ̨n,

⁸ 'ka hvo ka kili walawala, yɛ ɲələi nuą di di kwɛli tee la, a ɲələi di kɛi Yálá hukɔɔn na, nɔi pun ɉu.

⁹ Nąą ɓə ká nąnni di ɉúkɔɔn naa, ə gɛ, di gáá, diɛn, di ɲéé pɔɔ kaa,

¹⁰ kwɛlan bɔw nąąn ɲee mu. Yili ɓə gɛ, gɛ́ nííɲąnwąną diɛ, gɛ́ kɛ diɛ: Yələ kəlee ká káá lɔ lan bələ mɛ̨i, nuą ŋɛ̨i, di hvo kpɛli nwɔ́ pələɠaai kaa li,

¹¹ hvo gaai nííholii kɛa di mo, ŋį́ gwə́la diɛ, gɛ́ diɛ: ‹Gu ɲɛ̨i kaa laa, akɛ di kaa pai lɔi ŋą́ hvįitɔɔi hu!›»

¹² Ną́n nonnii, ka gɛ kani a nɛlɛɛ, nu ta hvo kɛ ka lɔwai, kili walawala laa ɲɔ̨nwɔ̨ɔ̨ hvo mąąkwɛa Yálá hvulúmąą ɓa.

¹³ Kɛlaa yaamun, ká ká keeni hvaŋąlɔ a yələɓɔ pələ tɛitɛi, yii kpɔ ni háákələi kaa ɉui, əgɛ, ká ta hvo pa gili walawala, nɛ̨ŋɛ̨n yɛ mowo.

¹⁴ Guɔ ka kɛa gwaa kɛ kɛa a Kristə mɛlaani, akɛ, gwa lɛɛ lɔ tɔɔni gu tɔɔ kilitɔɔmąą laa hu, ə lɛɛ la ɉu ɲąąkpɛɛ yələ.

¹⁵ Moɔi ŋɛ̨i nwɔ̨nɔ̨, yɛ mą: «Háákələi, ka Yálá laa woo mɛ̨n, ká hvo ka kili walawala, yɛ ɲələi nuą di di kwɛli tee la.»

¹⁶ Akɛti, gbɛɛ nuą ɓə Yálá laa woo mɛ̨n, diɛ di kwɛli tee? Kɛlɛi nuąi kpɔ kulɔ Eziptə lɔi hu Moisə háálai diɛ ɓə-é!

¹⁷ Gbɛɛ nuą ɓə Yálá ə niiɲąąnwąną diɛ kwɛlan bow nąąn ɲee mu? Kɛlɛi nuąi nɛ̨ŋɛ̨n ɉəɠə, diɛ ɓə-é! Diɛ ɓə di powa ə pu nɔi pun ɉu.

¹⁸ Gbɛɛ nuą ɓə Yálá ə gwɛla diɛ, yɛ kɛ, di hva kpɔ lɔ ŋą hvįitɔɔi hu? Kɛlɛi gili walawala nuą tii ɓə-é!

¹⁹ Gu ɲɛ̨i kaa mą, di tɔ̨nɔ̨ kpɛli hvo pɛli lɔi, a di wɔɔ kili walawala laa laa pɔɔ.