Hanwon 27 - Yálá laawoo hɛɓɛ (dc)

¹ 'Hvó ə́ kpɔwɔ mąątɛ̨nɛ̨ tinąą mɛ̨nį hu, mąąhɔlɔɓo, mɛ̨nįi háákələi kaa pai naai yɛ́, hvó gɔlɔn.

² 'Nɛɛ laa nu takpɛli ə́ ə́ mąątɛ̨nɛ̨, 'hvó ə́ kpɔwɔ mąątɛ̨nɛ̨; 'nɛɛ laa nwɛ̨ą ə gɛ, yɛ́ kpinįi 'hvó gɛ.

³ Kwɛni wiaai, ɲɛ̨ąkɔw wiaai, Kɛlaa, ɓowomun nwɔ líiholi mu wiaai gəlee ɓa.

⁴ Líiholi kaa a kili ɲɔ̨nwɔ̨ɔ̨ ɛlɛɛ, líi kələn gwəi walawalaa, Kɛlaa, gbɛɛ ɓə a pɛli tɔɔi tolo mɛ̨nį la?

⁵ Nu ə haŋą nu ɓa a tɛ̨ą ɲɛ̨i ɓa, viɛlaɓoɔ ɓə, muugbɛ wɛlikɛmąąlaa ɓa.

⁶ Ə́ ɓɛlan a ə́ túwɔ́ a ɲee kpuwulu, wɛlikɛmąą kɛlɛ ɓo li, ə́ yowo a ə́ nɛ̨nɛ̨ɓo, yili kaa a mąąɲɔw hɛn.

⁷ Nui bilaa, a kwɛ̨n wulɔ ɓɛlɛkpɛɛ mą. Kɛlaa, nui pulu kaa mą, hɛn nwąnąą kəlee nɛ̨ɛ̨i na.

⁸ Nu a kɛi li nwun ma, yɛ mąą kwɛa taa ɓa, gaa yɛ liɛn a kɛi mąą kwɛa daa ɓa.

⁹ Mąątí wulɔ mąą kun nɛ̨ɛ̨ a nu kwəinɛ̨ɛ̨. Nu mɛlan nwɔ wɛlikɛmąąlaa viɛlaɓoɔi ə tɛɛ nu kpɔwɔ kpinįi nwɔ liɛwoo ɓa.

¹⁰ 'Hvó tee ə́ ɓɛlan bulu, ə mą kɛ ə́ nąn mɛlan. 'Hvó li ə kaayɔwɔ pɔɔli a ɲələi ya kpaan na. Heeyɔwɔlaa hviɛlaɓoɔi kaayɔwɔlaai mąą kwɛaa yɛ́, mą.

¹¹ Nón! 'Kɛ a kilimąą mun, yili ɓə a gwə́inɛ̨ɛ̨, nui a woo ɲɔ̨n ɉaa mą́ą́, ŋį́ pɛli bulu pənəi.

¹² Kilaa pɔ̨nɔ̨mun, a mɛ̨nį ɲɔ̨n gaa yɛ pa, a noo; Kɛlaa, nui ɲąą hvo mą, a li lɔ nwun ɉu kun ma, yili pulu, ə ɲee kpiɛ too na.

¹³ Nwɔ biliɉui kulɔ gwąną, mąąhɔlɔɓo, aa kɛ a nwɛ̨ą nwɔ kwələ kɛla. Tolaa hɛn ɉəɠə ɲəi, mąąhɔlɔɓo, aa nwoo kwɛlɛ nɛ̨ɛ̨nui hvo gɔlɔn bulu.

¹⁴ Nui a humo, ə nwoo pili ɉeeyɔwɔ ɓa gbąątɔɔ woo, nwoo a kɛ nwəlii yɛ nɛ̨ŋɛ̨n naa woo.

¹⁵ Tulɔyá kpoloon hva kpəla tɛɛ ɓa, a tulɔ pu yələ, da nɛ̨ɛ̨nui hvaa wɛli kaa mą, di kaa taanɔ̨n.

¹⁶ Akɛ nu a pɛli hvaŋą hu hon ɉii, yɛ́ pɛli wulɔ hon ɉii a ə́ yee, akɛtii, yá pɛli hvaanɛ̨ą hu hon ɉi.

¹⁷ Kwɛli ɓə da kwɛli ɲąą hɔɔ la, nu ɓɛlan túwɔ́ pələ lɔ ɓə a ɲąąli.

¹⁸ Nulaa kaa a kɔwɔ kpɔlɔ, yɛ́i yá tɔwɔ pono, yɛ́ ɓə a hala ə́ mąąla, nui a nwun nąmu mąą kpɛ, ya lɔ ɓə da mąąwiɛ.

¹⁹ Bələi lɔ nu a gbɔwɔ ɲɛ̨ilai kaa la yái, bələ lɔ ɓə nu kwəi kaa la gbɔwɔ ɓa.

²⁰ Ɲąmuątaa da kámą di hva pilɛ, bələ lɔ ɓə nu ɲɛ̨ikɔw hva pilɛ la.

²¹ Da wali hu waa huluun ɉu, diɛ hɛni hu waa nwɔ̨n ɉu, nu nwɛi, ɉutɔɔ hɛn mąą ŋą túwɔ́ pələ lɛlɛi nuą da dɛ.

²² Ə́ ma kilikpɛɛgwəi mun ɉiɠɛ kwənąi da mɔ̨nun, mɔ̨nun gala a kulɔ mą, Kɛlaa, yili hva kilikpɛɛgwəi mun ŋą kilikpɛɛgwəilaa kulɔ mą.

²³ Yá ə́ wɔ taatɛlɛɛi kɔ́lɔn, yá pɛli ə́ wɔ taatɛlɛɛ kpului laa hɔn mo a nɛlɛɛ.

²⁴ Mąąhɔlɔɓo, hɛn gɔw hva lamun a yələ kəlee, ɛlɛɛ, tɔɔhvili hva həli mąnįn bulu mąnįn diɛ.

²⁵ Da kala kpala paa, nįnɛ̨ a tíliin, nįnɛ̨ kaa lɔ tíliin ɉi, ka gbalaɠaa yɛɠɛ ɲeeɠaa nwuɔ̨.

²⁶ Ɓɛlaa lonnii tɔɔ, da pɛli həɠə kɛi yɛ́, ɛlɛɛ, ɓolu hilɛɠaa tɔɔ, yá pɛli lɔi yai la.

²⁷ Ɓolu hááɠaa tɔɔ a gbulu kɛnɛ̨ɛ̨, yá pɛli ɲįnįyá kulɔi kɛnɛ̨ yɛ ə́ yəi bɛlɛ́n nuą kɔ̨nɔ̨n gɛ, yɛ ə́ yeemu nuąi laa hɔn mo.