Hanwon 5 - Yálá laawoo hɛɓɛ (dc)Ə́ kpɔwɔ mɛ̨i kaa wɛlikɛ nɛ̨ɛ̨nu mąą mɛ̨nį ɓa 1 Nón, gili wooɠaa da nwun gɛ ɉu wooɠaai ŋɛ̨i gáá moi yɛ́, ə́ wəli tɔɔ mą a nɛlɛɛ. 2 Ə gɛ yɛ́ pɛli mɛ̨nį hu kpɛ kili laahon moi. Yá gɛ tii, kili woo ɓə pai kɛi kulɔi ə́ la. 3 Wɛli hon nɛ̨ɛ̨nu woo nɛ̨ɛ̨i na yɛ kwɛi nwulɔ, naa nɛ̨ɛ̨i nwun ma yɛ wulɔ. 4 Kɛlaa, nwoo laa kulɔi nwąnąą yɛ pilíiɓa, ɲąąliɛ yɛ liikpakpa. 5 Gɔwɔɠaa ɲɛ̨i haŋąąi haa pɔ pələ, ŋamuą taa hiɛ ɓə da gulɔ. 6 Nwɔ hiɛ ɲɛ̨i hva haŋąn yɛnɛ̨ɛ̨ pələ ɓa, Kɛlaa yaamun, a li lɔ tii nwun ma, dɛɠii pələ. 7 Nónnii, ka ka wəli tɔɔ kɛa nwóó ɓa, ka 'hvo lɛ̨ą váá wooɠaa diɛ. 8 Nɛ̨ɛ̨nu taaləi tii mąą laa, 'hvó ə́ mąą lɛɠɛ ɲəi bɛlɛ́ laaləi ɓa. 9 Hvo pa nəi ə́ ɓɛlɛkpɛɛ yɛ́, nu takpɛliɠaa ɲɛ̨i ɓa, yɛ ə́ wɔ yɛnɛ̨ɛ̨ tɛɛ ɲąnimun bɔ. 10 Ɛlɛɛ, nwɛ̨ą di hvo pa pilɛ ə́ kwɛlin ɉu, nu takpɛliɠaa diɛ ə́ kɛ koló dɔlɔ mįi. 11 A kɛ tii, ə́ ŋąąkpɛɛi lɔwai hvó pa nəi ə́ woolaa, ɓɛlɔwai ə́ kaa pai kɛi la ə́ pɔlɔɔ kɔ́lɔi. 12 Ɛlɛɛ, yɛ́ kɛ diɛ: «Lə mɛ̨nį ɓa hutɔɔ mɛ̨nį wɛli hvo kɛ li mą́ą́? Lə mɛ̨nį ɓa və́ wə́li tɔɔ ɉútɔɔ woo ɓa? 13 Lə ɓə kɛ mą́ą́, yai və́ kɛ nwəli tɔɔ li gálamɔɔɠaa woo ɓa? Nuąi kɛi mą́ą́ kwɛli, və́ kɛ nwə́li tɔɔli di woo ɓa? 14 Nąąwolo ə lɛɛ tiikpə, gɛ́ kɛ ŋį́ too mąąwɛli mɛ̨nį hu, ŋąąkpɔn ɉu, nu kpɔn ŋɛ̨i lɔwai.» Ə́ laŋa nɛ̨ą wɛli la kɛ 15 Ə́ wɔ yáləɠi hu ya kpələ, a yá yii kulɔ ə́ wɔ yálɔwai hu. 16 'Hvó nɛɛ laa ə́ yəi ɲáləɠi hu yá gboloon hvo laa ɲɛnɛ̨ɛ̨, ɲá yɛ taɠa taɠa gwəliɠaa lɔwai. 17 Nɛɛ a yɛ tɔ̨nɔ̨ ə́ wɔɔ, ka nwɛ̨ą ka hvo kpɔn mą. 18 Lúwɔ́ ə kɛ ə́ wɔ yáton ma. Ə́ ɲąąnɛ̨ɛ̨ kulɔ ka ə́ laŋa nɛ̨ą. 19 Ə́ nɛ̨ą kɔ́n nɛlɛɛi yɛ lomą, gɔlɔ lɛlɛɛ mą yɛ nįnį kɔlɔ, ɲįnį ə kɛ a ə́ pilɛ hɛn a yələ kəlee. Nwɔ wɛlikɛmąąlaa ə́ ə́ hon yɛ lɔɔ. 20 Nón, lə mɛ̨nį ɓa nwɛ̨ą nɛ̨ɛ̨nu nwɔ wɛlikɛmąą a ə́ hu pu yɛ́? Lə mɛ̨nį ɓa nwɛ̨ą nɛ̨ɛ̨nu ɲįnį hon nwɛli a too yɛ́? 21 Ə́ kiliŋąhiɛ, nu kəlee túwɔ́ pələ hu pɔ̨nɔ̨ɔ̨i Yai-Laa ɲɛ̨i ɓa, a gəlee hu kaa. 22 Nwąnąlɔ mun a kɔ a gbɔwɔ kpinįi nwɔ nwąnąlɔɔ ɓaalə. A too gbɔɔ-kpɔɔ nɛ̨ŋɛ̨n diŋɛ̨n ɉu. 23 Gaa pai haai mąąhɔlɔɓo, ɉutɔɔmun və mą, nwɔ ɓowo laa aa gili kpɛɛ ɲəi. |