Hanwon 30 - Yálá laawoo hɛɓɛ (dc)

Agurə hvaa woo

¹ Yake lon Agurə woo ka, ɉulɔnui tii hvaa woo ka, yɛ diɛ: Itiɛlə, Itiɛlə da Ukalə.

² A tɛ̨ą, gílikpɛɛ ɲə́i ə tɛɛ nu kəlee ɓa, ɛlɛɛ, nwun gɛ ɉulaa hvo ɲə́i.

³ Və́ kɛ kili kɛ ɲəi mąą kwɛli li, və́ Mąąhəɠəmun gɔ́lɔn.

⁴ Gbɛɛ ɓə aa ta tɛ yələi, aa pənə aa yɛɛ? Gbɛɛ ɓə aa ta hvaŋą hon aa ɲee laa kpulu mą? Gbɛɛ ɓə aa ta yá pu mąą həɠə hu, aa gbulɔn? Gbɛɛ lɔi ɲɛn naa? Mąą nu laa ɓaa gbɛɛ? Non naa ɓaa pai kɛi a gbɛɛ? Gbaɠala lɛ mą́ą́ akɛ ə́ gɔlɔn?

⁵ Yálá hvaa wooɠaa kəlee kaa a tɛ̨ą. Nuąi da di mąą kilɛ vaa woo hu, gaa a di mąąkpɛmun.

⁶ 'Hvó nwooɠaai ŋɛ̨i ta pɛlɛ mą, əgɛ, hvo pa haŋą yɛ́, hvó kɛ a lɛɛmun.

⁷ Nwɔ́ Yálá, mɛ̨nį hveelɛ ɓə gáá ɉu hvɛlii yɛ́, di tɛɛ bɔ́, gɛɛ və́ tɛɠa pa kɛ haai, 'Hvó lənə mą.

⁸ Gɛ́ ə́ lɛɛ mɛ̨nį mąą kwɛa mą́ą́, da ɓowo mɛ̨nį. 'Hvó gɛ́ a yeehvowolomun, 'Hvó nwɔ̨nɔ̨ gɛ́ hɛn gɔw kɛnɛ̨ nąmu kɛnɛ̨; yii bɛliɛ mą́ą́kpaan ma, dɛɛ bɔ́.

⁹ Hvó gaai, ŋą́ pilɛ hɛn gɔw hu kɛnɛ̨, və́ lənə Yɛ́, gɛ́ kɛ mą: «Gbɛɛ ɓaa Yai-Laa?» A wala kɛ tii, ɲéé la a tee, və́ pa nwuɔ̨ kɛ, və́ ɓɛlɛkpɛɛ nwɔ́ Yálá ə́ laa ɓa.

¹⁰ 'Hvó nu nwɔ luwɔ laa pələ ɓo gwɛlɛ, əgɛ, nuwɔi tii hvo pa ə́ nɛ̨ŋɛ̨n naa, nɛ̨ŋɛ̨n və lɛɛ ə́ nwuɔ̨.

¹¹ Nu taɠaa kaa laa, diɛ di nąn nɛ̨ŋɛ̨n naa, ɛlɛɛ, di hva lúwɔ́ too di kaa lee ɓa.

¹² Nu taɠaa kaa laa, da di kpɔwɔ kaa a di mąąhəɠɛɛ di kpɔwɔ ɲɛ̨i ɓa, yá pa, diɛ ɓo mąąliɓilaa hu.

¹³ Nu taɠaa kaa laa, di ɲɛ̨i tɛɠɛ ɓo ɉuwɔ, diɛ nu kəlee kaa lɔ di nwuɔ̨ pələ!

¹⁴ Nu taɠaa kaa laa, di ɲin gaa yɛ ɓɔwa kwɛa, di kpaniɠaa di ɓo yɛ ɓɔwa lon, diɛ mąąwɛli nuą huwɔ wean na di hu, di kpɛɛ mɛ̨nį ɓa lɔi mɛ̨i, da yeehvowolo nuą.

Hanwon da kpɛliɠaa

¹⁵ Tɔ́lɔ́ lonnii nɛ̨ąą kaa hveelɛ, diɛ ɓaa: Və! Və! Hɛn ɉaaɓa kaa laa, di hva pilɛ, di ka kpɔ hɔlɔmun nąąn, di hva kɛ diɛ «Aa pɛli!»

