Hanwon 10 - Yálá laawoo hɛɓɛ (dc)Yɛnɛ̨ɛ̨ hon bələ hanwonŋaa taɠaai Salomɔn ə ɉɔɔ Salomɔn nwɔ hanwonŋaa 1 Kilimąą lon gaa a nąn nwɔ kwəinɛ̨ɛ̨, kilikpɛɛgwəi lon ə ɓo a nee nwɔ liihɛlɛn. 2 Hɛn gɔwi nu a ɉɔlɔɓo a hvulu, hva ɓɛlɛ, Kɛlaa, tələnmolaa a nu kulɔ haa ɲəi. 3 Yai-Laa hva tələnmomun nɛɛ laa pulu hvo naanɔ̨nwɔ̨ ɓo, Kɛlaa, a nwąnąlɔ nuą di wɔ lii pɔ tee hu kala. 4 Nu yee ɲą laɠiɛ, a gɛ a yee hvowolomun, Kɛlaa, koló kɛ yee a nu tɔɔ. 5 Nui a pulu kɔnɔ̨n gwɛli a hvoló laa teɛ, a kɛ tii, kilimąą mun ni; nui a yíi a mɔ̨nun dee yələ, nu kpoloon ni. 6 Tələnmomun bɔɔ ɓaa lúwɔ́, Kɛlaa, nwąnąlɔɔ nuą ɓə toomɛ̨i kaa di la. 7 Tələnmo nuą kili kaa nuą ŋą, diɛ lúwɔ́ too diɛ. Kɛlaa, nwąnąlɔ nuą laa a pu pɔlɔ hu. 8 Kilimąą mun a nwəli tɔɔ liɛwoo ɓa, Kɛlaa, nui hva pələ ɓo a dənən, a gbɔwɔ nwun nɛɛ ɉu. 9 Nui a hiɛ tələnmo pələ mɛ̨i, gaa nɛ̨ɛ̨ hu. Kɛlaa, nui a hiɛ a pələ kpəlaan ŋąą, a kala həɠə gbɔwɔ mɛ̨i. 10 Nui a tɛ̨ą loo, a mɛlaa laanɔ̨nwɔ̨ ɓo, ɛlɛɛ, nwɔ̨nɔ̨, nui hva pələ ɓo a dənən, a gbɔwɔ nwun nɛɛ ɉu. 11 Tələnmomun naaləi kaa a yɛnɛ̨ɛ̨ nwun gulɔi, Kɛlaa, nwąnąlɔmun nwɛi kaa a toomɛ̨i nwun gulɔi. 12 Wɛlikpɛmąą a hvaa too, Kɛlaa, wɛlikɛmąą a nɛ̨ŋɛ̨n gəlee mɛ̨i kpulu. 13 Kilimąą mun vaa woo a kili tɛɛ nu pɔ, Kɛlaa, hvaɠa kaa kilikpɛɛgwəi mun bulu. 14 Kilimąą nuą da mɛ̨nį kɔ́lɔn ŋąą laaikɛ, Kɛlaa, kilikpɛɛgwəi mun vaa woo kaa yee lɛɛ ɉu mąą kpua. 15 Hɛn gɔw nąmu a hvaŋą hɔlɔɓo nwɔ hɛn gɔwi hu. Kɛlaa, yeehvowolo nuą di wɔ yeehvowololaa ɓə a di too. 16 Tələnmomun gɛ koló a kpɔnmąą tɛɛ bɔ nwɔ yɛnɛ̨ɛ̨ hu, nwąnąlɔmun gɛ koló yɛ doo nɛ̨ŋɛ̨n ɉu. 17 Nui a liɛwoo hon, a hvilɛn yɛnɛ̨ɛ̨ kɛ pələ mɛ̨i. Kɛlaa, nui da gilaa pɔ̨nɔ̨, ə nwəli kulɔ ɉu, a lan. 18 Nui a wɛlikpɛɛmąą mɛ̨i kpulu, nɛn gaa na hveelɛ. Nui a laamąąhiɛ kɛ, ɓowomun ni. 19 Nui a hvaa tamąą, nwɔ nɛ̨ŋɛ̨n ɉəɠə laa hvo wala li. Kɛlaa, nui a nɛn ɉon, mąą nu ɲąąlaai. 20 Tələnmomun nɛn gaa yɛ wali kwɛli, nwąnąlɔmun nwɔ kiliŋąhiɛ hvo a hɛn da. 21 Tələnmomun nwoo a liilaa tɛɛ nu pɔ, Kɛlaa, kilikpɛɛgwəi nuą da haa a mɛ̨nį kɔ́lɔn nwɛli. 22 Yai-Laa nwɔ lúwɔ́ ɓə a nu kɛ a hɛn nąmu, nuą di wɔ huwalawalalaa hva hɛn dɛɛ di pɔ. 23 Kilikpɛɛɲəimun niiɓa ɓaa mɛ̨nį ɲɔ̨n gɛɛ, Kɛlaa, nu ɲąąlaa liiɓa ɓaa kili mɛ̨nį. 24 Mɛ̨nįi nwąnąlɔmun a ɲɔw mą, ya ɓə a ɉɔlɔɓo, Kɛlaa, hɛn kilimąą nuą da vɛli, ya ɓə Yálá a di kɔ́ la. 25 Kili-kili mɛ̨nį a kulɔ, nwąnąlɔmun mə a lɛɛ ɉu, Kɛlaa, tələnmomun nwɛi, a lɛɛ tɔɔni gbilin a yələ kəlee. 26 Bələi gaani-kponą a nu ɲin ɉon na, lulu yɛ lɔ la nu ɲɛ̨i, bələ ɓə hviɲɛ̨mun gɛ pələ kaa la nwun nąmu ɓa. 27 Nu a ɲɔw Yai-Laa ɓa, a nwɔ yɛnɛ̨ɛ̨ hu kwɛa, Kɛlaa, nwąnąlɔ nuą yíi hvo kwɛa li. 28 Tələnmo nuą kilitɔɔi kaa a kwəinɛ̨ɛ̨, Kɛlaa, nwąnąlɔ nuą di wɔ kilitɔɔi hva lamun. 29 Yai-Laa kaa a tələnmo nuą di wɔ huwalawala, yɛ ɓo a nwąnąlɔ nuą di wɔ nwun na pili. 30 Tələnmomun hva tɔɔ takpa-takpa, Kɛlaa, nwąnąlɔ nuą di hva di heei hɔlɔɓo nɔi. 31 Kilimąą woo a kulɔ tələnmomun na, Kɛlaa, da kilikpɛɛgwəi mun nɛn dee na. 32 Tələnmomun vaa woo a nuą kwəinɛ̨ɛ̨, Kɛlaa, nwąnąlɔmun vaa woo a kpɔn daɠa. |