Hanwon 4 - Yálá laawoo hɛɓɛ (dc)Kili kaa a hɛn gɔw hviɛla ɓoɔ 1 Nónii, mɛ̨nįi ŋɛ̨i ka nąn gaa nɛi kaa, ka ka wəli tɔɔ mą. A kɛ tii, bələi mąąnɛ̨ɛ̨ ka kɛ la a nwun gɛ ɉu nuą, ka bələ kaa. 2 A tɛ̨ą, kalan bələ lɛlɛɛ ka ŋɛ̨i gáá naa həlii kaa, mɛ̨nįi ŋɛ̨i gáá ka kalan ɉii la, ka hvo ɓo mą, ka hvo doo. 3 Ɲą́ą́ gbɛli mąn bələ lɔ ɓə ŋį́ kɛ la a woo mɛ̨n non ną́n ma, ɛlɛɛ, nwɛ́li yɛ ɓo néé ɓa yə́ lon gɔw tanɔ̨n. 4 Nán ə kɛi níɛwoo kɛ, yɛ mąą: Nwóóɠaa naa kili ə lɛɛ ə́ ŋą, kpaalə ŋɛ̨i gáá nɛi yɛ́, ə́ hiɛ la; a kɛ tii, yá lamun yɛnɛ̨ɛ̨. 5 Kili mɛ̨nį kwɛli, da nwun gɛ ɉu mɛ̨nį. 'Hvó lɛ̨ą nwɔ́ liɛwooɠaa diɛ, 'hvó ə́ pulu tɔɔ mą. 6 'Hvó ə́ pulu tɔɔ kili mɛ̨nį ɓa, ya ɓə pai ə́ mɛ̨i kaa. Nwɛli la kɛ, ya ɓə a ə́ mąąkɔ̨nwɔ̨. 7 Kili mɛ̨nį kɔwɔ tɔɔi ka: 'Tɔ́ɔ́ a ə́ nwąnąi ə́ kili kwɛli, 'gwɛli a ə́ yəi hɛn gɔw kəlee, hɛn gaa ə́ yəi, gəlee kwɛlɛ ə gɛ, ə́ nwun gɛ ɉu mɛ̨nį hɔlɔɓo. 8 'Kanąn kili mɛ̨nį ɓa, ya ɓə a ə́ nwun muhəɠə. A kɛ a ə́ wɔ mąąwiɛ, akɛ yá kanąn mą. 9 A hee ə́ nwun ma a nwun na nɛ̨ɛ̨ kalan. Ə kɛ ə́ yəi yɛ tɔɔɓɔlɔ. Nwąnąlɔ túwɔ́ mąą laa 10 Nón, mɛ̨nįɠaai ŋɛ̨i gáá moi yɛ́ ə́ wə́li tɔɔ mą, ə́ ə́ kili lɛɛ ɉu. Akɛ yá ə́ kili lɛɛ ɉu, ə́ yíi hvóló hu a kwɛa. 11 Kili pələ ka ŋɛ̨i ŋą́ą́ nɛ yɛ́, ŋą́ą́ ə́ hvilɛn pələ haŋąą mɛ̨i. 12 Ya kɛi hiɛ bələi tii hu, hva too ə́ kɔwɔ mɛ̨i, ə́ ma kɛ gilɛ həɠəi hva ə kɔ́wɔ túwɔ́. 13 Mɛ̨nį ŋɛ̨i di ə́ kalan na, 'ɉon kpaan, 'hvó ə́ pulu tɔɔ mą. Gaa a ə́ wɔ yɛnɛ̨ɛ̨, ə́ yee kanąn mą. 14 'Hvó nwąnąlɔ nuą pɔɔkɔɔn, 'hvó hvilɛn mɛ̨nį ɲɔ̨n gɛ nuą kpaalə hu. 15 Nąą mąą laa, tɛɛ a pələ takpɛli. 16 Nwąnąlɔ nuą di hva yíi, akɛ di hvo mɛ̨nį ɲɔ̨n gɛ li. Da wala mɛ̨nį nwąnąą laa nu ta ɓa, yíi hva pa di ɲɛ̨i. 17 Mąąhɔlɔɓo, di kɔ̨nɔ̨n mąą mɛ̨nį ɲɔ̨n, too mɛ̨i ɓə gaa a di kpələ lɔɔ. 18 Tələnmomun dúwɔ́ pələ kaa yɛ yələ ɓɔi kɛɛ pɔ̨nɔ̨, yii da a kɛ lɔ pɛlɛi mą. 19 Nwąnąlɔ nuą di wɔ pələi hu kpinįɛ, hɛn a di too, di hva gaa. 20 Nón, ə́ wəli tɔɔ nwóó ɓa, ə́ ə́ wəli tɔɔ nwɔ́ liɛwooɠaa diɛ. 21 Hvo ɓo mą 'hvó doo. Kɛlaa, di kili lɛɛ ə́ ɲą. 22 Nuąi da di yee hee mu, a di yíi kwɛa, ə di kɔ́lɔi pɔ̨nɔ̨. 23 Ə́ kili kɛ ə́ kpɔwɔ hu, ə tɛɛ hɛn gəlee ɓa, mąąhɔlɔɓo, yili ɓə a gɛ ə́ yíi ə kwɛa. 24 Ə́ yee kɛ ə́ laaləi ɓa, 'hvó lɛɛ kɛ, 'hvó laa mąąhiɛ kɛ. 25 Ə́ ɲɛ̨i lɛɛ ə́ tɔwɔ, ə́ ə́ ɲɛ̨i haŋą tɛ̨ą ɓa. 26 Bələi ə́ pai ɉon ɉii la, gbɛa ə́ kiliŋąhiɛ mą, hvilɛn pələ haŋąą mɛ̨i. 27 'Hvə́ li ə́ ɓamįiyee hu, 'hvə́ li ə́ kɔ́ɓɛyee hu, 'Hvó ə́ kɔ́wɔ hvilɛn mɛ̨nį ɲɔ̨n ɉu. |