Hebreu 2 - Yálá laawoo hɛɓɛ (dc)

Nwun mąąɓo laai di naa həli, gɛnɛ̨i

¹ Yili ɓə gaa mą:, dɛ̨ą woo ŋɛ̨i gu mɛ̨n, ká gu ɉon a gu nwąnąi, akɛ, gu hvo bɔ, gu nwun na hvo pa pili.

² Mąąhɔlɔɓo, akɛ, nwɛlɛɛ wooi malakaɠaa di naa həli, ŋą tɛ̨ą mɛ̨nį ə too pono ŋą, ɛlɛɛ, nuąi gala, di kulɔ nwoo mu, di ɉu hvɛla hɔlɔɓo a ɉaŋąąi,

³ gu hvomun kɛ nwun mąąɓo wɛlɛi ŋɛ̨i, naa həliɛ ə gɔwɔ tɔɔ gu Nąmu yəi, gu ŋą tɛ̨ą mɛ̨nį mɛ̨n, lə takpɛli ɓə kɛa a pɛli gu kulɔi nwun napili yəi, akɛ gwa ɲagban naa kulɔ?

⁴ Ɛlɛɛ, Yálá kpinįi ə nuą ti di wɔ kɛla woo lɛ a tɛ̨ą, a kwəi pili mąą mɛ̨nįɠaa, da kpalo mɛ̨nį huwu tamąą, ɛlɛɛ, a Kili-Mąąhəɠɛɛ yəi mɛ̨inɛ̨ɛ̨ɠaai ə ɲąąkwɛlɛ diɛ a niiɓa!

Nu kanŋaa di liɛ

⁵ Mąąhɔlɔɓo, ɲɛnɛ̨ɛ̨ nįnɛ̨i gaa pai, yai gu kaa mąą mɛ̨nį ɓoi, malakaɠaa hvəə ə gɛ a di wɔɔ. Mąą mɛ̨nį ɓoɔi kɛɛnąą ta a tɛ̨ą, diɛ kɛ mą:

⁶ «Lə kpɔ ɓaa a nu kan, yai, Yá ə́ kili kɛ mą? Lə ɓaa a nu lon! Yai, Yá mąą mɛ̨nį həɠə kpɔ ti a ə́ yee kəlee-o?

⁷ Ə́ gɛ pələ tawolo too malakaɠaa di wɛi mu, Ə́ mąąwiɛ laa da lɛlɛ laa hee nwuɔ̨ a mąą hon ɉɛn;

⁸ Ə́ hɛn gəlee mąąyɛɛ gɔwɔ mu.» Ɛlɛɛ, hɛn gəlee mąąyɛɛi ə́ mo gɔwɔ mui, hɛn da hvo laa, yii hvo nu yee mu. Ya pa, yiihui ŋɛ̨i, gu hva pɛli gbaɠala kɔlɔn ɉi a kɛ, hɛn gəlee kaa nu yee mu,

⁹ Kɛlaa, lə ɓə gwa pɛli gaai yiihu? Nui gɛ pələ tawolo too malakaɠaa di wɛi mui, yai a Jesus, ɉaa mɔ̨nɔ̨i tii ə mįi mąą mɛ̨nį ɓa, ə mąąwiɛlaa da lɛlɛ laa hɔlɔɓo, a mąą hon ɉɛn. Yili ɓa tii, Yálá ŋą mɛ̨inɛ̨ɛ̨ háálai, ə haa kɔlɔn, nu kanŋaa kəlee mąą mɛ̨nį ɓa.

¹⁰ Bələ ɓə, ə nɛ̨ɛ̨ la tii, nui hɛn gəlee pɛli, yai hɛn gəlee kaa ɲəi, mą, ə hvaa mą, ə pələ kulɔ a lon damąą, ə di lɔ mąąwiɛlaa hu, ə mɛ̨nį kəlee laa kulɔ a nui ɓalo mɛ̨nį bələ kulɔ, ŋą mɔ̨nɔ̨.

¹¹ Mąąhɔlɔɓo, mąąhəɠə kɛmun, da nuąi a di mąąhəɠə, di nąn gaa tanɔ̨n; yili ɓa, hva pɛli nwumɛ̨i kɛi diɛ: Ną́n nonnii,

¹² yɛ nwɔ̨nɔ̨ kɛ diɛ: «Gáá pai ə́ laa lɛi ną́n nonnii diɛ. Ŋá ə́ laa mąątɛ̨nɛ̨ di kpɔn ɉu.»

¹³ Ɛlɛɛ nwɔ̨nɔ̨ yɛ mą: «Ŋą́ gílitɔɔ kpɔ mą kɛnɛ̨.» Yɛ nwɔ̨nɔ̨ mą: «Ɛlɛɛ, Ɲą́ą́ ká, kwa nɛapɛlɛɛi Yálá, Ə́ di tɛɛ bɔ́.»

¹⁴ Yili ɓa tii kani, yɛ bələi, lɛapɛlɛɛ di ɲąmą da di kɔlɔ kaa la tanɔ̨n, bələi lɔ ɓə, Yaa kpɛlimąn, da diɛni di kpɔnŋąąi la mɛ̨nį tanɔ̨n ma; ə gɛ, nui ŋɛ̨i haa ŋą hvaŋą kaa ɲəi, yai a nąnį, ə ɉukala, a haai ə mo yaa kpinįi.

¹⁵ Ɛlɛɛ, nuąi tii di wɔɔ yɛnɛ̨ɛ̨ kəlee yee mu, di kɛi ɲɔw haa ɓa, diɛ ɓo la tii ɲee mu a luwɔɠaa, ə di nwun mąąɓo.

¹⁶ Mąąhɔlɔɓo, malakaɠaa hvəə Jesus ə pa di mąąkpɔnmąąɓo mɛ̨nį ɓa, kɛlaa, Abrahamə huwu ɓə ə pa mąąkpɔnmąąɓoi.

¹⁷ Yili ɓə gɛ, hvo kɛli kɛ ə gbɔwɔ kɛ yɛ nąn nonnii, ə gɛ, ə kɛ a haláá laa həli mun gɛnɛ̨ɛ̨i ɲɛ̨i mąąwɛli kaa hu, tələnmolaa hu, Yálá kwɛlɛ, yɛ ŋą nuą di wɔɔ nɛ̨ŋɛ̨nŋaa waa diɛ.

¹⁸ Mąąhɔlɔɓo, yii kpɔ yaa kpinįi tii, ə mɔ̨nɔ̨ mįi ɲąąhɛn mɛ̨nį hu, a pɛli mą, ə kpɔnmąą tɛɛ nuąi ɲąąhɛn mɛ̨nį hu, di pɔ.