Hanwon 11 - Yálá laawoo hɛɓɛ (dc)

Kili mɛ̨nį kaa a hɛn noɔ

¹ Nón! Mɛ̨nįi gáá ə́ kalan ɉii la, gili lɛɛ ə́ ɲą Yii ŋą́ kɛ yɛ́ gɛ, 'hvó lɛ̨ą mą.

² Ə́ wəli tɔɔ kilimąą woo ɓa Ə́ ŋąą wala, ə́ gbaɠala kaa.

³ Akɛ ya kilaa pono kwɛli, Akɛ ya nwun gɛ ɉu mɛ̨nį kwɛli,

⁴ Akɛ ya gwɛli yɛ pələi da walə kwɛli la, ə́ gwɛli pələ kɛ yɛ hɛn gɔw yii noɔ,

⁵ ya yili kɛ tii, pələi mąą nɛɛ ə́ ɲɔw la Yai-Laa ɓa, ya kɔ́lɔn, ya pɛli ma ə́ Yálá kɔ́lɔn,

⁶ mąąhɔlɔɓo, Yai-Laa ɓə a kili tɛɛ nu pɔ. Ya ɓə nwun gɛ ɉu da mɛ̨nį kɔ́lɔn ŋąą da həɠə bɔ.

⁷ Ya ɓə a kpɔmąą tɛɛ nu haŋąą pɔ, gaa a nu haŋąą mąą kɔ́nwɔ mun.

⁸ Nui a hiɛ tɛ̨ą pələ mɛ̨i, a mąą nu mɛ̨i kaa. A telimo nuą túwɔ́ pələ mɛ̨i kaa.

⁹ Akɛ yá ə́ wəli tɔɔ mą́ą́, yá mɛ̨nį haŋąą kɔ́lɔn, yɛ́ pɛli mɛ̨nį lɛlɛɛ kɛi.

¹⁰ Kili a kɛ yɛ́, mɛ̨nį kɔ́lɔn ŋąą yɛ kwəinɛ̨ɛ̨ tɛɛ ə́ pɔ. Ə́ nwun a kɛ ə́ hu, hva lan.

¹¹ Mɛ̨nį kɔ́lɔn ŋąą a ə́ mɛ̨i kaa. Kiliŋąhiɛ lɛlɛɛ yɛ kpɔmąą tɛɛ ə́ pɔ.

¹² Kili a kpɔmąą tɛɛ ə́ pɔ, hva mɛ̨nį ɲɔ̨n gɛ. A ɲee kɛ yɛ́ ka lɛɛ ka lɔwai, ə lɛɛ,

¹³ nuąi da pələ haŋąą lɛɛ laa, diɛ hiɛ kpinį hu, hva hvilɛn di pɔ.

¹⁴ Diɛi di kwəinɛ̨ɛ̨ mɛ̨nį ɓaa mɛ̨nį ɲɔ̨n gɛɛ, di liiɓa ɓaa nwąną lɔ túwɔ́ ɓoɔ.

¹⁵ Di hva mɛ̨nį ta kɛ a tɛ̨ą, di túwɔ́ pələ kpəlaan ŋąą.

¹⁶ Kili mɛ̨nį a ɲɛ̨i kɛ yɛ́, hva pɛli ə́ wəli tɔɔi nwɛ̨ą nɛ̨ɛ̨nu nwɔ gbanalaa woo ɓa.

¹⁷ Nɛ̨ɛ̨nui yii aa ɉilɛ dɔlɔɔ lɛɛ, mįnɛ̨i ŋɛ̨i ə ɉəɠə Yálá ɲɛ̨i ɓa, aa lɛ̨ą ma, hva too nwɔ hɛlɛn ŋą.

¹⁸ Nwɔ túwɔ́ pələ ɲɔ̨n tii a nwɔ pɛ́lɛ́i hɛŋɛnɛn haa pɔ pələ, yɛ nwun na pili.

¹⁹ Nuąi da li Nɛ̨ɛ̨nui tii pɔ, di hva di pulu pənə. Di hva yɛnɛ̨ɛ̨ kɛ pələ kaa.

²⁰ Ə́ wɛi, hvilɛn nu túwɔ́ pələ lɛlɛɛɠaa pulu, ə́ nu haŋąɠaa pɔɔn kɔ́ɔn.

²¹ Mąąhɔlɔɓo, mįnɛ̨ həɠɛɛ lɔi kaa a nu haŋąąɠaa di wɔɔ. Diɛ ɓə da hee laa.

²² Kɛlaa, nwąnąlɔ nuą, da nuąi di hvo haŋą li, da di kpɛ nɔi.

²³ Mɛ̨ni lɛlɛɛ lɔ ɓə tələnmo nuą da mąąkpɔn, nwąnąlɔnuą, líi holi ɓə a hee di tɔwɔ.

²⁴ Nuąi da mɛ̨inɛ̨ɛ̨ kɛ a lii nɛ̨ɛ̨ gwəilaa, di yeela a hvoloon, nuąi da di yee laa kpulu di yəi hɛn ma, diɛ too kanąn ɉu.

²⁵ Nui ɲee kaa mą hvɛa-hvɛa mɛ̨inɛ̨ɛ̨ kɛi, ya ɓə ɲee laa a hvoloon. Nui a kpələ wɛli kulɔ nu ɓa, kpələ wɛli hva baa.

²⁶ Nui a ɲee kąnąn kɔ̨nɔ̨n ma, nuą da nɛ̨ŋɛ̨n naa, Kɛlaa, nui a ɉee lɔwɔkpalan ɲą, nuą diɛ ɲá, ya ɓə da lúwɔ́ too mą.

²⁷ Nui gaa bɔ ə túwɔ́ a nɛlɛɛ, nuą da mąątɛ̨nɛ̨. Nui a mɛ̨ni ɲɔ̨n bɔɔkpɛ, mɛ̨ni ɲɔ̨n a wolo mą.

²⁸ Nui a gilitɔɔ hɛn gɔw nąmu ɓa, a too. Kɛlaa, tələnmomun a ɓuwuɓo, yɛ yá kwɛlɛ wulu.

²⁹ Nui a wulun bili ɲəi bɛlɛ́n, a pɛlɛ́ lɛɛ a hvaŋą nwɔɔ, kilimąą mun ŋą luwɔ ɓaa kilikpɛɛɲəimun.

³⁰ Tələnmomun dúwɔ́ pələ a ɓá a yɛnɛ̨ɛ̨, kilimąą mun nwoo yɛ nuą líi hon.

³¹ Tələnmomun a lɛɛ lɔi mɛ̨i ə dɔlɔ ta hɔlɔɓo, gu hvomun kɛ nwąnąlɔ nuą da nɛ̨ŋɛ̨n ɉəɠə nuą!