Hanwon 12 - Yálá laawoo hɛɓɛ (dc)

¹ Nui hutɔɔ wɛli kaa mą, gaa bɔ ə mɛ̨nį kɔ́lɔn, Kɛlaa, nui a liɛwoo pili, nwun gbɛɛi ɉu.

² Nu lɛlɛɛ a Yai-Laa ɲɛ̨i lɛlɛɛ hee gbɔwɔ ɓa, Kɛlaa, nui kiliŋąhiɛ ɲɔ̨nwɔ̨ɔ̨ kaa mą, Yai-Laa a ɉutɔɔ.

³ Nwąnąlɔ hva nu kɛ a tɔɔmun, Kɛlaa, hɛn lɔpee ta hva kɛ tələnmo nuą hamu ɓa.

⁴ Nɛ̨ɛ̨nui ɉɔn və mą, gaa ɉilɛ nwuɔ̨ a tɔɔɓɔlɔ. Kɛlaa, nɛ̨ɛ̨nui gili hvo ɲəi, ə ɓo ɉilɛ ɓa a ɲin nwąną.

⁵ Mɛ̨nį lɛlɛɛ lɔ ɓə tələnmomun a giliŋąhiɛ mą, nwąnąlɔ nuą da di kiliŋąhiɛ lɔ nwąnąlɔ mɛ̨nį ɓa.

⁶ Nwąnąlɔ nuą hvaa woo kaa a nu paa hɛlɛn, Kɛlaa, tələnmo nuą laaləi ɓə a di kulɔ ɉu.

⁷ Nwąnąlɔ nuą da too, di toɔ kəlee li. Tələnmo nuą di wɔ pɛ́lɛ́i a lɛɛ tɔɔni a yələ kəlee.

⁸ Da nu mąątɛ̨nɛ̨ gɛ koló ɓa. Kɛlaa, nui gili ɲɔ̨nwɔ̨ɔ̨ gwəi, wɛlikpɛɛmąąlaa lɔ ɓə da dɔɔ mą.

⁹ Viɛlaɓoɔi nu ə kɛ a kpɔwɔ mąą yɛɛmun, tímun ə ɓo ə́ ɲəi, ə tɛɛ la kpɔwɔ ŋąą kɛnɛ̨ kulaa ɓa, yii nu kɔ̨nɔ̨n və ɲəi.

¹⁰ Tələnmomun ə nwɔ taatɛlɛɛɠaai mąą kpaan gɔlɔn, Kɛlaa, nwąnąlɔ nuą kwəi ɲɔ̨nwɔ̨ɔ̨i diɛ.

¹¹ Nui a ɲəi ɲɛa koló kɛ, gɔ̨nɔ̨n va kpɛɛ ɲəi. Kɛlaa, nui a hvilɛn ɓowo mɛ̨nį pulu, mąą nu kili hvo mą.

¹² Nui hvo Yálá kɔ́lɔn, a ɲɛ̨i kulɔ nwąnąlɔ nuą hɔlɔɓo hɛn bɔ. Kɛlaa, tələnmo nuą hamu a di kɔ́ a hɛn.

¹³ Nu paa ɓaalə kaa kɛɛ kala nuą nɛn mu, Kɛlaa, tələnmomun hva lɛɛ kwəi pili mąą hu.

¹⁴ Nu tɛitɛi a hɛn ɉɔlɔɓo vaa woo hu, nu kəlee yɛ gɛ koló mąą hvɛla hɔlɔɓo.

¹⁵ Kilikpɛɛɲəimun dúwɔ́ pələ haŋąąi lɔ gbɔwɔ ɲɛ̨i ɓa. Kɛlaa, nui a nwəli tɔɔ liɛwoo ɓa, kilimąą mun ni.

¹⁶ Kilikpɛɛɲəimun a níiholi ɉa, ə gwəi woo kəlee ɓo. Kɛlaa, kilimąą mun nwɛi, a nɛn ɉon woo ɲɔ̨n dɔwɔ.

¹⁷ Nui a tɛ̨ą ɓo, a tələnmolaa heei kulɔ. Kɛlaa, lɛɛ kɛla hvaa ɓomun a lɛɛ heai kulɔ.

¹⁸ Hvaa pulu-pulu a kɛɛ kala lɔ yɛ ɓɔwa kwɛa, Kɛlaa, kilimąą nuą woo kaa a kɔ́lɔi pɔ̨nɔ̨ hali.

¹⁹ Tɛ̨ą ɓomun a lɛɛ dɔɔi a yələ kəlee. Kɛlaa, lɛɛmun hva lamun tɔɔni.

²⁰ Nuąi da di kiliŋąhiɛ mɛ̨nį ɲɔ̨n ma, lɛɛ ɓə di lii pɔ. Nuąi da liilaa mąą liɛwoo kɛ, kwəinɛ̨ɛ̨ ɓə gaa di lii pɔ.

²¹ Mɛ̨nį ɲɔ̨n va həli tələnmomun ma, Kɛlaa, nwąnąlɔ nuą ɓə kpalo a di kaa.

²² Lɛɛ nuą wɛli hvo Yai-Laa ɓa, Kɛlaa, a tɔɔ tɛ̨ą ɓo nuą pulu.

²³ Nu ɲąąlaa a nɛn dɔɔ vaa woo tɔwɔ. Kɛlaa, kilikpɛɛgwəi nuą da di wɔ ɓowo mɛ̨nį kulɔ pɔ̨nɔ̨ŋą.

²⁴ Nui nwalaa, gaa pai tɔɔlaa kɛi; Kɛlaa, hviɲɛ kulɔmun nwɛi, hvɛɛ da gbaan goló laa mą.

²⁵ Liihɛlɛn a kɛ nu ɓa, a kpala, Kɛlaa woo lɛlɛ ɓoɔ nu ɓa a nįilɔ.

²⁶ Tələnmomun a pələ haŋąą lɛ mɛlan ma. Kɛlaa, nwąnąlɔ nuą kpaalə a di lan.

²⁷ Loɉoi gaa ɲąą, hva baa huwɔ paa, Kɛlaa, nu kɛɛ gíligíli lɛlɛɛ.

²⁸ Tələnmo pələ mɛ̨i ɓə yíipoo a hɔlɔɓo ɉu; bələ yili ɓə hva nu lɔ haa hu.