Hanwon 24 - Yálá laawoo hɛɓɛ (dc)Kilimąą mun da nwąnąlɔ mun 1 'Hvó nwąnąlɔ kulɔ nuą pɔɔ kɔ́ɔn, nąą wɛli hvo too yɛ́. Di wɔ hiɛ gee pulu laa wɛli hvo too yɛ́. 2 Mąąhɔlɔɓo, di wɔ kiliŋąhiɛ lɔ ɓaa di toomɛ̨i kɛ. Mɛ̨nį ɲɔ̨n di kaa lii gɛi, ya lɔ ɓə gaa di la. 3 Kili kɛ ɲəi ɓə a pɛlɛ́ tɔɔ, nwun gɛ ɉu laa ɓə, a mu yíi ɓo laa nɛ̨ɛ̨ gɔwɔ hvilɛn ŋąą la kpilin. 4 Mɛ̨nį kɔ́lɔn gili ɓə a hɛn nɛlɛɛɠaa kɛ bɛlɛ́ɠaa mu. 5 Kili ɓə gaa a kilimąą mun nwɔ huwalawala. Mɛ̨nį kɔ́lɔn ŋąą a nu nwɔ hvaŋą ta pɛlɛ mą. 6 Mąąhɔlɔɓo, a kɛ tii, yá kɔ́ kɔ́ a kili. Liɛwoo lɛlɛɛɠaa ɓə yeetɛɛmąą a hɔlɔɓo ɉu. 7 Kili kaa a yee kɛnɛ̨, kilikpɛɛgwəi mun ɲɛ̨i ɓa. Da kɛ nwun dɔɔ hu, hva pɛli pələ ɓoi. 8 Nui mɛ̨nį ɲɔ̨n gɛ kili kaa mą, da kɛ mą: Gbanalaa ɲɔ̨nwɔ̨ɔ̨ kɛmun. 9 Hɛn lɔ kilikpɛɛgwəi a giliŋąhiɛ mą, ya ɓaa nɛ̨ŋɛ̨n ɉəɠɛɛ. Yɛlɛ kulɔ ɉumun nwɛli hvo yɛnɛ̨ɛ̨ nuą diɛ. 10 Ɲələi líitoo pulu mɛ̨nį a həli la yɛ́, yá wala ə́ liikpələ, hvaŋą hva lɛɛ ə́ yəi. 11 Nui nwun na pili pələ mɛ̨i, gɛ pələ kwɛli mą, ə́ nwun mąąɓo. Nuąi daa di hon, diɛ li di paai, diɛ tɔɔ yai-yai, kpɔmąą tɛɛ di pɔ, ə́ di kulɔ ɉu. 12 Ə́ kaa kiɛ pai kɛi diɛ: «Ku kili hvo pu ɉu!» Kɛlaa, nui a nu nįį hu kaa, ə gbaɠala kɔ́lɔn. Gaa pai nu kəlee hvɛla kulɔi, yɛ pələi di túwɔ́ pələ kaa la. 13 Nón, kwɛ̨in nwulɔ nɛ̨ɛ̨i. Kwɛ̨i gban nwulɔ a kɛ ɉu, neen a lɔ nu nɛ̨ŋɛ̨n-nɛ̨ŋɛ̨n mu. 14 Ə́ kili ə pu ɉu, yɛ́ kɛ pələ lɔ ɓə kili mɛ̨nį kaa la yɛ́, yá kili hɔlɔɓo, ə́ kaa pai yɛnɛ̨ɛ̨ kɛi, ə́ wɔ kilitɔɔ mąą hva kala, ə́ tinąą ə lɛlɛ. 15 'Nwąnąlɔmun, 'hvó hɛlɛn dɛ tələnmomun nwɔ pɛ́lɛ́i ɓa, 'Hvó too nwɔ pɛ́lɛ́i mɛ̨i. 16 Mąąhɔlɔɓo, tələnmomun a pɛli mą tooi gee mɛ̨i mɛ̨ihveelɛ, yɛ muhəɠə, Kɛlaa, nwąnąlɔ nuą da di laanɔ̨nwɔ̨ ɓo mɛ̨nį ɲɔ̨n ɉu. 17 Ə́ yowo a too, ə́ kwəi hvo nɛ̨ɛ̨. A gɔwɔ tuwɔ, 'hvó pili yələi a kwəinɛ̨ɛ̨. 