Hanwon 15 - Yálá laawoo hɛɓɛ (dc)1 Woo ɲąąpənə lɛlɛɛ, a líi holi kpɛla bələi. Kɛlaa, woo ɲɔ̨n moɔ nu ɓa, a líi holi ta pɛlɛ mą. 2 Kilimąą nuą hvaa woo a kili wɛli too nu ɓa a ŋąąnɛ̨ɛ̨. Kɛlaa, kilikpɛɛgwəi nuą laa hvili yɛ tɔɔ a ɓowo. 3 Yai-Laa ɲɛ̨i kaa kɛɛnąą kəlee, yɛ nwąnąlɔɔ nuą da nu lɛlɛɛɠaa mąąkpɛɛ. 4 Nu hvaŋąlɔ woo kaa a yíipoo wulu, Kɛlaa, nui nɛn gaa na hveelɛ, a nu lii yali gwəi 5 Kilikpɛɛɲəimun a tɛɠɛ ɓo nąn nwɔ mąąkwɛli woo hu. Kɛlaa, nui da nwəli lon doo ɉu, yɛ gili lɛɛ ɉu, mɛ̨nį kɔ́lɔnmun ni. 6 Tələnmomun nwɔ pɛlɛ́ kaa a hɛn gɔw kɛnɛ̨, Kɛlaa, nu ɲɔ̨nwɔ̨ɔ̨ hɔlɔɓo hɛn a liihɛlɛn doo nu ɓa. 7 Kilimąą nuą hvaa woo a mɛ̨nį kɔ́lɔn ŋąą ɲąąkwɛlɛ, Kɛlaa, kilikpɛɛgwəi nuą di wɛi, a kɛ a mɛ̨nį takpɛli. 8 Nwąnąlɔ nuą di wɔ haláá wɛli kpɛɛi Yai-Laa ɓa kpɔ tɛ-tɛ, Kɛlaa, nuąi di haŋą, di wɔ hvɛ́li woo a nii hon. 9 Nwąnąlɔmun dúwɔ́ pələ wɛli kpɛɛi Yai-Laa ɓa kpɔ tɛ-tɛ, Kɛlaa, nui gaa tələnmolaa pɔ, a nwɛlilakɛ. 10 Nui a həɠə pələ ɓa, mąąnɛ̨ɛ̨ di ɉutɔɔ a nwalawalaa. Nui hvo bɔ di hvo niɛwoo ɓo, gaa pai haai. 11 Ɲąmuątaa da lɔi mu hɛnŋąą, di kaa a mąą pɔ̨nɔ̨ɔ̨ Yai-Laa ɓa, gu hvo mun kɛ nuą kwəi kiliɠaa! 12 Huɲąŋą kɛnɛ̨mun, hvo bɔ di hvo gilaa pɔ̨nɔ̨, da kilimąą nuą di hva hiɛ. 13 Nu kwəinɛ̨ɛ̨ ɲɛ̨ilai kaa a wɛlikɛmąą ɲɛ̨ilai, Kɛlaa, nui a kɛ lii kələngwəi hu, ɲɛ̨i mąą a luwu. 14 Kili nąmu a kɛ mɛ̨nį kɔ́lɔn ŋąą kwɛlii, kilikpɛɛgwəi nuą laaləi a di kɔ̨nɔ̨n gɛ a ɓowo. 15 Nui mąąwɛli mɛ̨nį hu, hvóló kəlee ɲɔ̨nwɔ̨ɔ̨ lɔ ɲɛ̨i mu. Kɛlaa, nui nɛ̨ɛ̨ hu, nwɔ yɛnɛ̨ɛ̨ kaa lɔ yələ kəlee a hɛli. 16 Hɛn nogolo kɛɛ nu ɲəi, yɛ ɲɔw Yálá ɓa, hviɛlaɓoɔi, hɛn gɔw kɛnɛ̨ɛ ɓa lii hɛlɛn ɉu. 17 Ɓákpon mįi liilaa hu, hviɛlaɓoɔi ə tɛɛ nįŋɛ̨ wulaa ɓa, kaa mįi wɛlikpɛɛmąąlaa hu. 18 Nui a níiholi ɉa, a hvaa too, nui ɲee a pɛli níi ɓa, a kpilɛn ŋąą yɛɛ. 19 Hviɲɛ̨mun dɛɛ pələ kaa lɔ a ɲąąlən gbɔlɔ, Kɛlaa, nu lɛlɛɛɠaa di wɔ pələi kaa a pələ mɛ̨i pɔ̨nɔ̨ɔ̨. 