¹⁶ Ɲąmuątaa, kpoma nɛ̨ą, lɔi hva pilɛ yá hu. Nwɔ̨n hva kɛ diɛ: «Aa pilɛ!»

¹⁷ Ɲɛ̨ikɔw yii a yɛlɛ kulɔ nąn ɉu, yɛ gaa lee kaa a tɛɠɛ ɓo ɉulaa, goą-goąɠaa da nwolo, kuwɔ́ɠaa di gbələ.

¹⁸ Mɛ̨nį haaɓa kaa laa, di kpaɠala kaa laa walaa; di kaa kpɔ hɔlɔmun nąąn, vá di mąą mɛ̨nį ɲąą kaa, diɛ ɓaa:

¹⁹ Kuwɔ́ kpaalə hvo mą yələi, Kaalə pɔɔ hvo mą kwɛni gbaha mɛ̨i, Kələn bɔɔ hvo mą yá ɲą, hulɔnu pɔɔ hva kaa nɛ̨ɛ̨nu ɓa.

²⁰ Wɛlikɛ nɛ̨ɛ̨nu túwɔ́ pələ ka: A kɔ̨nɔ̨n mįi, ə naa ɓa kələ, yɛ diɛ: «Və́ kɛ mɛ̨nį ɲɔ̨n gɛ li!»

²¹ Mɛ̨nį haaɓa kaa laa, yɛ lɔi mąą kpɛlin, gaa kpɔ hɔlɔmun nąąn yii lɔi hva pɛli mu, diɛ ɓaa:

²² Heeɓolaa tɛɛ luwɔ pɔ, ɓowomun bilɛ mɛ̨nį,

²³ Nɛ̨ɛ̨nui nu ta laa hva pɛli mą, nwɔ hilɛtai kɛ mɛ̨nį, luwɔnɛ̨ąi a neenɛ̨ą tɔɔi həɠə.

²⁴ Hɛnŋąą nąąn gaa lɔi mɛ̨i, di pɛlɛɛ-pɛlɛɛ kpɔ a mɔlɔ; Kɛlaa, di kili kɛnɛ̨ɛ, kilimąą hɛnŋąą kəlee diɛ, diɛ ɓaa:

²⁵ Humoɠaa, hvaŋą hvo di yəi; Kɛlaa, hvóló laa a tee, ya ɓə da di kɔ̨nɔ̨n gbɔn na gee ɓa.

²⁶ Kolaayilɛɠaa ka, huwɔ hvįikpɛɛɠaa li, Kɛlaa, kwɛni wolo hu ɓə da di taa tɔɔ laa.

²⁷ Peeləɠaa ka, tɔɔmun və di yəi; Kɛlaa, da kɛi kulɔ da kulɔ a di kpulu ɓɛla ɓoɔ ɉuɠaa.

²⁸ Hvɛlɛɛn ga, nu a ɉon a ɲee; Kɛlaa, tɔɔ pɛlɛ́ mu ɓə a kɛ laa.

²⁹ Hɛnŋąą haaɓa kaa laa, di hiɛ pələ lɛlɛɛ, di kaa kpɔ hɔlɔmun nąąn, di hiɛ pələ mąąhəɠɛɛi tai.

³⁰ Yala ka, gaa a tɔɔmun huwɔɠaa lɔwai, hva pu hɛn nɔpee ta tɔwɔ.

³¹ Tɛ́ɛ́hilɛ ka, a haŋą a tɔɔ tɛ́ɛ́hááɠaa lɔwai; a wala kɛ tii ɓolu hilɛ. Ɛlɛɛ, tɔɔmun a kɛ nwɔ kɔlaɠai ɲɛ̨itɔwɔ.

³² Akɛ yáá ta ɓowo kɛ, yɛ́ ə́ kpɔwɔ ɲąą kɛnɛ̨, ə́ kiliŋąhiɛ, 'hvó kɛa da ɓo.

³³ Mąąhɔlɔɓo, yá ɲįnįyá kulɔ, nwulɔ a hee ŋą, hunwɔ̨ a túwɔ́, ɲąmą a pu, yá líiholi tuwɔ, hvaa a kulɔ.