Hanwon 7 - Yálá laawoo hɛɓɛ (dc)Wɛlikɛ nɛ̨ɛ̨nu a hilɛnon ɲɛ̨i kwɛli 1 Nón, 'hvó lɛ̨ą nwóó ɓa, ə́ kili lɛɛ niɛwooɠaa hu. 2 Yii ŋį́ mo yɛ́, 'gɛ. Ya ɓə a gɛ ə́ lamun yɛnɛ̨ɛ̨. Mɛ̨nįɠaai gáá ə́ kalan ɉii la, ɉon a nɛlɛɛ yɛ ə́ ɲɛ̨i lon. 3 'Hvó nɛɛ laa hvo kulɔ ə́ yəi, doo ə́ yee kpiɛ ɓa yɛ gbono, ə́ ganąn ə́ lii pɔ. 4 Kili kɛ a ə́ lee lon, yɛ́ nwun gɛ ɉu ɓa nwɛ́ikɛmąąmun. 5 Ə gɛ di ə́ mɛ̨i kaa wɛlikɛ nɛ̨ɛ̨nu tɔwɔ, da nu takpɛli nɛ̨ą laa nɛ̨ɛ̨ nwun ma. Wɛlikɛ nɛ̨ɛ̨nu nwɔ nu ɲąą hɛn hɛnŋąą 6 Yələ ta, ŋį́ kɛ ɲəi bɛlɛ́n, gɛ́ ɲɛnɛ̨ɛ̨ pələ kaa vinɛtɛlɛ la, 7 Ŋį́ kilikpɛɛgwəi mun ta kaa, ŋį́ ɲɛ̨i hee ɉilɛlɛa lɔwai, ŋį́ hulɔnon da kaa, yii hva mɛ̨nį ɲąą kaa. 8 Ə kɛi tɛɛ bələ mɛ̨i, ɓɛi nɛ̨ɛ̨nui tii kaa laa, yɛ li ɲəi bɛlɛ́ laaləi pələ. 9 Ə kɛ a hvitili ɓa lɔwai, kpinį yɛ kɛa pɛlɛ, kɛɛ aa tɛɠi kpinį aa pɛlɛ, 10 Nɛ̨ɛ̨nui tii a həɠə yɛ li naakwiɛn ɉii. Mąą yiliɛ kpɔ a wɛlikɛ nɛ̨ɛ̨nu mąą yili pələ, gbąnąlaa yɛ ɓo nii pɔ. 11 Ɉu pu pələi tii mą, hvo kɛi pɛli gbɔwɔ hu hon ɉii, gɔwɔ hvo kɛi pɛli lɔi hon ɉii. 12 Da a kɛ, a kɛ bələɠaa pɔ, gwəli hąąiɠaa ɓa, yɛ tɔɔ honwonŋaa hu yɛ pələ hɛlɛn dɛ. 13 Ə ɉulɔnon tii nɛ̨nɛ̨ɓo, ə ɉon kpɔ a ɲɛ̨i walawala, yɛ mą: 14 «Ŋą́ gwɛ́la, gɛ́ diɛ, gáá ponnąą haláá kulɔi, ya ka ɉaláá laa aa hon. 15 Mɛ̨nįi gɛ, gɛ́ pa ə́ laakwiɛn ɉii la, yaa li. Ŋą́ kɛi ə́ kwɛli, ŋą́ą́ ə kaa. 16 Ŋą́ą́ ɲə́i gbin ŋą pɛli a laa həɠə lɛlɛɛɠaa, bɛ̨ɛ̨ ɲɛ̨i tamąą, gaa a laa həɠə ɓɛlɛkɛ-ɓɛlɛkɛ yii a həɠə Eziptə lɔi hu. 17 Ŋą́ą́ wulɔ kun nɛ̨ɛ̨ kpɛŋɛn ɲə́i gbin ŋą. 18 'Pá gwə li, gu gu kee wɛli kulɔ, gwa lɛɛ laa, ə lɛɛ la ɉu yələ ə ɓɔ; gu yíi wɛli mɛ̨nį ŋąąnɛ̨ɛ̨ kulɔi. 19 Mąąhɔlɔɓo, ɉílɛ hvo bɛlɛ́ laaləi, aa li hiɛ kwɛa ɓa. 20 Ə nwali ɓíi həɠə, ə li la. Gaa pai pənəi ə pa, ɲąnįn nįnɛ̨ a hee la yee ɓa.» 21 Nɛ̨ɛ̨nui tii, ə ɉulɔnon ɲąąhɛŋi a nwɔ laa kɔ́lɔ, ə ɉəɠə bələ ɓa a nwɔ laa nɛ̨ɛ̨ mąą. 22 Ɉulɔnui tii ə nɛɛ mą, ə hvilɛn bulu, yɛ nįŋɛ̨ a hvilɛn baamun bulu, diɛ li baai. Yɛ da yɛli too ɓowomun gɔwɔ kwąną, diɛ li dooi kpɔnɔ ɲą. 23 A lɛɛ yili hu, ə lɛɛ la ɉu, mɛ̨ɛ̨kɔ́w ta ə ɓɔ níi hu, yɛ ɓo yɛ nwɛ̨nį lon a kɛi li tooi diŋɛ̨n ɉu, gili hva kɛ ɉu, yɛ kɛ mɛ̨nį li. 24 Yili ɓa nónnii, ka ka wəli tɔɔ, ka nwóó mɛ̨n, nwooi kulɔi ná, ka naa ka kili pɔ. 25 Ka hvo nɛɛ laa, nɛ̨ɛ̨nu taaləi tii hvo ka ɲąąhɛn, ka hvo həɠə pələ haŋąą mɛ̨i. 26 Mąąhɔlɔɓo, nɛ̨ɛ̨nu taaləi tii, nuąi aa di paa, di tamąąi, hvaŋą nąmįną tamąą ɓə aa di mąą mɛ̨nį pili ɉu. 27 Ɲəi bɛlɛ́ laaləi kaa a kámą la pələ, nąą bələ ɓə haa nuą da tɛɛ la, diɛ li ŋąmuątaa. |