Hanwon 26 - Yálá laawoo hɛɓɛ (dc)

Nui kili hvo mą

¹ Nwɔ̨n da yá di hva doo geeɓa mįi, tulɔ wɛli hvo mɔ̨nun deemun ma, bələ lə kpɔlɔɔ ɓə ɓɛlɛ hva kilikpɛɛgwəi mun mąą hon na.

² Bələi hvólóon a koon na yələ kwəi, ɉeei hvo mą, bələ ɓə nɛ̨ŋɛ̨n naai nwun və mą, hva nu hon.

³ Hoo da naa kwɛli, hoohvaalən da gɛlɛ hvaɠa, kilikpɛɛgwəi mun da galakpa.

⁴ 'Hvó kilikpɛɛgwəi mun nwoo ŋąąpənə a kilikpɛɛgwəi. Əgɛ, 'hvó pa kɛ yɛ yaa.

⁵ Kilikpɛɛɲəimun nwoo ɲąą pənə a nwɔ hupumąą woo, əgɛ hvo pa gbɔwɔ kaa yɛ kilimąą mun.

⁶ Nui a kilikpɛɛgwəi mun gɛ a nwɔ wɛlɛɛ ɓomun, a gbɔwɔ tɔɔ kɔ́wɔ kulɔ mu, ə gbɔwɔ lɔ laanɔ̨nwɔ̨ hu.

⁷ Bələi lɔ kpɛlɛɠɛlɛn ɲɔ̨n gɛmun gɔwɔɠaa hvįikpɛɛ la, bələ lɔ ɓə kilikpɛɛgwəi mun nwɔ hanwon vaŋą hvo la ɉu.

⁸ Nui a kilikpɛɛgwəi mun mąąwiɛ, gaa yɛ nu a kwɛni kpulɔn yələvin ma.

⁹ Kilikpɛɛɲəimun gɛɛ hanwon ɉɔɔi, kaa yɛ kpala a kɛ lɔɔ hon ɲəi yɛ kɔ̨nwɔ̨ la nuą nwun mɛ̨i.

¹⁰ Ɲɛitɔwɔmun a kilikpɛɛgwəi mun ɉəɠə koló hu, da lɔɔ hon, a pɔn bɛlɛ lɔi lonnii diɛ.

¹¹ Bələi lɔ yilɛ a pənə yɛ maɠi kɔ̨mɔ̨n la, bələ lɔ ɓə kilikpɛɛgwəi mun a pənə ə too la nwɔ ɓowolaa hu.

¹² Yá nu ta kaa, yɛ gbɔwɔ kɛ a kilimąą mun? Nu kilitɔɔ kilikpɛɛgwəi mun ma, viɛlaɓoɔi nu taaləi tii ɓa.

Hviɲɛ̨mun

¹³ Hviɲɛ̨mun a kɛ diɛ: «Nu kala huwɔ kaa bələ pɔ, yala kaa pɛlɛni gwəli hąąi!»

¹⁴ Pɛlɛ́ laaləi kpon a tinɛ̨n gɔwɔ mɛ̨i, hviɲɛ̨mun yɛ tinɛ̨n yɛ laa ɲəi gbin ɲą.

¹⁵ Hviɲɛ̨mun a ɲee lɔ ɓa kɔ́wɔ hu, dɛ mɛ̨nį na yɛ vįikpɛɛ.

¹⁶ Hviɲɛ̨mun a gbɔwɔ kaa a kilimąą mun kɛnɛ̨, ə tɛɛ mɛ̨nį kɔ́lɔn nuą kili ŋą kulaa mɛ̨ihveelɛ ɓa.

Hanwon dakpɛli

¹⁷ Hvaai ə́ laa hvo ɉu, yá ə́ laa pili ɉu, gaa yɛ, yilɛ a kɛi tɛɛ, nu yɛ ɉon a nwəli.

¹⁸ Bələi lɔ ɓowomun a mɛ̨ɛ̨kɔw haŋą la nu kpulu hu, yɛ powa too,

¹⁹ Bələ lɔ ɓə nui a mɛlan mowo, yɛ kɛ mą: «Ŋą́ kɛi yola kulɔ», a powa too la.

²⁰ Kwɛi a wala kɛ nwɔ̨n ma, a luwun, hiɛ nɔwai kɛmun a wala kɛ laa, hvaa hva too.

²¹ Tiɠi a nwɔ̨n deŋą kulɔ, kwɛi tɔɔ nwɔ̨n ma a nwɔ̨n ɉee; bələ lɔ ɓə nui hvaa wɛli kaa mą, a hvaa ŋąą hee la.

²² Hiɛ nɔwai kɛmun nwoo kaa yɛ kɔ̨nɔ̨n nɛ̨ɛ̨ pɛlɛɛɠaa, a yɛɛ nu lii pɔ.

²³ Wali kwɛlii gbo kaa mą, da ɉiɛ ləɠi kpɛli ɓa, gaa yɛ nui vaa woo nɛ̨ɛ̨, nii ɲɔ̨nwɔ̨ɔ̨ gwəi.

²⁴ Nui ɓɛlɛkpɛɛ mąą kaa ɉu, a noo vaa woo pulu, Kɛlaa, mɛlaa ɓowo mɛ̨nį ə ɓo goo kpala.

²⁵ A kɛi wɛlikɛmąą woo ɓo, 'hvó ə́ kili kɛ mą. Mąąhɔlɔɓo, kiliŋąhiɛ ɲɔ̨nwɔ̨ɔ̨ tamąą kaa gwəi.

²⁶ A nwɔ wɛlikpɛɛmąąlaa loo woo hveelɛ laa hu, Kɛlaa, nwɔ kiliɲɔ̨nwɔ̨ɔ̨laa kaa pai kulɔi pɔ̨nɔ̨ŋa, nu kəlee ɲɛ̨i ɓa.

²⁷ Nui a lɔwa tee a too ɉu. Nui a kwɛni kpuwulu kiliɠilin, a pənə ə pa mɛ̨i.

²⁸ Lɛɛmun a wɛlikpɛɛmąąlaa kulɔ a nuąi a lɛɛ pɛlɛ di nwuɔ̨. Woo hveelɛ laa a nu nwun na pili.