Hanwon 13 - Yálá laawoo hɛɓɛ (dc)

¹ Lon kili kaa mą, a nwəli tɔɔ nąn nwɔ liɛwoo ɓa, Kɛlaa, lon ɲɛ̨itɛɛ, hva hvaa mą di hvo ɉɔn nɛ mą.

² Nui vaa woo nɛ̨ɛ̨ a gɔ̨nɔ̨n nɛlɛɛ hɔlɔɓo. Kɛlaa, nuąi da di woo kala, di wɔ yɛnɛ̨ɛ̨ kaa lɔ a wea.

³ Nui a ɲee kɛ naaləi ɓa, a nwɔ yɛnɛ̨ɛ̨ mɛ̨i kaa. Kɛlaa, nui a howon a mɔlɔ, a gbɔwɔ nwun na pili.

⁴ Hviɲɛmun hva niiɓa kɛ. Kɛlaa, walamun a liiɓa hɛn ɉɔlɔɓo.

⁵ Lɛɛmun nwɛli hvo tələnmomun ma. Kɛlaa, nwąnąlɔmun a nu laa kala, yɛ mɛlɛkpɛɛ mą.

⁶ Nui ɉiɛ pələ haŋąą, tələnmolaa a ɲee kɛ mą, Kɛlaa, nwąnąlɔ nuą kala hɛn mąą nɛ̨ŋɛ̨n.

⁷ Nu kpəli a gbɔwɔ kɛ a hɛn nąmu, ya pa, hɛn nɔpee ta hvo ɲəi. Nu kpəli yɛ gbɔwɔ kɛ a yeehvowolomun, ya pa, ə ɓo a hɛn nąmu kɛnɛ̨.

⁸ Ɉɛn nu a gilitɔɔmą yɛ nwɔ yɛnɛ̨ɛ̨ kɛ la, ya ɓaa nwɔ hɛn gɔw. Kɛlaa, yeehvowolomun nwɛi, mąą ɲɔw woo hva too nwəlii.

⁹ Tələnmo nuą di wɔ kɛɛ pɔ̨nɔ̨ a lən a ɲąą nɛ̨ɛ̨, Kɛlaa, nwąnąlɔ nuą di wɔ nwɔ̨n gaa pai luwun ɉii.

¹⁰ Hvaa lɔ ɓə kpɔwɔɲąą kɛnɛ̨mun a ɉɔlɔɓo, nuąi da di wəli tɔɔ liɛwoo ɓa, kili ɓə da ɉɔlɔɓo.

¹¹ Nu a hɛn ɉɔlɔɓo a hvoló tɔ̨nɔ̨, da lɔ ɓə a kɛ kulɔi mą. Kɛlaa, nui a hɛn naa gee mɛ̨i a bɛlɛɛ pɛlɛɛ, da lɔ ɓə a kɛ pɛlɛi mą.

¹² Hɛn nu líí laai mɛ̨i, da kɛi kuu hee ɉɔlɔɓo yələ ɓa, a ɲɔ̨n bɛlɛ nu líí ɓa. Kɛlaa, nu líí ɓa mɛ̨nį laa a hon, a kɛ yɛ yíipoo wulu.

¹³ Nui a nu woo pili, a gbɔwɔ nwun na pili. Kɛlaa, nui a tɔ́n bɔ liɛwooŋąą hon, mąą nu a vɛla hɔlɔɓo.

¹⁴ Kilimąą mun a mɛ̨nį lɛ nu ɓa, gaa a yɛnɛ̨ɛ̨ yáton, a gɛ, nu yɛ pɛli haa nwɔ hɛlɛnŋąą mąąlaai.

¹⁵ Nui kili kaa mą, mąą nu wɛli a too nuą diɛ, Kɛlaa, nuąi da di woo kala, di wɔ pələi, laa kulɔi hvo mą.

¹⁶ Kiliŋąlaamun a mɛ̨nį kɛ a gili. Kilikpɛɛɲəimun yɛ nwɔ ɓowo laa tɔɔ ɲɛ̨i.

¹⁷ Wɛlɛɛ ɓomun ɲɔ̨nwɔ̨ɔ̨ a mɛ̨nį nwąnąą laa gbɔwɔ ɓa. Kɛlaa, wɛlɛɛ ɓomun nɛlɛɛ a nu ɓalo.

¹⁸ Nui a bulu tɔɔ mąąkwɛli woo ɓa, laanɔ̨nwɔ̨ da nwumɛ̨ da hee mą. Kɛlaa, nui da nwəli lon doo ɉi, ə gili lɛɛ ɉu, mąą a wiɛ.

¹⁹ Nu liiɓa hɛn a həli mą, ŋąą a nɛ̨ɛ̨ mą. Kilikpɛɛgwəi nuą pulu tɔɔi mɛ̨nį ɲɔ̨n ma, gaa diɛ a mɛ̨nį nwąnąą kɛnɛ̨.

²⁰ Nui a hvilɛn kilimąą nuą pɔ, a kɛ a kilimąą mun, nui a kanąn kilikpɛɛgwəi nuą diɛ, a ɉu mɔ̨nɔ̨ mįi.

²¹ Mɛ̨nį ɲɔ̨nwɔ̨ɔ̨ hva tee nɛ̨ŋɛ̨n ɉəɠə nuą pulu, nwun na nɛ̨ɛ̨ ə ɓo a tələnmo nuą hvɛla.

²² Nu lɛlɛɛ hɔlɔɓo hɛn, a həli nonnii di wɔ lonnii diɛ. Kɛlaa, nɛ̨ŋɛ̨n ɉəɠəmun ɲəi hɛn gɔw, yɛ lɛɛ a tələnmomun nwɔɔ.

²³ Yeehvowolomun a nwɔ tíi hukulɔ, a gɔ̨nɔ̨n ɉɔlɔɓo, Kɛlaa, nu kpəli nwun na a pili, mąąhɔlɔɓo, hvo haŋą li.

²⁴ Nui hva hvaɠa həɠə kɛlɛ-kɛlɛ, non nwɛli hvo mą. Kɛlaa, nui non nwɛli kaa mą, a ɲəi bɛlɛ́n ɉutɔɔ ɉa.

²⁵ Tələnmomun a kɔ̨nɔ̨n mįi, yɛ pilɛ, Kɛlaa, nwąnąlɔ nuą koo lon yɛ lɛɛ a vowolo.