Hanwon 25 - Yálá laawoo hɛɓɛ (dc)

¹ Salomɔn nwɔ hanwonŋaai taɠaa ka nwɔ̨nɔ̨, yii Ɉuda tɔɔmun Ezekiasə nwɔ nuą di bɛ̨ɛ̨.

Hanwon da kpɛliɠaa

² Yálá nwɔ mąąwiɛ ɓaa, loo mɛ̨nį lɛɛ noo pələi. Tɔɔɓɛlaa di wɔ mąąwiɛ ɓaa, di mɛ̨nįɠaa mąąkpɛɛ.

³ Bələi yələkɔlɔn mąą kwɛa la, bələi lɔi kpon ɉu kwɛa la, bələ kpɔlɔɔ ɓə nu hva pɛli tɔɔɓɛlaa di wɔ kiliŋąhiɛ kpon ɉu kaai la.

⁴ Wali kwɛli hu hvaa, gbo a kulɔ mą, mąą a həɠə, kwɛliyɔwmun bɛli a hɛn nɛlɛɛ.

⁵ Nwąnąlɔmun ɉəɠə tɔɔmun gwɛlɛ, nwɔ tɔɔlaai a hvilɛn gbilin tələnmo pələ mɛ̨i.

⁶ 'Hvó ə́ kpɔwɔ ɲąą kɛnɛ̨ tɔɔmun nííla, 'hvó hee nu kpɛa-kpɛa heei.

⁷ Mąąhɔlɔɓo, di kɛ yɛ́ «'tɛ́ tɔwɔ» viɛlaɓoɔi, ə tɛɛ ə́ nwunmąą ɓa kalanɉonŋąą ɲɛ̨i ɓa.

⁸ Mɛ̨nįi ə́ ɲɛ̨i ə gaa, 'hvó humo 'hvó mo kiti haɠa ɓa, yili a kɛ tii, akɛ nui ŋɛ̨i ə́ ɉɔn doo a pa, tɛ̨ą a wala kɛ ə́ pɔ, lə ɓə kɛa yá gɛ?

⁹ Ka ə́ kɔ́ yɔwɔ ka ka lɔwai ponnaa kulɔ, Kɛlaa, 'hvó nu takpɛli nwɔ loo mɛ̨nį kulɔ pɔ̨nɔ̨ŋą.

¹⁰ Ə gɛ, mąą nu a mɛ̨n hvo pa nwumɛ̨ tɛ a yɛ́. Ə́ wɔ laa pələ ɓo wooi tii, hvo pa li kwɛa la.

¹¹ Mɛ̨nį lɛlɛɛ ɓoɔ a moi lɔwai kaa yɛ hɛni kpuwulu, nwəli la laa a wali kwɛli.

¹² Kilimąą mun a nu hɔn doo, yá ə́ nwəli tɔɔ mą a nɛlɛɛ, gaa yɛ hɛni gbono da hɛni kwɛɛn.

¹³ Yɛ bələi mɔ̨nun dɛɛi lɔwai kwɛlɛ kaa la, bələ lɔ ɓə wɛlɛɛ ɓomun nɛlɛɛ a nui dɔɔ níilaa la.

¹⁴ Nui a gbɔwɔ ŋąą kɛnɛ̨, yɛ gaa pai mɛ̨inɛ̨ɛ̨ kɛi hva gɛ, gaa yɛ tulɔi a dɛ hva pu.

¹⁵ Liikpələ ɓə ɲee tɛɛ kiti teemun ma, yɛ bələi woo nɛ̨ɛ̨-nɛ̨ɛ̨ a liikələn gwəi hu haa la.

¹⁶ Yá kwiɛn a kwɛ̨n nwulɔ, yii a pɛli yɛ́, yili kɔ̨mɔ̨, əgɛ, hvo pa lɛɛ kɔ̨mɔ̨i hvó ɓaɠi la.

¹⁷ 'Hvó laŋąn ə́ heeyɔwɔ yəi bɛlɛ́ laaləi a mɔlɔ, əgɛ vįi hvo pa kpɛɛ ə́ mąą mɛ̨nį hu, ə́ wɛli hvo kpɛɛ mą.

¹⁸ Nui a lɛɛ kɛla hvaa ɓo a mɛlan gaalon naa, gɛ pələ kaa yɛ, gbɔn gɛnɛ̨, yɛ ɓɔwa kwɛa, yɛ mɛ̨ɛ̨kɔw ɲąą kulaa.

¹⁹ Nu ya ə́ kilitɔɔ pulu kulɔmun ma a kɔ́ yələ, gaa yɛ nu ɲin mɛ̨i yaliɛ, a wala kɛ tii, nu kɔ́wɔ tɔ̨nɔ̨ kpuaa.

²⁰ Nu a kɛ mɛ̨nį nwąnąą hu, yɛ́ mąątɛ̨nɛ̨ a wələ woo, gaa a ɓowo mɛ̨nį, yɛ nu a həɠə kulɔ gwąną a kwɛlɛ yələ, a wala kɛ tii, yɛ nu a gaani-kponą pu pala ɲą.

²¹ Pulu a kɛ ə́ yowo ɓa, gɔ́ a kɔ̨nɔ̨n, kpələ wɛli a kɛ mą, yá laɠi tɛɛ bɔ.

²² Yá gɛ tii, a kɛ tii ə́ kaa nwɔ̨n dəŋą pui nwuɔ̨. Yai-Laa a ə́ hvɛla kulɔ.

²³ Hvaŋąi a tɛɛ yɛ tɛ, a tulɔ pu, bələ lɔ ɓə laamąąhiɛ a hvaa too la.

²⁴ Nu kɛɛ pɛlɛ́ hoŋon ɉu hviɛlaɓoɔi, ka hvaa kɛ nɛ̨ɛ̨nu ka kɛɛ pɛlɛ́n ma.

²⁵ Pələi yá laɠi a kwąną kpalamun níilaa la, bələ ɓə wɛlɛɛ nɛ̨ɛ̨i a həɠə kwɛa la, a gɛ la.

²⁶ Tələnmomun a too nwąnąlɔmun ɲɛ̨i ɓa, gaa yɛ da yá a nunu nwun gulɔi pələ, yɛ yálɔwa hu ya kalaa.

²⁷ Kwɛ̨n nwulɔ kɔ̨mɔ̨ɔ̨ dɛɛ ɲɛn ɉu, hvo lɛlɛ li. Ɓɛlɛ mɛ̨nį hvaa, nu ɓɛlɛmąą yɛ gbɔwɔ ɓɛlɛ kwɛli.

²⁸ Nui ɲee hva pɛli gbɔwɔ nwɔ líiholi ɓa, gaa yɛ taai mąąkpɛ hįi hvo mą.