18 Ə gɛ, Yai-Laa hvó pa naa kaa, hvo nwąną mą; mɛ̨nįi yɛ ə naa ə́ yowo ɓa, hvo pa ɲɛ̨i tinɛ̨n. 19 Ə́ líi hvo kələn ə́ kwəi, nu ɲɔ̨nwɔ̨ɔ̨ɠaa mąą mɛ̨nį ɓa. Ə́ ɲɛ̨i hvo kulɔ di túwɔ́ pələ pɔ. 20 Mąąhɔlɔɓo, mɛ̨nį ɲɔ̨n gɛ nuą di tinąą hvo diɛ; ɛlɛɛ, mɛ̨nį ɲɔ̨n gɛ nuą di wɔ nwɔ̨n a luwun. 21 Nón, ɲɔw Yai-Laa ɓa, da tɔɔmun. Nuąi da nɔgili kɛ, diɛ mɛ̨nįɠaa mąąhvalin, 'hvó too di pɔ. 22 Mąąhɔlɔɓo, nɔgilii kɛ nuąi tii, mɛ̨nį nwąnąą ta a pɛli ə laa diɛ. Mɛ̨nįi tɔɔmun da Yai-Laa da pɛli naa nui tii ɓa, gbɛɛ ɓə gɔlɔn? Liɛwoo takpɛliɠaa 23 Kilimąą nuą hvaa woo ta lɔ ka: Kiti teɛ a ɲɛ̨ikɔlɔn, hvo lɛlɛ li. 24 Nui a kɛ kɛɛ kalamun ma: «Tɛ̨ą kaa ə́ pɔ.» Nɔi nuą da nɛ̨ŋɛ̨n naa, nwɛli ə kpɛɛ lɔi ɓa. 25 Kɛlaa, nui a mɛ̨nį ɲɔ̨n gɛmun ɉutɔɔ, nu kəlee da mąątɛ̨nɛ̨, nuą diɛ lúwɔ́ too mą, ɛlɛɛ nwun na a nɛ̨ɛ̨. 26 Woo ŋąąpənə kɛɛ a tɛ̨ą, a nɛ̨ɛ̨laa pələ kulɔ. 27 Ə́ kɛ kolóɠaa laa kulɔ ni ɲɛnɛ̨ɛ̨ pələ, ə́ ə́ pɔ yɛa mɛ̨nį ɲɛ̨i kulɔ; yili pulu, yá pɛli kɛa mą ə́ ə́ wɔ pɛ́lɛ́i tɔɔ. 28 'Hvó lɛɛ kɛla hvaa ɓo a ə́ ɓɛlan gaalon naa. A kɛ tii, ə́ kaa mɔ̨ɔ̨ bɔ ə́ nuą ɓowo a ə́ laaləi? 29 'Hvó kɛ mą: «Bələi tii ə gɛ la a ɲą́ą́, bələ ɓə gáá gɛi la a yaa. Bələi tii dúwɔ́ pələ kaa la, bələ ɓə gáá gwələ kulɔi la.» Hviɲɛ̨mun mąą mɛ̨nį 30 Ŋą́ tɛɛ hviɲɛ̨mun da yəi ɲɛa, nu hɛɠɛɓoɔ ta ŋą viɲə yɛa kwɛlɛ. 31 Ɲąąlən da tumɔ ɲɔ̨nwɔ̨ɔ̨ɠaa daa tiliin ɲɛa naa kəlee, nwɔ tíi mąąkwəli kwɛni, aa pu. 32 Ŋą́ nąą kaa kpɔ a nɛlɛɛ, ŋį́ nąą mąąkpɛɛ, ŋį́ kili hɔlɔɓo. 33 Gɛ́ diɛ: Nu a yíi tiikpə, ə yíi woloɓo a nwun tiikpə, ə ɲee pili gee hu, yɛ ɓo laani! 34 Nąąlɔwai, mąąwɛlilaa ə hee ə́ mɛ̨i, yeehvowololaa a pu ə́ mɛ̨i, yɛ toomɛ̨i kɛmun. |