Hanwon 17 - Yálá laawoo hɛɓɛ (dc)

¹ Ɓákpon mįɛ liilaa hu, hviɛlaɓoɔi pɛlɛ́ laahvɛɛ a kɔ̨nɔ̨n ma, hvaa ə ɓo laa.

² Luwɔ mɛ̨nį hukpɛ kili kaa mą, a hee lon a nwumɛ̨ tɛ a gaa nuą, nwun na, da bɛlɛ́n nɛapɛlɛɛ, da kpɔn di bɛlɛ́n ɉɛnŋąą diɛ.

³ Wali, hɛni, da di huwaa a hvuluun nwɔ̨n, Kɛlaa, Yai-Laa ɓə a nu líi hu mɛ̨nį huwaa.

⁴ Nwąnąlɔmun ɉɛlɛn ŋąąi lɔ hvulumun nwoo ɓa, lɛɛmun nwəli tɔɔi mɛ̨nį kalamun nwoo ɓa.

⁵ Nui a yɛlɛ kulɔ mąąwɛlimun ɉu, a kɛ tii, Yálái mąąwiɛlimun tii pɛli, ya ɓə gaa lalan ɉii. Nui a kwəinɛ̨ɛ̨ kulɔ mąąwɛli mɛ̨nį hu, hva lɛɛ tii, hvo kɛli di ɉutɔɔ.

⁶ Hulɔgoloɠaa di mąą hon mɔlɔ ɓaa di mąnįnni, lɛapɛlɛɛ ɲɛ̨i pɔ̨nɔ̨mun mąą di nąn.

⁷ Pələ ɓoɔ a mąą kpalaa, mąą hvo nɛ̨ɛ̨li nu tupɛ-tupɛ la, yɛ bələi lɔ, lɛɛ woo mąą hvo nɛ̨ɛ̨li la ɲɛ̨itɔwɔmun nai.

⁸ Mɛ̨inɛ̨ɛ̨ kaa a nwun na nɛ̨ɛ̨ hali, pələi lɔpee a ɉon na, ɉu a nɛ̨ɛ̨ mą.

⁹ Nui ɓɛlannaa wɛlikaamą, a lɛ̨ą mɛlan ɉɔn ma, yá kɛi ɉɔn doo mą kɛlɛ-kɛlɛ, a mąą kwɛa yɛ́.

¹⁰ Mɛ̨nį toɔ kilimąą mun ma, dɔlɔ kaa mą, ə tɛɛ hvaɠa ɲąą nwun dɔ̨nɔ̨ kulaa kilikpɛɛgwəi mun ɉu, ɓa.

¹¹ Kwɛliteelaa lɔ ɓə nwɛli kaa mɛ̨nį ɲɔ̨n gɛmun ma. Kɛlaa, di kaa pai wɛlɛɛ ɓomun gili ɲɔ̨nwɔ̨ɔ̨ tɔɔi bɔɔli.

¹² Kwɛ́li-háái daa nonnii kulɔ ɲəi, da nu di kwiɛn ŋąą hviɛlaɓoɔi, ka ɓowomun ka kwiɛn, nwɔ ɓowoi a gulɔ.

¹³ Nui a mɛ̨nį lɛlɛɛ kwələ kulɔ a mɛ̨nį ɲɔ̨nwɔ̨ɔ̨, mɛ̨nį ɲąąnwąnąą hva tee ɲəi bɛlɛ́n.

¹⁴ Nui a hvaa kɔ́wɔ tɔɔ, gaa yɛ nui a gaɓan ɉəɠə yá tɔwɔ. Gɛɛ vaa hu hvo kɛnɛ̨, həɠə laa.

¹⁵ Nui a tɔɔ hɔn mąąmun bulu, da nui a tələnmomun gɛ a hɔn mąąmun, nu hveelɛi tii, di wɛli kpɛɛi kpɔ Yai-Laa ɓa tɛ-tɛ.

¹⁶ Wali kɛɛ kilikpɛɛgwəi mun ɲəi, dɔlɔ ɓaa lə? A pɛli mɔ̨ɔ̨ kili hɔlɔɓoi la? Kili hvo yaai tii mą.

¹⁷ Nu mɛlan a nwɛlilakɛ a yələ kəlee, Kɛlaa, nu nəɠə nwɛi, da gɔlɔn nɔ a ə́ mąąwɛli yələ.

¹⁸ Nui gili hvo ɲəi, ya ɓə a gbɔwɔ kɛ a nu takpɛli nwɔ kwələ kɛla, yɛ gbɔwɔ kwɛlɛ nu takpɛli ɓa.

¹⁹ Nui hvaa wɛli kaa mą, nɛ̨ŋɛ̨n nwɛli kaa mą, nui a pələ ɓo yaɠayaɠa, ɲee a lɛɛ ɉu.

²⁰ Nui níí ɲɔ̨nwɔ̨ɔ̨ gwəi, hva mɛ̨inɛ̨ɛ̨ hɔlɔɓo, nui nwoo tamąą na, ya ɓə kpalo a gaa.

²¹ Nui a kilikpɛɛgwəi lon gaa, ya ɓə pai ɉu mɔ̨nɔ̨ mįi, nu a kɛ a ɓowomun, nąn va kwəinɛ̨ɛ̨ hɔlɔɓo.

²² Líílaa kaa a ɲɔ̨n ɉalə kɛnɛ̨, Kɛlaa, lííkələn gwəi, a nu kulɔ nwului.

²³ Nwąnąlɔmun a nɔgwəi mɛ̨inɛ̨ɛ̨ hon loo hu, ə gɛ, ə tɛ̨ą mɛ̨nį kpɛlaan.

²⁴ Nui gili kaa ɲəi, da nwɔ mɛ̨nį kɔ́lɔn gili kaa ɲɛ̨ilai, Kɛlaa, nui kili hvo mą, nwun a kɛ lɔ a vilɛn ŋąą.

²⁵ Kilikpɛɛɲəi lon gaa nąn ma a liikələn gwəi, ə ɓo a lííɲąnwąną gaa lee ɓa.

²⁶ Mąą hvo nɛ̨ɛ̨li di hvo mɛ̨nį ɲąąnwąnąą laa tələnmomun ma, hvaɠa pilɛɛ ɲɛ̨itɔwɔmun ma, hvo a mɛ̨nį haŋąą.

²⁷ Nui a nɛn dɔɔ vaa woo tɔwɔ, mąą nu kaa a mɛ̨nį kɔ́lɔnmun. Nui hva kpuluun a mɛ̨nį, mɛ̨nį ɲąą kaamun ni.

²⁸ Bələi mąn kilikpɛɛgwəi mun gaa la tii, a naa pilɛ, da gaa a kilimąą mun. Nui a ɲee kɛ naaləi ɓa, giligilimun ni.