Hanwon 1 - Yálá laawoo hɛɓɛ (dc)Nu nwɔ yɛnɛ̨ɛ̨ kɛ pələ, kili nwɔ liɛwɔɔ mɛ̨i Ɉɛɓɛ́i ŋɛ̨i pɛ̨ɛ̨ nwun dɔwɔ hɔɔ 1 Salomɔn, Davidə lon yai kɛ a Israɛlə tɔɔmun, nwɔ hanwonŋaa ka. 2 Ɉɛɓɛ́i ŋɛ̨i nwun mąą, ə kili tɛɛ nu pɔ, ə kɛ a mɛ̨nį kɔ́lɔn ŋąą, yɛ pɛli mɛ̨nį hukpɛi. 3 A nu kilaa pɔ̨nɔ̨, ə nu kɛ a tələnmomun, da tɛ̨ą kɔ́lɔn mun. 4 A kiliŋą kulɔ tɛɛ nu tunun bɔ, yɛ mɛ̨nį kɔ́lɔn ŋąą tɛɛ hulɔnon bɔ, da mɛ̨nį hukpɛ kili. 5 Ə mą kɛ kilimąą nuą diɛ kpɛli, da di wəli tɔɔ mą, da dɔlɔ kaa. Nwun gɛ ɉu nuą da taalə hɔlɔɓo ɉu. 6 A hanwon ɉɔɔ hanwon ɉu, ə ɉu pɔ̨nɔ̨, yɛ kilimąą nuą woo da di wɔ hanwonŋaa hu pɔ̨nɔ̨. 7 Nu ɲɔwɔ Yai-Laa ɓa ɓə gaa a kili mɛ̨nį kəlee kɔ́wɔ tɔɔi. Kilikpɛɛɲəi nuą di hva kili mɛ̨nį ɓɛlɛ kɛ mą, da liɛwoo. Hiɛ gee pulu ɲɔ̨nwɔ̨ɔ̨ a nu yíi pələ lɛlɛɛ hukala 8 Nón, mɛ̨nįi ə́ nąn gaa ə́ kalan ɉii la, ə́ wəli tɔɔ mą, 'Hvó lɛ̨ą ə́ lee nwɔ liɛwoo ɓa. 9 Mąąhɔlɔɓo, da kɛ ə́ nwun ma a nwun nanɛ̨ɛ̨ ɓɔlɔ, diɛ ɓo ə́ kɔn ma a kwɛɛn. 10 Nón, mɛ̨nį ɲɔ̨n gɛ nuą da ə́ ɲąą hɛn, diɛ kɛ ka mɛ̨nį ɲɔ̨n gɛ, 'Hvó hvaa di woo ɓa. 11 Da kɛ yɛ́ «Pa gwəli, gu pələ hɛlɛn dɛ nuą tɔwɔ, gu di paa, gu too kwəi kələ nuą mɛ̨i! 12 Gu di yəi hɛnŋąą həɠə di yəi, gu di kpələ, yɛ gwa kɛ a ɲąmuątaa, yɛ nu a too lɔwai. 13 Gwa gɛ tii, gwa hɛn nɛlɛɛ lɔpee gəlee hɔlɔɓo, gwa gu wɔ pɛlɛ́ɠaai laa hvɛɛ a di pulu hɛn gɔw. 14 'Pa gwə li, ə́ kaa pai ə́ wɔɔ nąą hɔlɔɓoi, gu wɔ hɛn gɔw a kɛ gee ɓa!» 15 Nón, ka diɛni ka hvo hiɛ gee pulu laa kɛ, ə́ mąą kwɛa di kpaalə ɓa. 16 Mąąhɔlɔɓo, da gilɛ həɠə, diɛ li mɛ̨nį ɲɔ̨n gɛi. Di kɔ́wɔ mąą hulaa ɲąmą kulɔ mąą kɛi. 17 A tɛ̨ą, kpɛli ɓaa hɛlɛn dɛmun, a kɛi dɛ, ɉɛn gaa dɛi dɔwɔ ɲɛ̨i heɛ mą, ɉɛlɛn dɛ mɛ̨nį nwun və mą! 18 Kɛlaa di wɛi, di kpɔwɔ ɲąmą pu mɛ̨nį lɔ ka tii, di kaa bələ hɛlɛn dɛi la, di wɔ yɛnɛ̨ɛ̨ lɔ ɓə pai gɔ́i. 19 Bələ ɓə hvulu hɛn gɛli nuą di wɔ yɛnɛ̨ɛ̨ a kpɛɛ la, a diɛi tii di ɓɛlaa kwɛlin gulɔi di yəi. Kili kaa təli ɓo kɛi 20 Kili kaa gwəliɠaa lɔwai yɛ təli ɓo kɛ, gaa loloɓoi gwəli hɛ̨ąiɠaa ɓa. 21 Ɓɛi nu kpɔn dɔɔi laa, yɛ naa haŋą di pɔ pələ; nwɔ lolo woo kaa tɔɔi ɉį́i la, daa leeɠaa hu, yɛ kɛ: 22 «Kilikpɛɛgwəimun! Ə́ kaa pai lɛɛi kilikpɛɛgwəilaa hu, ə lɛɛ ɉu lə yələ? Yɛlɛkulɔ ɉumun! Ə́ kaa pai lɛɛi yɛlɛkulɔ ɉu kɛi, ə lɛɛ ɉu lə yələ? Mįnɛ̨ lɔwai ɓə ɓowo nuą kaa pai mɛ̨nį kɔlɔn ŋąą wɛlilakɛi la? 23 'Ka pənə ka pa, 'ka nwɔ́ kilaa pɔ̨nɔ̨ wooi mɛ̨n! Akɛtii, gáá pai nwɔ́ Kilii tɛɛi ka pɔ, ŋą́ ka kilaa pɔ̨nɔ̨, ŋą́ gwə́i woo lɛ kaa. 24 Yii kpɔ ŋą́ą́ ka təli, kaa diɛ kpaa, ŋą́ą́ ɲéé haŋąn nu ta hvo ɉon ni, 25 Yii kaa ka kili kulɔ nwɔ́ liɛwooɠaa hu, ka hvo ka wəli tɔɔ li nwɔ́ kilaa pɔ̨nɔ̨ woo ɓa, 26 Ɲą́ą́ gbɛli, mɔ̨nɔ̨ a laa kaa, ŋą́ yɛlɛ kaa, kpalo a ɓɛla kaa, ŋą́ yɛlɛkulɔ ka hu; 27 A ɲələi ɲɔw a pu la ka mɛ̨i, yɛ tulɔ hvaŋą, kpalo yɛ ɓɛla kaa yɛ ɉigilin, a ɲələi ka kwiɛn na a mɔ̨nɔ̨ da liikələn gwəi. 28 Mąą yələ, da də́li, vá di woo mu hon, da gwɛ́li, di hva gáá. 29 Mąąhɔlɔɓo, di mɛ̨nį kɔlɔn ŋąą viiɓo, di hvo gɛ li di hvo ɲɔw Yai-Laa ɓa. 30 Daa nwɔ́ liɛwoo ɓɛlɛ too, daa nwɔ́ kilaa pɔ̨nɔ̨ pili pulu. 31 Yili ɓa, ka túwɔ́ pələi tii lɔ ɓə gbalo a ka káá, ka wɔ kili ɲɔ̨nwɔ̨ɔ̨ tii lɔ ɓə ka pilɛ ɉu. 32 Mąąhɔlɔɓo, nu lənɛɛ kili ɓa ɓə a nwun na pili, kilikpɛɛgwəilaa yɛ hupumąąmun baa. 33 Kɛlaa, nui a nwəli tɔɔ nwóó ɓa, nwɔ pɛlɛ́i mu ɲąą a nɛ̨ɛ̨, kpalo hva gaa.» |