Hanwon 31 - Yálá laawoo hɛɓɛ (dc)

Tɔɔmun niɛwoo kɛ woo

¹ Tɔɔmun Lemuɛlə, woo ka; niɛwooi gaa lee ə gɛ mą, ya ka:

² Ə́kə! Əkə nón! Gwə́i lon! Yɛ́i ŋį́ ə́ hvɛli Yálá ɓa!

³ 'Hvó ə́ hvaŋą tɛɛ nɛ̨ąą pɔ, nɛ̨ąąi da tɔɔɓɛlaa too, 'hvó hvilɛn di pulu.

⁴ Lemuɛlə! Kpaa-o! Lɔɔ hva heeɓolaa mąą hon. Lɔɔ yamąn ŋąą mąą hvo nɛ̨ɛ̨li a tɔɔɓɛlaa kpələ hɛn.

⁵ Mąąhɔlɔɓo da gbələ, da lɛ̨ą tɔ́n nwoo ɓa, ɛlɛɛ, diɛ mąąwɛli nuą di wɔ tɛ̨ą mąą mɛ̨nį pili ɉu.

⁶ Nui ɉaa lii tɛi ka lɔɔ kpəɠiɛ tɔɔ na, nui nii kələn ŋąą gwəi aa hee mą, ka lɔɔ tɔɔ na.

⁷ Ya ɓə a gɛ, a gbələ, ə lɛ̨ą nwɔ mąąwɛlilaa ɓa, nwɔ mɔ̨nɔ̨ kili ə kpɛɛ ŋą.

⁸ Nui hvo wɛlɛɛ hvaa, dɔɔ bulu kɛ, nuąi daa di hviiɓo di tɔɔ bulu kɛ.

⁹ Kiti tee a tələnmolaa, ə́ mąąwɛli nuą da yeehvowolo nuą di mąą mɛ̨nį ɲɛ̨i kulɔ.

Nɛ̨ɛ̨nu ɓɛlɛmąą

¹⁰ Gbɛɛ ɓə aa kwiɛn a nɛ̨ɛ̨nu ɓɛlɛmąą? Ɉɔ̨nwɔ̨ kɛnɛ̨ɛ dɛɛ yɛnɛ̨ɛ̨ hɛn gɔw kəlee ɓa.

¹¹ Ɉilɛ a gilitɔɔmą, hva ɉɔlɔɓo hɛn ɉukala.

¹² Mɛ̨nį lɛlɛɛ ɓə a gɛ ɉilɛ ɓa, nwɔ yɛnɛ̨ɛ̨ kəlee yee mu, hva mɛ̨nį nwąnąą laa mą.

¹³ A yee hunwɔ da kinɛ̨ kwɛli gbɔwɔ ɓa, yɛ koló kɛ hvɛa-hvɛa.

¹⁴ Gɛ pələ kaa yɛ yɔw kɛ nuą di wɔ yáɲąkələn gɛnɛ̨, a hɛn ɉəɠə kwɛa la yɛ paa la.

¹⁵ A humo, ə ɲįnąąɓo ə muhəɠə, kɛɛ ə ɓo ni hvili-hvili, yɛ ɲəi bɛlɛ́n nuą kɔ̨nɔ̨n bɛli; yɛ kóló ɲąą kwɛlɛ nwɔ tínɛ̨ąąi diɛ.

¹⁶ A giliŋąhiɛ tíi ta ɓa, ə ɲá, a gbɔwɔ tíi kɛ a ɲəi wali

¹⁷ A ɉąą yili a nwala walaa, ɲee hvaŋąlɔɔ.

¹⁸ A gaa yɛ gɛ kólóɠaa pɛliɛ ɉu, ɛlɛɛ, nwɔ labon hva luwun kpinįi.

¹⁹ A ɲee pɛlɛ kinɛ̨ ɓa, yɛ yee pɛ̨nɛ̨ɛ̨ a yɛlɛ.

²⁰ Ɲee hvo kanąn ni mą mąąwɛli nuą tɔwɔ, a yeehowolo nuą kɔ́.

²¹ Hva ɲɔw kwɛlɛ ɓa, ɲəi bɛlɛ́n nuą mąą mɛ̨nį ɓa, mąąhɔlɔɓo, a həɠə too di kwaną gee mɛ̨i hveelɛ hveelɛ.

²² A yiihəɠəɠaa pala, mąą həɠəɠaa kaa a həɠə ɲɛ̨i tɔɔ, da nįnį kɔ́lɔ həɠə.

²³ Mąąwiɛ kaa ɉilɛ ɓa, galanɉonŋaa di wɔ ɲąąkpɔn ɉu, a kɛ heeni nɔi nąmįną lɔwai, nwoo mąąwiai.

²⁴ A həɠə pala, yɛ nɔwɔtɔɔ. Yɛ hąąyili kɔ́lɔ tɛɛ yɔwɠaa pɔ.

²⁵ Mąą yiliɛɛ a huwalawala da mąąwiɛ, a giliŋąhiɛ tinąą ɓa, gwəi yɛ nɛ̨ɛ̨.

²⁶ A pələ ɓo a gili, nwɔ lono kɛɛ yɛ nu kilaa pɔ̨nɔ̨.

²⁷ A ɲəi bɛlɛ́n mɛ̨nįɠaa kəlee hiɛ pələ mɛ̨i kaa. Hva kɔ̨nɔ̨n mįi, yii hvo mąą koló ɓo li.

²⁸ Nonnii da di muhəɠə, diɛ mąąwiɛ. Ɉilɛ a muhəɠə, ə mąątɛ̨nɛ̨, yɛ kɛ mą:

²⁹ «Nɛ̨ąą tamąą daa di wɔ kpakololaa lɛ, Kɛlaa, ə́ wɛi yee tɛɛi gəlee ɓa!»

³⁰ Mɛ̨inɛ̨ɛ̨ a nu ɓowo, lɛlɛ hva lamun ɉu. Nɛ̨ɛ̨nui a ɲɔw Yai-Laa ɓa, ya ɓə mąąnɛ̨ɛ̨ di mąątɛ̨nɛ̨.

³¹ Ka nɛ̨ɛ̨nui tii kɛ koló tɔlɔ tɛɛ bɔ, ɛlɛɛ, gɛ kolóɠaa di naa lɛlɛɛ tɛ daa nąą kɔlɔ kəlee.