Habakukə 3 - Yálá laawoo hɛɓɛ (dc)

Yálá mąątɛ̨nɛ̨ wələ

¹ Hvɛliɓo yii Yálá kwəi mɛ̨nį hukulɔ mun Habakukə ə gɛ a woolaa wələ, ya ka:

² Éé Yai-Laa! Ŋą́ą́ ə́ kɛ mɛ̨nįɠaa mąą pələ mɛ̨n ŋą́ą́ ɲɔw. Yai-Laa ə́ kɛ mɛ̨nįɠaa kɛ yiihu. Yɛ bələi wɔlɔ ə́ kɛi gɛ la. Ə́ kɛ mɛ̨nį kɔlɔŋąą lɛ a kwɛlan gəlee. Ə mą kɛ kwaa ə́ liiholi mɛ̨nį kɛ, ə́ wɔ ɲɛ̨i mąą wɛli kaa lɛ kuɔ.

³ Yálá kaa həɠəi Teman, Yálá mąąhəɠɛɛ kaa həɠəi Paran yee ɓa. Nwɔ mąąwiɛ aa yələ kwəi kpɛɛ mą. Mąątɛ̨nɛ̨ pələ aa lɔi mɛ̨i kpɛɛ mą

⁴ Nwɔ kɛɛ pɔ̨nɔ̨ yɛ hvóló kpɔ kpə kpə. Kɛɛ pɔ̨nɔ̨ yɛ kulɔ ɲee hveelɛi ɲą gbaalən yɛ taɠa. Naa ɓə a nwɔ huwalawala nwun gulɔi.

⁵ Ɲɔ̨n gaa ɲɛ̨ tɔwɔ yɛ hiɛ, ɓɛi a tɛɛ laa, ɉiɉi ə lɛɛ nąą pulu.

⁶ A kpɛla a tɔɔ, lɔi yɛ kpɛlin A ɲɛ̨i hee lɔiɠaa diɛ, diɛ kpɛlin a ɲɔw. Yee kpɛa kpɛaai wɔlɔ kɛ laa, da ɓuwɔ, Ɲee kpu kpuɠaa diɛ taɠa, diɛ kɛ a pələlee.

⁷ Ŋą́ą́ Kusan nuą di wɔ laanɔ̨nwɔ̨ kaa, da Madian nuą di wɔ ɲɔw.

⁸ Yai-Laa, akɛti, ɲaleeɠaa ɓə ə́ líiholi? Akɛtii, ɲaleeɠaa ɓə ə́ lii kələn ɉi ə́ kwəi? Akɛtii, gboloyá ɓə ə́ lii kaa holii bɔ? Ya tɛ tulɔ kpilinin mɛ̨i, yɛ nuą kɛi tɛ wotolo hu, yɛ li a yɛ́ yeetɛɛmąą kɛi.

⁹ Ya ə́ wɔ kilɛn bɛli, ə́ wɔ mɛ̨ɛ̨kɔwɠaai ɓaa: ə́ wɔ mįnɛ̨ həɠə woo yii ə́ mo. Hvina kulɔ Lɔi laa a ɓo, yaleeɠaa diɛ taɠa.

¹⁰ Yeeɠaa da ə́ kaa, di mąą a kpɛlin. Tulɔ kpɛa kpɛa diɛ lɔi yɔwɔ. Yaɠaa kəlee di lee yɛ huluun, yɛ tɛ kpɔ yələ liiɓa.

¹¹ Ə́ wɔ mɛ̨ɛ̨kɔwɠaa da kɛ koon ɉi, di wɔ kɛɛ pɔ̨nɔ̨ hu, ə́ wɔ kpalaɠaai di wɔ kɛɛ pɔ̨nɔ̨ kɛnɛ̨i hu ɲɛ̨i tɔwɔ, hvóló da ɲąnin di hva hiɛ.

¹² Ya tɛɛ lɔi mɛ̨i a liiholi, Yɛ́ lɔiɠaa wolo, ə́ wɔ liiholi hu.

¹³ Ya ə́ mąą lɛɠɛ ə́ wɔ nuąi diɛ, yɛ́ di mąą kpɔnmąą ɓo. Tɔɔmun yii ə́ ɉəɠə ɉu, ya mąą kpɔnmąą ɓo. Ya nwąnąlɔ nuą nwun nąmu kɛlɛ, yɛ́ ɲee pɔ nuą nwun napili hvina kulɔ

¹⁴ Ya ku yowoɠaa di kpɔkpɔɔ mɛ̨ɛ̨kɔw həɠə, ə́ mɔ di nwun ɉu. Ku yowoɠaa da kpuluun, diɛ pa ku hu taɠai; di pa pələ a kɛ yɛ tulɔ hvaŋą, diɛ tómą a kwəinɛ̨ɛ̨. Di kɛ pələ pɛliɛ, diɛ pa nu paai loo hu.

¹⁵ Ya ə́ wɔ hooɠaai tɛɛ pə́lə́ kulɔ gboloyá hu. Ə́ kɔ́wɔ mu tin yɛ ɓo yɛ ya huluun din.

¹⁶ Ŋą́ din tii mɛ̨n, ɉú ə pu mą́ą́ kpɔ kɛnɛ̨; nááwuluun yɛ kɛlɛ gee ɓa a ɲɔw, gɔ́lɔi kəlee ə haa, gɔ́wɔ́ɠaa diɛ kɛlɛ di kee hu. Ŋą́ hee lɔ tin, və́ hvaa, gɛ́ mąąwɛli hvólói tii mąą kpɔn, ə gɛ, nɔi ŋɛ̨i aa hee ku mɛ̨i, diɛ li pɛlɛi mą.

¹⁷ Ɓolaa wuluɠaa di hvo kɛa ɓai, viɲəɠaa di hvo kɛa ɓái. Olivə wuluɠaa di hvo kɛa ɓái, tíi ta hvo kɛa lɛlɛi, ɓɛlaa hvo kɛa ɓɛlaa kwənąn ɉu, nįŋɛ̨ hvo kɛa nįŋɛ̨ gala hu.

¹⁸ Kɛlaa, nwɛ́i, ŋą gwə́inɛ̨ɛ̨ mɛ̨nį hɔlɔɓo Yai-Laa yəi. Ŋą́ pili yələi a kwəinɛ̨ɛ̨ nwun mąąɓo Yálái mąą mɛ̨nį ɓa.

¹⁹ Yai-Laa, ya ɓə gaa a Ną́mu. Ya ɓə gaa a nwɔ́ huwalawala Yaa tii ɓə aa gɛ́ gili-gili, yɛ lomą, Yaa tii ɓə a dɛ́ kpɔ ləɠə-ləɠə. Nwələ ɲɛ̨i tɔwɔmu mə nwələi ŋɛ̨i too, dɛi muhee a gwɛnįn.