20 Lon gili kɛɛ ɲəi, gaa nąn ma a kwəinɛ̨ɛ̨, Kɛlaa, lon gili hvo ɲəi, a tɛɠɛ ɓo nee hu. 21 Nui gili hvo ɲəi, ɓowo mɛ̨nį ɓə a gwəinɛ̨ɛ̨, Kɛlaa, kilimąą mun nwɛi, a ɉiɛ pələ tənən dɔɔ a ɉaŋąą. 22 Nwun dɔɔ awala kɛ mɛ̨nį ɓa, giliŋąhiɛ a kɛ nuą diɛ ɉu hva nɛ̨ɛ̨, Kɛlaa, nwun dɔɔ ɓə a nu kɛ mɛ̨nį tamąą hu nɛ̨ɛ̨. 23 Mɛ̨nį hutoɔ a woo nɛ̨ɛ̨, a nu kwəinɛ̨ɛ̨, mɛ̨nį ɓoɔ a moi lɔwai, yili ɲąą nɛ̨ɛ̨i kpɔ nwɔ̨nɔ̨ a mɔlɔ. 24 Mɛ̨nį hukpɛ kili a nu tɛ yələi, yɛ ɲąmuątaa pələ kulɔ nu yəi. 25 Yai-Laa a kpɔwɔ ɲąą kɛnɛ̨ nuą di wɔ pɛ́lɛ́i pu, Kɛlaa, a kalanən nwɔ lɔi mąą kwəli kwɛnąn nwulu hu lɔ a nwalawalaa. 26 Kiliŋąhiɛ ɲɔ̨nwɔ̨ɔ̨ɠaa wɛli kpɛɛi Yai-Laa ɓa kpɔ tɛ-tɛ, Kɛlaa, wɛlikɛmąą woo hu həɠeen ŋąąi. 27 Nui ɲee kaa nwumɛ̨ mɛ̨nį hu, a nwɔ pɛ́lɛ́i huwu-huwu ɓo, nui nɔgwəi hɛn nwɛli hvo mą, gaa pai lamun ɉii. 28 Tələnmomun a gwəi kwɛli, hvo tɛɠa kɛ nu woo pulu pənəi, Kɛlaa, nwąnąlɔ nuą da di laa tee lɔ ɓowo mɛ̨nįɠaa ɓa po. 29 Yai-Laa a mąą kwɛa nwąnąlɔ nuą diɛ, Kɛlaa, a nwəli tɔɔ tələnmo nuą di wɔ hvɛli ɓo woo ɓa. 30 Wɛlikɛmąą kɛɛ kaa, a nu kwəinɛ̨ɛ̨ kpɔ kpąąn, wɛlɛɛ nɛ̨ɛ̨, yɛ nu hvaŋąlɔ. 31 Nui a nwəli tɔɔ a nɛlɛɛ, malo liɛwoo ɓa, a ɉeei ɉɔlɔɓoi kilimąą nuą lɔwai. 32 Nui a mąąkwɛli woo pili, a tɛɠɛ ɓo gbɔwɔ hu, nui a nwəli tɔɔ gilaa pɔ̨nɔ̨ woo ɓa, a kili hɔlɔɓo. Yai-Laa kɛ mɛ̨nį gu wɔ yɛnɛ̨ɛ̨ hu 33 Nui a ɲɔw Yai-Laa ɓa, mąą nu kaa kili mąąkwɛlii. Kpɔwɔ mąąyɛɛlaa kaa mąąwiɛlaa tɔwɔ. |