Hanwon 29 - Yálá laawoo hɛɓɛ (dc)1 Nui a gbowo too ɉutɔɔ woo ɓa, a tee lɔ kpə, ɉali hva kɛ. 2 Ɲąąwooɓolaa a kɛ tələnmo nuą yəi, nɔi a kɛ liilaa hu. Kɛlaa, tɔɔlaa a kɛ líiɲɔ̨n gwəimun ɲəi, nuą da kɛ ɲiŋɛi di huwɔ hu. 3 Nui kili mɛ̨nį wɛli kaa mą, gaa nąn gwəi a nɛ̨ɛ̨. Kɛlaa, nui a kanąn wɛlikɛ nɛ̨ąą diɛ, a gwɛlin ɉu kala. 4 Tɔɔmun a ɲąąwooɓo laa kɛ a tələnmo, a nɔi tɔɔ. Kɛlaa nui a nįįhɔ̨nwɔ̨ hon lɔi lonnii yəi kɛlɛ-kɛlɛ, a nɔi too. 5 Nui a ɉeeyɔwɔ mąątɛ̨nɛ̨, gaa hɛlɛn dɛi mɛlan dɔwɔ. 6 Ɓaalə kaa nwąnąlɔmun nwɔ nɛ̨ŋɛ̨n ɉu. Kɛlaa tələnmomun nwɛi, a pili yələi a kwəinɛ̨ɛ̨. 7 Tələnmomun ə mąąwɛli nuą di mąą mɛ̨nį nwun gɔlɔn. Nwąnąlmun nwɛi kili hvo mą yɛ ŋąhiɛ yili ɓa. 8 Yɛlɛ kulɔɉu kɛ nuą da taa pu nwɔ̨nŋą. Kɛlaa, kilimąą nuą da líiholi ŋąąyɛɛ taai. 9 Kilimąą mun, da kilikpɛɛgwəi mun da kɛ kili haɠa ɓa, gilimun ə nwąnąi pu-o, ə ɉon a yɔla-o, kilikpɛɛgwəi mun va ɲąą kaa. 10 Nuąi ɲąmą pu wɛli kaa diɛ, kwəi kwɛləmun nwɛli hvo diɛ, Kɛlaa, nu haŋąąɠaa di wɛi, kwəi kwələmun mə da gwɛli. 11 Kilikpɛɛɲəimun hva nwɔ líiholi hu hon. Kɛlaa, kilimąą mun a nwɛi hu hon, ə mɛ̨i kpulu. 12 Ɲɛ̨itɔwɔmun a nwəli tɔɔ lɛɛ wooɠaa diɛ, nwɔ kalanɉonŋąą kəlee da ɲɔ̨nwɔ̨. 13 Yeehvowolomun da hvulu hɛn gwɛlimun da di kee kaa, Yai-Laa ɓə a nu hveelɛi tii ɲįnąąɓo tɛ̨ą mɛ̨i. 14 Tɔɔmun yii a mąąwɛli nuą di wɔ kiti tee a ɉaŋąą a lamun dɔɔ kpəlin ɉu. 15 Hutɔɔ hvaɠa a kili tɛɛ nu pɔ, Kɛlaa, lon da nɛɛ gbɔwɔ ɓa, a nwumɛ̨ tɛ a gaa nee. 16 Nwąnąlɔ nuą da tamą lɔ, nɛ̨ŋɛ̨n gɛɛ hu yɛ wiɛ; Kɛlaa, tələnmo nuą ɓə pai kɛi a di too mɛ̨nį mąą kɛla. 17 Yá ə́ lon ɉutɔɔ, ə́ wəli pulu a lɛɛ a naɠiɛ; ya ɓə pai ə́ pilɛi a kwəinɛ̨ɛ̨. 18 Kwɛaa la kaamun a wala kɛ lɔi, lɔi lonnii da di yɛli tee. Kɛlaa, nwun na nɛ̨ɛ̨ lon maa nui aa tɔ́n ɉon. 19 Di hva luwɔ hutɔɔ a woo kpɛli kpɛli, akɛ kpɔ mɛ̨n ɉii, kɛlaa, hva bɔ mɛ̨nį kɛ. 20 Yá nu kaa, hvaa polo-polo wɛli ə ɓo mą, ə́ ə́ kilitɔɔ kilikpɛɛgwəi mun ma, viɛlaɓoɔ nu huwui tii ɓa. 21 Nui a ɲee pɔ mun gala a nokolo yələ, a mąą nu kɛ a hviɲɛ̨mun. 22 Nui níiholi laa nɛ̨ɛ̨, a hvaa too. Nui níi kələn ŋąą gwəi, a nɛ̨ŋɛ̨n diɲɛ gee mɛ̨i. 23 Kpɔwɔ ŋąą kɛnɛ̨ laa pɔ hɛn maa a nwumɛ̨, nui a gbɔwɔ mąą yɛɛ, da mąąwiɛ. 24 Nui da nwuɔ̨mun da nwuɔ̨ hɛn ɲąąkwɛlɛ, a gbɔwɔ ɓɛlɛkpɛɛ gwəi, a nwuɔ̨ lolo woo mɛ̨n, hva pɛli nwuɔ̨mun nąą lɛ. 25 Ɲɔw kɛnɛ̨ a hɛlɛn dɛ nuą tɔwɔ. Kɛlaa, nui a gilitɔɔ Yai-Laa ɓa, a mąą nu mɛ̨i kaa. 26 Nu tamąą da kɛ di nɛ̨ɛ̨i gwɛlii nwun nąmu yəi, Kɛlaa, Yai-Laa ɓə a nu tɛi tɛi nwɔ tɛ̨ą mɛ̨nį ɲɛ̨i kulɔi. 27 Bələi lɔ nu ɲɔ̨nwɔ̨ɔ̨ wɛli kpɛɛ la tələnmo nuą diɛ, bələ lɔ ɓə tələnmomun nwɛli kpɛɛ la nwąnąlɔ nuą diɛ. |