Hanwon 22 - Yálá laawoo hɛɓɛ (dc)1 Nu laa lɛlɛɛ tɛ́ɛ hvialbaɓoɔi hɛn gɔw kɛnɛ̨ ɓa. Nu wɛli kɛɛ mɛlaa diɛ hviɛlaɓoɔi ə tɛɛ, wali da hɛni diɛ. 2 Hɛn gɔw nąmu da yeehvowolomun, di tɔɔi kaa tanɔ̨n, Yai-Laa ɓə gəlee hveelɛi pɛli. 3 Nui daa gilaa pɔ̨nɔ̨, a mɛ̨nį ɲɔ̨n gaa yɛ pa, a mąą kilɛ. Nuąi di hva di kiliŋąhiɛ, da lɛɛ a di nwun vilɛn ŋąą, mɛ̨nį ə laa diɛ. 4 Nui a gbɔwɔ mąą yɛɛ Yai-Laa yee mu, yɛ ɲɔw mą, vɛla ɓaa yee la hvólóon, mąąwiɛ, da lamun yɛnɛ̨ɛ̨. 5 Nui dúwɔ́ pələ hvo haŋą li, ɲąąlən gɔw da ɓaalə di kaa gbaalə hu, nui gaa bɔ ə lamun yɛnɛ̨ɛ̨, a mąą kwɛa mą. 6 Lokolo lɛɛ tiikpə, ə́ galan a kpaalə mąąnɛ̨ɛ̨ ə hiɛ la, ə mą kɛ aa pɔlɔ, hva lɛ̨ą mą. 7 Hɛn gɔw nąmu a hee yeehvowolomun mɛ̨i, kwələ tɔɔ mun nwɔ luwɔ ɓaa kwələ həɠə mun. 8 Nui a hɛlɛn dɛ a hvįikpɛɛ, laanɔ̨nwɔ̨ ɓə a gulɔ. Nwɔ lii pɔ tee laa kɔ́lɔ a haa mą. 9 Nui nwɔ kɛɛ kaa lɛlɛɛ, a lúwɔ́ hɔlɔɓo, mąąhɔlɔɓo, aa nwɔ kɔ̨nɔ̨n ta tɛɛ yeehvowolomun bɔ. 10 Yɛlɛ mąą kɛ nuą kpɛɛ, a hvaa kpɛɛ; ə woo hukulɔ tamąą da ɓɛlɛkpɛɛ mąą di kpɛɛ. 11 Nui wɛlikɛmąą woo kaa na, da kiliŋąhiɛ lɛlɛɛ, mąą nu ɓə nwɛli a too tɔɔmun ma. 12 Yai-Laa a mɛ̨nį kɔ́lɔn ŋąą leelee mɛ̨i kaa, yɛ nu ɲɔ̨nwɔ̨ɔ̨ɠaa woo mąą kpoloon. 13 Hviɲɛ̨mun mə a kɛ mą: «Yala kaa ɲɛnɛ̨ɛ̨, və́ kulɔi laa, hvo pa báá bələ pɔ.» 14 Wɛli hon nɛ̨ąą laaləi kaa a ɓoloon, nui nwɛli hvo Yai-Laa ɓa, ya ɓə a too ɉu. 15 Ɓowo mɛ̨nį kanąn ŋąąi lokolo lii pɔ, hutɔɔ hvaɠa ɓə a gulɔ nii pɔ, ə mąą kwɛa mą. 16 Nui a mɔ̨nɔ̨ laa yeehvowolomun mɛ̨i, a lɛɛ ɉu, ɲeehvowolomun tii ə kɛ a hɛn nąmu. Nui a hɛn gɔw nąmu kɔ́ hɛn, a gbɔwɔ hvɛɠɛ. Kilimąą nuą hvaa woo 17 Ə́ wəli tɔɔ, ə́ kilimąą nuą woo mɛ̨n, mɛ̨nįi ŋɛ̨i gáá ə́ kalan ɉii la, ə́ kili lɛɛ ɉu. 18 Mąąhɔlɔɓo, yá ə́ kili lɛɛ ɉu, ə́ naaikɛ ə́ líi hu, a ə́ laaləi kɛ kili pələ ɓo laaləi. 19 Gɛ́, ə́ ə́ kilitɔɔ Yai-Laa ɓa, yili ɓə gɛi, gɛ́ ə́ kalan na nwɔ̨nɔ̨, a mɛ̨nįɠaa háákələi. 20 Ŋą́ liɛwoo tamąą da kilimąą woo tamąą pɛ̨ɛ̨ a ə́ wɔɔ. 21 Yiliɠaai da gɛ ə́ kili ə pu tɛ̨ą mɛ̨nį hu, yɛ́ pɛli kili pələ ɓoi ə́ kwɛlɛ nuą diɛ a tələnmolaa. 22 'Hvó ə́ mɛ̨n mąąwɛlimun nwɔ mąąwɛlilaa ɓa, 'hvó mąą kpoloon. Nui dɔɔ bulu hvo mą, 'hvó naanɔ̨nwɔ̨ ɓo. 23 Mąąhɔlɔɓo, Yai-Laa a nuą tii mąąkɔ̨nwɔ̨, nuąi da hɛn gulɔ di yəi, Yai-Laa yaa kpɛli a hɛn gulɔ mąą nuą yəi. 24 'Hvó liikələn gwəimun gɛ a ə́ hiɛ gee pulu, ə́ mąą kwɛa hvaa teemun ma. 25 Ə gɛ, hvó pa kɛ yɛ yaa, hvó ɓaalə tɛ ə́ kpɔwɔ tɔwɔ, ə́ wɔ yɛnɛ̨ɛ̨ kɛ pələ hu. 26 'Hvó too nuąi da kɛ a kwələ kɛla di pɔ, 'hvó kɛ a nu ta ŋą kwələ kɛla; 27 ə gɛ, yá wala gwələ kulɔ hɔlɔɓo, di hvo pa ə́ laa gbin ɉəɠə da ə́ laahəɠə. 28 Nɔi ɲɛ̨n wɔlɔ ə́ nąnni di naa, hvó ɉəɠə naai. 29 Yá nu kaa ɲɛlɛɛ di kɛ koló hu, hva lɛɛ noo pələi, Gaa pai kɛi a tɔɔɓɛlaa di wɔ tímun. |