Hanwon 18 - Yálá laawoo hɛɓɛ (dc)

¹ Nui gbɔwɔ nwɔ tɔ̨nɔ̨ wɛli kaa mą, a tɔɔ dɔ̨nɔ̨ konɉu. Da niɛwoo kɛ a nwąną mą.

² Nui gili hvo ɲəi, kili mɛ̨nį hva nii hon, Kɛlaa, gwəi mɛ̨nįɠaa lɔ ɓə mo wɛli kaa mą.

³ Nwąnąlɔmun a pa lɔ-oo, ɓɛlɛkpɛɛ mąą mɛ̨nį pa hiɛ li, ɓɛi tɛɠɛɓo ɉu a pa lɔ-oo, lalan ba hiɛ li.

⁴ Nu hvaa woo kpon ɉu kwɛai, yɛ palə. Kili mɛ̨nį kaa yɛ yáton hva kpala.

⁵ Mąą hvo nɛ̨ɛ̨li nu hvo tɔɔ nwąnąlɔmun bulu, hvo nu haŋąą nwɔ tɛ̨ą kpəlaan.

⁶ Kilikpɛɛɲəimun vaa woo a hvaa too, a pələ ɓo, hvo kɛli kɛlɛ ɓo a kulɔ ɉu.

⁷ Kilikpɛɛɲəimun naaləi a nwun na pili, vaa woo ə ɓo a hɛlɛn yii a dɛ gbɔwɔ tɔwɔ.

⁸ Nui a mɛlaa laa ɓo, vaa woo kaa yɛ lówohɛn, a yɛɛ kpɔ nu lii pɔ, yɛ həli nu yɛlɛ ɓa.

⁹ Nui a gɛ koló kɛ a hviikpɛɛ, gaayɔwɔ ɓaa kɛɛ kalamun.

¹⁰ Yai-Laa laa kaa a nu mąąkpɛɛ hįi. Nu haŋąą a noo ɉu, mɛ̨nį ta hva ɉɔlɔɓo.

¹¹ Hɛn gɔw nąmu nwɔ hɛn gɔwi kaa a mąąkɔ̨nwɔ̨ taa. Gaa nwɔ ɲɛ̨i mu yɛ hįį mɛ̨i kwɛai kɔ́ hva gulɔ.

¹² Nu a wala ni too, ɉuɲąɲą kɛnɛ̨i, Kɛlaa, gɛɛ di hvo nu ɲɛ̨i pɔ̨nɔ̨, mąąnɛ̨ɛ̨ ə gbɔwɔ mąą yɛɛ.

¹³ Nui hva nwəli tɔɔ nu woo ɓa, yɛ mɛ̨nį hutoo, ɓowo mɛ̨nį kɛnɛ̨ li, mąą nu a nwumɛ̨ tɛ a gbɔwɔ.

¹⁴ Nu kwəi kili lɛlɛɛ ɓə a kpɔmąą tɛɛ bɔ ɲɔ̨n ɉu, Kɛlaa, a kɛ gili lɛlɛɛi tii mąą a hvalin a ɲɔ̨nwɔ̨ɔ̨, gbɛɛ ɓə ɲee a lɔ mą, ə bɛli.

¹⁵ Nui nwun gaa ɉu, ya ɓə a kili mɛ̨nį kwɛli, kilimąą mun nwəli a mɛ̨nį kɔ́lɔn gili kwɛli.

¹⁶ Hąmą pilɛ a pɛlɛ́ kəlee laa ɓo, yɛ nu lɔ tɔɔɓɛlaa yəi bɛlɛ́n.

¹⁷ Mɛ̨nį too tɔwɔmun, a kɛ yɛ tɛ̨ą a kɛ bɔ, gɔ́ yɔwɔ a pa, ə ɉɔn mo.

¹⁸ Da lɔwɔ lɔ, a hvaa kɛ nuą hveelɛ taɠa di kee ɓa, yɛ hvaa kpɛɛ nu kpɛa-kpɛa lɔwai.

¹⁹ Kaayɔwɔ hvaa hu hon naa walaai, ə tɛɛ kɔ́ taa walawala hon ŋąą ɓa. Vaa taaləi tii a walawala yɛ kwɛli.

²⁰ Nu hvaa woo nɛ̨ɛ̨ a pɛli ə gɔ̨nɔ̨n ɉɔlɔɓo, yii a mo, a kpɔmąą tɛɛ bɔ nwɔ yɛnɛ̨ɛ̨ kɛ pələ hu.

²¹ Nu ɓalo mɛ̨nį da nu haa mɛ̨nį, a kulɔ vaa woo hu, nui a nɛ̨n ɉon a nɛlɛɛ, ya ɓə a dɔ̨nɔ̨ hɔlɔɓo.

²² Nui a nɛ̨ɛ̨nu lɛlɛɛ hɔlɔɓo, aa nwun na nɛ̨ɛ̨ hɔlɔɓo, Yai-Laa yəi mɛ̨inɛ̨ɛ̨ ta li.

²³ Yeehvowolomun a pələ ɓo a nɛ̨ɛ̨ mąą hvə pələ, hɛn gɔw nąmu yɛ nu woo hutoo a hilɛwoo.

²⁴ Nu mɛlaa da tamą, ɲowo a kɛ ɉu. Ɓɛlan gbəli kaa laa, ə kanąn nu ɓa, ə tɛɛ nee lon ma.