Hebreu 12 - Yálá laawoo hɛɓɛ (dc)

Liikpələlaa kɛ mɔ̨nɔ̨ hu

¹ Yili ɓa tii kani, guɔ kpɛlimąn, gu mąątinɛ̨nŋąąi a gɛla kpulu kɛnɛ̨ɛ̨, tiɛ̨ wiɛ da nɛ̨ŋɛ̨nŋaai da pɛli di gu kɔ́wɔ la yili, gu ɓo yiliɠaa diɛ, 'gu bu. Ɛlɛɛ, 'gu tɔɔ a gu nwąnąi, gu gu liikpələ, gilɛi ŋɛ̨i gaa gu kɔwɔ ɲą, gu ɉəɠə, gu həli la naa kulɔi;

² 'gu ɲɛ̨i kpalaa laa na laa pələi kulɔmun ma, yai a Jesus, a pɛli mą, ə gu həli naa kulɔi ɓa, a yai lənə kwəinɛ̨ɛ̨i kɛ dɔwɔ mą, ə niikpələ yɛ ɓɛlɛkpɛɛmąą haa ɓo kolɔwa ɓa, gaa heeni Yálá ŋą tɔɔkpəlin ɲee lɛlɛɛ hu.

³ A tɛ̨ą, nui ŋɛ̨i nɛ̨ŋɛ̨n ɉəɠə nuą di pɛlɛ mą, ə niikpələ, 'ká ká kiliŋąhiɛ mą, əgɛ, ɲɔ̨nwɔ̨mą a həli káá, 'ká hvįi hvo kpɛɛ.

⁴ 'Ká hvo nii kpɛli lɛɛ li, gɔi ŋɛ̨i kɔi ká nɛ̨ŋɛ̨n ni, a liikpələ laa, ká ɲąmą hvo pu,

⁵ ɛlɛɛ, niɛwoo lɛlɛɛi di gɛ káá yɛ bələi nu a nonnii liɛwoo kɛ la, káá lɛ̨ą mą! Yai ə kɛ mą: «Nón, 'hvó gu Ną́mu nwɔ hutɔɔ hviiɓo. A kɛi ə́ hutɔɔ, yili hvo ə́ hvįikpɛɛ.

⁶ Mąąhɔlɔɓo, nui nwɛli kaa gu Ną́mu ɓa, ya ɓə a ɉutɔɔ. Lon a ɲee hee mu, ya ɓə a ɉutɔɔ.»

⁷ Ka hutɔɔ mɛ̨nį a nɛlɛɛ ka ti ka káá mąą mɔ̨nɔ̨ mįi. Ká kɛ mɛ̨nį a Yálá lonnii ɓə a ká hutɔɔ. Lon nəi ɓə nąn va ɉutɔɔ?

⁸ Hutɔɔ a wala kɛ káá, a kɛ ti, wɛlin-nonnii ɓaa a kaa, ká hvo a gaa-gwəi lonnii.

⁹ Gu nąnnii kɛ ɓɛ lɔi mɛ̨i, di kɛli gu hutɔɔ, yili ə ɓo guɔ a mɛ̨nį lɛlɛɛ, gu hvo mun kɛ gu Nąn yələi, a tɛ̨ą, mąąnɛ̨ɛ̨i, 'ká gu lɛɛ nwoo mu, əgɛ, gu yɛnɛ̨ɛ̨ hɔlɔɓo.

¹⁰ Gu nąnnii tii di wɛi, di kɛli gu hutɔɔ a di wɔɔ mɛ̨nį hukpɛ kili, a di wɔɔ yələ; kɛlaa Yálá nwɛi, a gu hutɔɔ, gwa dɔlɔ hɔlɔɓo a nwɔ Yálá-laa.

¹¹ Hutɔɔ mɛ̨nį lɔpee gəlee, ɓɛlɔwai a kɛ həli la nu ɓa, hva gwəinɛ̨ɛ̨ a ɲələ, a nii ɲąąnwąną. Kɛlaa, ɉu a kwɛa, ɉutɔɔ mɛ̨nįi tii a kɛ mą a liilaa da tələnmolaa.

¹² Yili ɓa, yeeɠaa da kɔwɔɠaai di hvįikpɛɛ, 'ká di hvaŋąlɔ,

¹³ ɛlɛɛ, 'ká ká hiɛ pələɠaa haŋą, ə gɛ, lɔwnuą di hvo pa kpɛlɛɠɛlɛn, kɛlaa yaamun, di ɓalo.

Gu lɛɛ mɛ̨nį Kristə pulu

¹⁴ 'Ká tɔɔ a ká nwąnąi, liilaa ə kɛ ká nu kəlee ká lɔwai, ɛlɛɛ, ká mąąhəɠəlaa kwɛli, yai ə kulɔ bulu, nu hva pɛli Yálá ɲɛ̨ilaai kaai.

¹⁵ Ká gɛ a nɛlɛɛ, nu ta hvo bulu tɔɔ Yálá nwɔ nɛ̨ɛ̨laai ɓa, hvo kɛ a kala nwąną mɛlaa lɔwai, yɛ pilimąą, yɛ gbɔn ɉu taɠa.

