Hanwon 19 - Yálá laawoo hɛɓɛ (dc)

¹ Nu kɛɛ a yeehvowolomun, ə́ tələnmoɔ, viɛlaɓoɔi ə tɛɛ nu kɛɛ a kilikpɛɛgwəi mun, yɛ́ lɛɛ kɛ, ɓa.

² Nu kwəinɛ̨ɛ̨ mɛ̨nį hu, hvo gbaɠala kɔ́lɔn, yili hvo lɛlɛ li. Nui a kpɛlin mɛ̨nį ɓa, a lan.

³ Nu nwɔ ɓowo ɓə a nąn, a kɛ tii Yai-Laa ɓə mąą nu a níiholi bɔ.

⁴ Hɛn gɔw a nu mɛlaa tamą, Kɛlaa, yeehvowololaa a ɓɛlannaa mąą kwɛa nu ɓa.

⁵ Nui a kɛla hvaa ɓo a lɛɛ, ɉu tɔɔ mɛ̨nį hva ɉəɠə mą. Nui a lɛɛ kɛ, nwun va kulɔ ɉu.

⁶ Nui ɲɛ̨itɔwɔlaa kaa mą, nu tamąą da dɛ̨nɛ̨ ɲɛ̨i ɓa, nui a mɛ̨inɛ̨ɛ̨ kɛ, gaa a nu kəlee mɛlan.

⁷ Yeehowolomun gaayɔɠoa da nwɛli kpɛɛ diɛ. Gu hvo mun, kɛ mɛlaa yiiɠaai da di mąą kwɛa mą. Ɓɛlɔwai a kɛ pɔ ə mɛ̨nį too la diɛ, di hva kɛa kɛ laa.

⁸ Nui a kili hɔlɔɓo, a gbɔwɔ wɛlilakɛ, nui a ɲee kanąn nwun gɛ ɉulaa ɓa, bulu a nɛɛ mą.

⁹ Nui a kɛla hvaa ɓo a lɛɛ, ɉu tɔɔ mɛ̨nį hva ɉəɠə mą. Nui a lɛɛ mɛ̨nį ɓo, nwun a lɛɛ ɉu.

¹⁰ Mąą hvo nɛ̨ɛ̨li, kilikpɛɛgwəi mun hvo kɛ nɛ̨ɛ̨ hu, gu hvo mun kɛ luwɔ yɛ tɔɔlaa ɲąąwooɓo.

¹¹ Mɛ̨nį ɲąąkaamun nii kələn naa walaai gwəi, ɛlɛɛ, mąąwiɛ mɛ̨nį ɓaa, ə gili kulɔ lalan ɉu.

¹² Tɔɔmun a níiholi, gaa yɛ Yala a kɛi kpəɠi, Kɛlaa, a ɲɛ̨i lɛlɛɛ hee yɛ́, gaa yɛ nɛnɲá.

¹³ Lon gilikpɛɛɲəi kaa a nąn nwɔ mąąwɛli mɛ̨nį. Nɛ̨ąą di wɔ hvaa kaa yɛ yái a hvilɛn tən tən, hva kpəla mą.

¹⁴ Pɛlɛ́, hɛn gɔw, nu a pɛli ə ɉɔlɔɓo a nu nąn gwɛlin. Kɛlaa, kilimąą nɛ̨ɛ̨nu kaa a Yai-Laa yəi mɛ̨inɛ̨ɛ̨.

¹⁵ Hviɲɛ a nu kɛ a nu ɲą́ą́, nui vįikpɛɛ, ya ɓə pulu a baa.

¹⁶ Nui a tɔ́n nwoo hon, mąą nu a gbɔwɔ laa hon mo. Nui hva dúwɔ́ pələ ɲɛlɛ kɛ, a haa kwɛli a gbɔwɔ.

¹⁷ Nui a mąąwɛlimun mąąwɛli kaa, aa kwələ tɔɔ Yai-Laa ɓa, gaa pai pənəi ə bɔɔi tɛɛ bɔ.

¹⁸ Ə lon ɉutɔɔ a kpɔmąą tɛɛ pələ bɔ. Kɛlaa, hvo ɉutɔɔ a baa pələ.

¹⁹ Nui a níiholi kɛnɛ̨, hvo kɛ li di tɔ́n naa mą. Da wala gɛ tii, a kɛ tii, di kaa ɲąątɔɔi a dakpɛli kɛ mɛ̨nį.

²⁰ Ə́ wəli tɔɔ liɛwoo ɓa, mɛ̨nįi di kaa ə́ kalan ɉi la, ə́ ɉon; yili ɓə a nu kɛ a kilimąą mun tɔwɔ pələ.

²¹ Mɛ̨nį tamąą ka tii nu a mąą kili tee gwəi, Yai-Laa kwəi kili ɓə a nɛ̨ɛ̨ mą.

²² Hɛn da gwɛli nu yəi ya ɓaa a kulɔ nwoo ɓa laa, yili ɓa, yeehvowolomun viɛlaɓoɔi lɛɛmun ma

²³ Nu ya ɲɔw Yai-Laa ɓa, a nu ɓalo. Ɲɔw mąą tii, a nu niilɔ, ya yɛnɛ̨ɛ̨ kɛ, mɛ̨nį nwąnąą hva ə́ hɔlɔɓo.

²⁴ Hviɲɛ̨mun a ɲee lɔ kɔ̨nɔ̨n ɉu hva pɛli dɛi na.

²⁵ Da yɛlɛkulɔɉumun gɛlɛ, a kili tɛɛ kilikpɛɛgwəi mun bɔ. Ya mɛ̨nį kɔ́lɔnmun ɉɔn doo ma, a kili hɔlɔɓo ɉu.

²⁶ Nui a too nąn mɛ̨i, a gaalee kulɔ pɛlɛ́n, ə ɓáákulɔ gaa nuą diɛ.

²⁷ Nón mɛ̨nįi di kaa ə́ liɛwoo kɛi la, yá yili lɛɛ, yá həɠə kili pələ mɛ̨i, hvá mɛ̨nį kɔlɔn.

²⁸ Da nu kpoloon gɛ a kɛla, a yɛlɛkulɔ tɛ̨ą hu. Nwąnąlɔ nuą da hvulu mɛ̨nį kɛ a di kɔ̨nɔ̨n.

²⁹ Hutɔɔ hvaɠa kaa a yɛlɛ mąą kɛ nuą di wɔɔ, ɛlɛɛ, gbɔn ə ɓo kilikpɛɛgwəi nuą hąą.