Hanwon 23 - Yálá laawoo hɛɓɛ (dc)

¹ Ka nu kɛnɛ̨ ka kɛi kɔ̨nɔ̨n mįi, 'gɛ a nɛlɛɛ.

² Ə́ wɔ kɔ̨nɔ̨n mįi pələ yɛlɛ kɛ, ə mą kɛ pulu kaa yɛ́.

³ Ə́ ɲɛ̨i hvo kulɔ yii gaa nií la bɔ, mąąhɔlɔɓo, da pɛli ə́ təlii gɔ̨nɔ̨n tii ɓa, a kiliŋąhiɛ takpɛli.

⁴ 'Hvó ə kpɔwɔ hviikpɛɛ, yɛ́ kɛ ə́ kaa kɛi a hɛn gɔw nąmu, 'hvó ə́ níí laa yili mɛ̨i.

⁵ Mąąhɔlɔɓo, ɓɛlɔwai ə́ ɲɛ̨i a tɔɔ la mą, yɛ́ kɛ yaa ɉon, nąąlɔwai ɓə a kwɛlɛɛn na, a kɛ yɛ goon a kɛ mą, ə koon yɛ tɛ yələ kwəi yɛ nwɛ̨nį kɛnɛ̨.

⁶ 'Hvó hɛn nwɛlimun yəi kɔ̨nɔ̨n mįi, ə́ ɲɛ̨i hvo kulɔ nwɔ kɔ̨nɔ̨n bɔ.

⁷ Mąąhɔlɔɓo, nwɔ kiliŋąhiɛ hu, a mɛ̨nįɠaa gwɛdɛn gulɔi, yɛ kɛ yɛ́: «Ə́ laa mįi, ə́ ə́ kpələ.» Kɛlaa, a tɛ̨ą, nwɔ kiliŋąhiɛ hva kɛ a nɛlɛɛ, yɛ hvilɛn na yɛ́.

⁸ Yi woloi tii ə́ mįi, naa dai a gɛ, yá maɠi, ə́ woo lɛlɛɛi tii ə mo, gəlee da lɛɛ a kpɛli.

⁹ 'Hvó loo mɛ̨nį ɓo kilikpɛɛgwəi mun ma, mąąhɔlɔɓo, hvo kilimąą woo dɔ̨nɔ̨ kɔ́lɔn.

¹⁰ Ka ɲɛ̨n ŋɛ̨i wɔlɔ di dɔɔ, 'hvó laŋin mɛ̨i, 'hvó təlilon nwɔ kɛɛnąą kulɔ ɲəi.

¹¹ Mąąhɔlɔɓo, di tɔɔ bulu kɛmun ɲee walawalaai. Yálá kpinį ɓə a di mąąkɔ̨nwɔ̨mun.

¹² Mɛ̨nįi di kaa ə́ kalan ɉii la, ə́ lii laa ɓo dɔwɔ, ə́ ə́ wəli tɔɔ mɛ̨nį kɔ́lɔn nwoo ɓa.

¹³ 'Hvó hutɔɔ hvaɠa mąą kwɛa lokolo ɓa, yá gɛlɛ aa hvaɠa, yili hva baa.

¹⁴ Kɛlaa yaamun, yá kɛi gɛlɛ a hvaɠa, a kɛ tii yáá gulɔ ɲąmuątaa.

Lon nąn nwɔ liɛwoo

¹⁵ Nón, yá kili mɛ̨nį wɛli la kɛ, yili a gwə́inɛɛ kpɔ kɛnɛ̨.

¹⁶ Gwə́i a nɛ̨ɛ̨ akɛ yá kɛi mɛ̨nį ɓo a ɉaŋąą.

¹⁷ Ə́ ɲɛ̨i hvo kulɔ nɛ̨ŋɛ̨n ɉəɠə nuą túwɔ́ pələ pɔ. Kɛlaa, nuąi da ɲɔw Yai-Laa ɓa, ə́ ɲɛ̨i ə kulɔ di túwɔ́ pələ pɔ a yələ kəlee.

¹⁸ Mąąhɔlɔɓo, yili ɓə ə́ tinąą kaa ɉu, ɛlɛɛ, ə́ wɔ kilitɔɔi hva kala.