¹⁶ Ka gɛ a nɛlɛɛ, wɛlikɛmun hvo kɛ ká lɔwai, 'ká hvo Yálá mɛ̨nį mɛlɛ too, yɛ bələi Esau ə gɛ la, ə nwɔ nu pɔlɔlaa lɔwɔtɔ́ɔ́ ɓá-kɔwɔ tɔ̨nɔ̨ mąą mɛ̨nį ɓa.

¹⁷ Mąąhɔlɔɓo, káá kpinįi ká gbaɠala kɔlɔn káá, ɉu kwɛa kɛa, ɓɛlɔwai ə kɛ la bɔ, di lúwó too mą, naa hvo mun kɛa laa ɉu, ɛlɛɛ, yili mąą hvo pɛli hvalin ɉii, bələi mąn ə ɉuhvɛli la a ɲɛ̨iyá wɔlɔ, hvo ɉɔlɔɓo.

¹⁸ Ká hvo ká mąąlɛɠɛ li hɛn da ɓa, yii nu yá ə́ yee tunwɔ̨n mą, yɛ bələi: Nwɔ̨n nən, kɛɛkpinįɛ, kpinį, túlɔ́-hvaŋą,

¹⁹ túlú woo ɛlɛɛ, hį́iwoo; nuąi ə too di wəlii, di hvo gɛ di hvo mɛ̨n.

²⁰ Mąąhɔlɔɓo, di hva pɛli kɛ mɛ̨nįi ti dɔ́n mu. Dɔ́n ti ɓaa kɛ: «Nui lɔpee a mąąlɛɠɛ ɲee ɓa, ə kɛ a taatɛlɛɛ, da ɉɔɔ a kwɛni ə haa!»

²¹ Mɛ̨nįi ti kɛ laa, ɲɛ̨i kɛnɛ̨ pələ, Moisə yɛ diɛ: «Ɉú aa haa, mą́ą́ yɛ kpɛli.»

²² Kɛlaa, ká wɛi, káá ká mąąlɛɠɛ Siɔn yee ɓa, da Yálá hvulú nwɔ taalee kɛnɛ̨i, a Ɉerusalɛmə yai yələi, da malaka kpulu waa tamąąi di ɲąąkpɔnŋąą hɛli hu,

²³ ɛlɛɛ, káá lɔ, Yálá lonnii dɔlɔɔɠaa di wɔɔ kpɔn hu, a diɛi di laa pɛ̨ɛ̨i yələkɔlɔn ɉu; ɛlɛɛ, káá ká mąąlɛɠɛ Yálá ɓa, yai a nu kəlee kiti teemun, da tələnmo nuą nįį, diɛi daa həli mɛ̨nį kəlee laa kulɔi.

²⁴ Káá ká mąąlɛɠɛ Jesus ɓa, yai, gwa Yálá ni gu lɔwai pɛli, əgɛ gu mįnɛ̨ nįnɛ̨ hɔlɔɓo, da ɲąmąi pu, yai viɛlaɓoɔ nwɔ̨nɔ̨, ə tɛɛ Abɛlə nwɛi ɓa.

²⁵ Ká gɛ a nɛlɛɛ, ká hvo ká wəli walawala nui ká təli nwoo tɔwɔ! Mąąhɔlɔɓo, akɛ, nuąi di wəli walawala di kilaa ponomun nwoo tɔwɔ ɓɛ lɔi mɛ̨i, di hvo kulɔ li nwun napili hui, gu hvomun kɛ guɔ kpɛlimąn, gu hva pɛli kulɔi nwun napili tɔ̨nɔ̨i ti hu, akɛ, nui yələi pələ, yɛ pələ ɓo guɔ, gwa gu pulu tɔɔ mą.

²⁶ Yálái ŋɛ̨i nwoo ə kɛi lɔi tumo, aa mo yiihu, yɛ: «Gáá pai lɔi kpɛlin ɉi tanɔ̨n gbən a gbəli-kpəli, hva lɛɛ lɔ a lɔi yaa tanɔ̨n, yələkɔlɔn naa kaa ɉu.»

²⁷ Nwoo ŋɛ̨i ə kɛ mą: «A gbəli-kpəli», a nɛ yɛ mą; pɛli hɛnŋaai kpɔ di kaa yɛnɛ̨ɛ̨ nąą kəlee, gəlee kaa pai həɠəi dɔɔi, gəlee di tɛɛ, ə gɛ, hɛn kala hvo mą, ə ɉeei kaa.

²⁸ Yii kani, dɔɔlaai kala hvo mą gwaa ɉɔlɔɓo, 'ká gu gu yee kanąn kani mɛ̨inɛ̨ɛ̨i lii ɓa kpɔ kpąą; mɛ̨inɛ̨ɛ̨ tii pɔ pələ, 'ká gu tí Yálá ɓa, yɛ bələi a nɛ̨ɛ̨la mą, kpɔwɔ mąąyɛɛ laa hu da ɲɔw mąą laa hu.

²⁹ Gbala ə tɔɔ, gu wɔɔ Yálái kaa a nwɔ̨n a kɛɛ kələn.