Hanwon 9 - Yálá laawoo hɛɓɛ (dc)

Kili kaa nuą təlii

¹ Kili aa nwɔ pɛ́lɛ́i tɔɔ, aa dɔɔmu kɛ mą mɛ̨ihveelɛ.

² Aa nwɔ taatɛlɛɛɠaai paa, aa nwɔ lɔɔi pɛli, ɛlɛɛ, aa nwɔ kɔ̨nɔ̨n gɔwɔi hee.

³ Aa nwɔ tínɛ̨ąąi tɔɔ, ə gɛ də li, di nuą təli a lolo, daa mɛ̨i. Diɛ kɛ mą:

⁴ «Nuąi di hva mɛ̨nį ɲąą kaa, di pa ɓɛ!.» Yiiɠaa di kili kpɛɛ di yəi, yɛ diɛ:

⁵ «Ka pa ka nwɔ́ kɔ̨nɔ̨n mįi, nɔɔi ŋį́ bɛli, ka gbələ.

⁶ Ka kilikpɛɛgwəi mɛ̨nį lɛɛ laa, 'ka pa ka yɛnɛ̨ɛ̨ kɛ, ka hvilɛn nwun gɛ ɉu pələ mɛ̨i.»

Yɛlɛkulɔ ɉu nuą

⁷ Nui a yɛlɛkulɔ ɉumun ɉutɔɔ, a mąą pənə a ɲowo. Nui a nu ɲɔ̨nwɔ̨ɔ̨ hɔn doo mą, lalan nɔ ɓə a ɉɔlɔɓo.

⁸ 'Hvó yɛlɛkulɔ ɉumun ɉutɔɔ, ə́ wɛli hvo pa kpɛɛ mą. Kɛlaa, yá kilimąą mun ɉɔn nɛ mą, a ə́ wɛlilakɛ.

⁹ Kilimąą mun gɔ́ɔ a kili, a gili ta kɛ mą ɲəi. Nu haŋąą liɛwoo kɛ, a tɛ tɔwɔ.

¹⁰ Nu a ɲɔw Yai-Laa ɓa, yili ɓə a kili mɛ̨nį kɔ́wɔ tɔɔi, nu mąąhəɠɛɛɠaa di wɔ mɛ̨nį kɔlɔn ŋąą, ɓə gaa a nwun gɛ ɉu mɛ̨nį.

¹¹ Mąąhɔlɔɓo, ɲą́ą́ kili, ɉáálai ɓə ə́ wɔ yɛnɛ̨ɛ̨ hu a kwɛa la, ə́ wɔ kwɛlanŋaa diɛ tamą.

¹² Ya kɛ a kilimąą mun, yáá kpinįi ɓə yá dɔ̨nɔ̨ hɔlɔɓo; yá kɛ a yɛlɛkulɔ ɉumun, yɛ́ tɔ̨nɔ̨ ɓə ya mɔ̨nɔ̨ mįi.

Kilikpɛɛɲəi nɛ̨ɛ̨nu nwɔ təli ɓo

¹³ Kilikpɛɛɲəi nɛ̨ɛ̨nu a kɛ tomąi, hva mɛ̨nį ŋąą kaa, ɉu puɔ mą, hvo mɛ̨nį ta kɔ́lɔn.

¹⁴ A kɛ heeni ɲəi bɛlɛ́ laaləi, ɉeɛ kpəlin gwɛa mɛ̨i daa hąą,

¹⁵ yɛ tɛɛ pələi nuą təli, ə mą kɛ, yiliɠaai di hvo bɔ pələ kaai, yɛ kɛ diɛ:

¹⁶ «Nui hva mɛ̨nį ɲąą kaa, ə pa ɓɛ pələ.» Nui ɲąąkpɛɛ mą, nɛ̨ɛ̨nui ti a kɛ mą:

¹⁷ «Nwuɔ̨ yá nɛ̨ɛ̨i, ɛlɛɛ, kɔ̨nɔ̨n nu a ɉəɠə nąmu pulu, nɛ̨ɛ̨i.»

¹⁸ Gili hvo ɉu, yɛ kɛ kɛɛnąą kpinɛ̨ɛ̨ ka tii, nui tii gili hvo ɉu, yɛ kɛ, nuąi nɛ̨ɛ̨nui tii aa di təli, daa li ɲąmuątaa.