¹⁹ Yɛ́i ŋɛ̨i a nón, ə́ wəli tɔɔ, ə́ kili hɔlɔɓo, a kɛ tii, yá hiɛ a ɉaŋąą ə́ wɔ yɛnɛ̨ɛ̨ hu.

²⁰ 'Hvó too lɔɔ kpələ nuą pɔ, ə mą kɛ, nuąi da di koo laahvɛɛ a huwɔ.

²¹ Mąąhɔlɔɓo, lɔɔ kpələmun da kwəi kɛnɛ̨mun da too yeehowololaa hu; ɛlɛɛ, yíi kɛnɛ̨ a həɠə haɠa too nu kwąną.

²² Ə́ wəli tɔɔ ə́ kaa nąn ma, ə́ lee a pɔlɔ, 'hvó mɛlɛkpɛɛ mą.

²³ Tɛ̨ą, kili, nwun gɛ ɉulaa da hutɔɔ, gwɛli; yɛ́ ɉɔlɔɓo, 'hvó nɔwɔtɔɔ.

²⁴ Tələnmomun nąn a pili yələi a kwəinɛ̨ɛ̨. Nui a kilimąą lon gaa, a kwəinɛ̨ɛ̨ hɔlɔɓo non tii pɔ.

²⁵ Gwəinɛ̨ɛ̨ tii ɲɔ̨nwɔ̨mąn dɛɛ ə́ nąn da ə́ lee di pɔ, nɛ̨ɛ̨nui ŋɛ̨i ə́ kaa, ə pili yələi a kwəinɛ̨ɛ̨.

²⁶ Nón, ə́ kilitɔɔ mą́ą́, ə́ ɉíɛ pələ pɔɔ həɠə.

²⁷ Mąąhɔlɔɓo, wɛlikɛnɛ̨ɛ̨nu kaa a lɔwa kpon ɉu gwɛa, ɛlɛɛ, nu takpɛli nɛ̨ɛ̨nu kaa a yálɔwa hu koloon ŋąą.

²⁸ Yaa kpinįi tii, a noo nuą tɔwɔ, yɛ toomɛ̨i kɛ mun, a woo taɠa taɠa too hinąą lɔwai.

Lɔɔ hon nwɔ kɛ pələ

²⁹ Gbɛɛ nwɔɔ ɓaa «Gboo təli woo?» Gbɛɛ ɓə a kɛ mą: «Ka pa mą́ą́!» Gbɛɛ nwɔɔ ɓaa «Hvaa!» Gbɛɛ nwɔɔ ɓaa «Woo laa»! Gbɛɛ ɓə «da mąąnwąną, nwun və mą!» Gbɛɛ nwɔɔ ɓaa «nwun ɉu tinɛ̨n!»

³⁰ Nuąi da di kpɔwɔ tɛɛ lɔɔ pɔ, di hvilɛn ŋąą diɛ lɔɔ kpəgiɛ kwɛli, diɛ ɓə.

³¹ Nɔɔ ŋɛ̨i gɔwɔ hu yɛ nɛn, ə́ ɲɛ̨i hvo kulɔ nwɔ lɛlɛ laa pɔ, yai a hvili, yɛ pu.

³² Kɛlaa, nɔɔi tii ŋąąkpɛɛi, a nu ɲin yɛ kaalə. Ɲin gbolo kaa mą yɛ gbaalawolo.

³³ Ə́ ɲɛ̨i a hɛnŋąą tamąą kaa a gɔwɔɓɛɛ, yɛ́ hvaa poto-poto.

³⁴ Yá kɛ yɛ nu a kɛ laani yá hvɛɛ ŋą, yɛ yá kɛ wulu kpala ton na.

³⁵ Ə́ woo laa diɛ: Daa gɛ́lɛ, Kɛlaa, və́ ɲąą kaa li; daa ɉú lɔwa, gɔlɔ hvo gili kɔ́lɔn ni, mįnɛ̨ lɔwai ɓə gáá pai muhəɠəi la, ŋį́ li ŋį́ da kwɛli nwɔ̨nɔ̨?