Hanwon 28 - Yálá laawoo hɛɓɛ (dc)

¹ Nui líi ɲɔ̨ngwəimun gaa lɔ gilɛ ɲą, ə mą kɛ, nu hvo bulu. Tələnmomun nwɛi, gaa yɛ yala gbɔn, nii hva kulɔ mą.

² Kwɛlitee a lɔ lɔi, ɲąąwooɓo kɛ nuą da tamą, Kɛlaa ɲąąwooɓomun a kɛ a kilimąą mun, yɛ ɓo a yɛnɛ̨ɛ̨ kɔ́lɔn ŋąą, a lííla a hee laa tin-tin.

³ Ɲąąwooɓo kɛmun hɛn və ɲəi, ɛlɛɛ, yɛ ɲee pɛ̨nɛ̨ mąąwɛli nuą hu, gaa yɛ kɛɛ kala tulɔi hva kɔ̨nɔ̨n nɛɛ bulu.

⁴ Nuąi da tɔ́n mɛlɛkpɛɛ mą, nwąnąlɔmun mə da mąątɛ̨nɛ̨. Kɛlaa, nuąi da tɔ́n ɉon, da kɔ́ pɛlɛ nwąnąlɔ ɓa.

⁵ Nuąi da di kpɔwɔ tɛɛ mɛ̨nį ɲɔ̨n bɔ, di hvo mɛ̨nį haŋąą kɔlɔn. Kɛlaa, nuąi da Yai-Laa kwɛli, diɛ ɓə da mɛ̨nį kəlee kpaɠala kaa.

⁶ Yee hvowolomun a nwɔ yɛnɛ̨ɛ̨ kɛ a ɉaŋąą, viɛlaɓoɔi dɛɛ hɛn gɔw nąmu hiɛ pələ kpəlaan ŋąą ɓa.

⁷ Nui a tɔ́n nwoo hon kilimąą mun ni. Kɛlaa, nui da túwɔ́ pələ ɲɔ̨n gɛ nuą da hiɛ, a nwumɛ̨ tɛ a gaa nąn.

⁸ Nui a nwɔ hɛn gɔw ta pɛlɛ mą a hvulu, gaa ɉɛn gɔwi tii tɛi gee mɛ̨i a mąąwɛli nuą mąąkpɔnmąą ɓomun nwɔɔ.

⁹ Nui a nwəli laa kpulu tɔ́n nwoo tɔwɔ, nwɔ Yálá hvɛli woo kəlee kaa a mɛ̨nį ɲɔ̨n gɛnɛ̨.

¹⁰ Nui a nu haŋąą lan, yɛ vilɛn pələ ɲɔ̨nwɔ̨ɔ̨ mɛ̨i, nɔwai tii ə dee, ɉunwɛ̨i ɲąmą a pu ɉu, Kɛlaa, nuąi di túwɔ́ pələ haŋąą, da nwun na nɛ̨ɛ̨ hɔlɔɓo a di kwɛlin.

¹¹ Hɛn gɔw nąmu, a gbɔwɔ kaa lɔ a kilimąą mun. Kɛlaa, yeehvowolomun yii kili kaa mą, a ɉɛn gɔw nąmui tii pulu kulɔi.

¹² Tələnmo nuą da tɔɔlaa həɠə, nwun na nɛ̨ɛ̨ a kɛ nu kəlee ɓa, Kɛlaa nwąnąlɔ nuą da ɉəɠə, nu kəlee da di nwun mąą kilɛi kwɛli.

¹³ Nui a ɉɔn noo, hva tɛ tɔwɔ. Kɛlaa, nui a hvaa ɉɔn ma, ə kpəla mą, mąą nu ɓə Yálá a ɲɛ̨imąąwɛli kaa.

¹⁴ Nwun na nɛ̨ɛ̨mun maa, nui a ɲɔw mɛ̨nį ɲɔ̨n ma. Kɛlaa, nui a gili walawala mɛ̨nį ɲɔ̨n gɛɛ hu, ya ɓə kpalo a gaa.

¹⁵ Mąąwɛli lɔi ɲąąwooɓomun a kɛ a nwąnąlɔmun, gaa yɛ yala a kɛi hvuluun, yɛ yákwɛli a kɛi laŋin.

¹⁶ Kili awala kɛ lɔi nąmu ɓa, a mɔ̨nɔ̨ kɛnɛ̨ laa nɔi lonnii mɛ̨i. Kɛlaa, nui hvulu hɛn ɉɔlɔɓoɔ wɛli hvo mą, ɲíi a kwɛa.

¹⁷ Nui nu ɲąmą wulu a lɛɛ nwuɔ̨, a lɛɛ gilɛ həɠəi, haa ə həli mą nu ta hva ɉu hon.

¹⁸ Nui a hiɛ a gwəi kwɛlɛɛ, ɓalo. Kɛlaa, nui a mɛ̨nį hon a pələ hveelɛ, a too dɔ̨nɔ̨ hu.

¹⁹ Nui a tíi kɛ a gɛi lɔwai, hva hvɛɠɛ a kɔ̨nɔ̨n. Kɛlaa, nui a hvilɛn kpɛli-kpɛli mɛ̨nįɠaa pulu, a lɛɛ kanąn ɉu.

²⁰ Nui dələnmoɔ, a lúwɔ́ hɔlɔɓo. Kɛlaa, nui gaa bɔ ə hɛn ɉɔlɔɓo a yee mąąhulɔ, hvo pai hvɛɠɛi hutɔɔ hu.

²¹ Mɛ̨nį kɛɛ a ɲɛ̨i kɔ́lɔn, hvo lɛlɛ li. Nɔgwəi hɛn nogolo a nu mąąwia ɓɛlɛ too.

²² Hɛn nwɛlimun ɲɛ̨i a kulɔ mɛlaa di wɔ hɛn bɔ, yɛ gilɛ həɠə bulu, gili hvo ɉu yɛ kɛ yeehvowololaa yɛi ə pa wolo mą.

²³ Nui a tɛ̨ą ɓo mɛlan ma, a ɉutɔɔ, yili viɛlaɓoɔi, ə tɛɛ la nui a nɛ̨ɛ̨i gwɛli mɛlan ɲəi a laa nɛ̨ɛ̨ mąą, ɓa.

²⁴ Nui a nwuɔ̨ kɛ nąn da nee diɛ, yɛ kɛ diɛ nɛ̨ŋɛ̨n vəli, da lɔi kalamun di tɔɔi kaa kpɔlɔ tanɔ̨n.

²⁵ Nui ɲɛ̨i kulɔ bɔ wɛli kaa mą, a hvaa too. Kɛlaa, nui a gilitɔɔ Yai-Laa ɓa, nįį a hee ɲee kɔ̨nwɔ̨n ɉu ə ɓɛlɛ.

²⁶ Nui a gilitɔɔ gbɔwɔ ɓa, ɓowomun ni. Kɛlaa, nui a hiɛ a kilikɛɲəilaa, mąą nu a ɓalo.

²⁷ Nui a mąąwɛlimun gɔ́, hɛn da mąąkanąn va hee mą. Nui hvo bɔ hvo ɲɛ̨i lɛlɛɛ hee mąąwɛli nuą diɛ, nɛ̨ŋɛ̨n naa kaa mą.

²⁸ Nwąnąlɔ nuą da di muhəɠə, nu kəlee da di loo, tələnmo nuą da tamą lɔ, diɛi di nwun na ə pili.