Habakukə 2 - Yálá laawoo hɛɓɛ (dc)

¹ Nwɛi, gáá pai lɛɛi tɔɔni ɉii la, gɛ́ ɲɛ̨́i laa, ŋį́ kɛ laa tɔɔni yɛ: mąą hɛn gɛ mun, ə gɛ, mɛ̨nį Yálá kaa pai moi mą́ą́, ŋį́ kɛ a yili kɔ́lɔn ŋąą ɛlɛɛ, bələi gaa pai nwóó laawoo pulu pənəi la.

Yálá nwɔ woo ɲąąpɛ̨nɛ̨: Nu haŋąą da too mɛ̨i kɛ nuą

² Yai-Laa ə nwóó ɲąąpənə yɛ mą́ą́: Mɛ̨niɠaai ŋɛ̨i ŋį́ nɛ yɛ́, bɛ̨ɛ̨, bɛ̨ɛ̨ kpəlin mɛlaɠaa diɛ, bɛ̨ɛ̨ a ɉuponoɔ nu yɛ pɛli moi.

³ Mɛ̨nįɠaa ŋɛ̨i ŋį́ nɛ yɛ́ nąąlɔwai hvo ni həli li. Kɛlaa, lɔwai yii bɛliɛ mą a həli, nwɔ tɛ̨ą kaa pai kɔ́lɔn ɉi. Ə́ liikpələ, ə́ nąą mąąkpɔn a kilitɔɔ mąą laa. Ə mą kɛ ɉu kwɛai ə́ ɲɛ̨i ɓa. Mɛ̨nįi ŋį́ mo, a kɛ. A kɛ, a tɛ̨ą ɉu hva kwɛa.

⁴ Bɛ̨ɛ̨ yɛ diɛ: Nui nwɔ kiliŋąhiɛ ɲɔ̨nwɔ̨ɔ̨i a too, Kɛlaa, nui tələnmoɔ a yɛnɛ̨ɛ̨ kɛ, nwɔ tələmo laa haalai.

Nɛ̨ŋɛ̨n naai gaa too mɛ̨i kɛ nuą pulu

⁵ A tɛ̨ą lɔɔ a nu ɓowo. Kpɔɔɲąŋą kɛnɛ̨ yɛ nu həɠə pələ mɛ̨i. Di kwəi kɛnɛ̨i yɛ ɲąmuątaa di kɛ pələ kaa yɛ haa, di hva pilɛ. Da lɔi tɔ̨nɔ̨ hu nuą kpələ, di hvilɛn dakpɛliɠaa pulu. Diɛ lɔiɠaa lɔ di yee mu.

⁶ Nɔiɠaa tii da di hon diɛ ɓo di yee mu, di kaa pai yɛlɛ kulɔ ɉu wooɠaa ɓoi di laa mɛ̨i. Nɔiɠaa tii kaa pai kɛi mą: Kpalo ɓɛlaai kaa kaai nu takpɛliɠaa yəi hɛn gɔw nwuɔ̨i kaa dɛ gee ɓa kaa di yəi hɛnŋąą həɠə a tolaa. Ka káá pai lɛɛi yili kɛi tii, ə lɛɛ ɉu, mįnɛ̨ lɔwai?

Nɛ̨ŋɛ̨n naa nɔɔli Dɔlɔɔ

⁷ Nuąi di wɔ kwələ kaa kaa, di kaa pai ka hon ɉi ka kwaną ka mąą yɛ kpɛlin, diɛ kpɛli mąn di kaa pai tooi ka mɛ̨i.

⁸ Kaa nuą tamąą mąą kpoloon, yaan nu huwu takpɛliɠaa kaa pai ka mąą kpoloon ɉi. Nu ɲąmąi tii ka bu, ɛlɛɛ, nwąnąlɔ túwɔ́ tii ka mo a lɔiɠaa laa, taaɠaa laa, da di hu nuą mąą mɛ̨nį ɓa.

Veelɛnaa

⁹ kpalo ɓɛlaai kaa, kaai ka hvulu hɛn gɔw hon, kaa ɲiɓɛi laahvɛɛ la. Gaa ka kwəi, kaa kɛ kɛa a nu kpɛa kpɛa yili hu, mɛ̨nį nwąnąą ŋɛ̨i pai, da hva kɛa həli kaa.

¹⁰ Ka wɔ pɛlɛ́ɠaai nwumɛ̨ mɛ̨nį ka tii kaa tɔɔ dɔwɔ. Nu huwu tamąą ŋɛ̨i kaa bu, ka kpɔɔ ka tii kaa mɛ̨nį pɛlɛ mą.

¹¹ Mąąhɔlɔɓo, bɛlɛ́ lɔ̨nwɔ̨ɠaa, kaa wɔlɔi a ka laa, bɛlɛ́ kpɛ̨ąn nwuluɠaa diɛ di woo mu hon, diɛ kɛ mą: «Ka ku wɔ kwələ kulɔ!»

Ɉaaɓanąą

¹² Diɛi da taa tɔɔ ɲąmą hu, kpalo ɓɛlaai diɛ. Nuąi da pɛlɛ́ wulu hvilɛn a hvulu, kpalo ɓɛlaai diɛ.

¹³ Kɛlaa nwɔ̨n gɔ̨nɔ̨n mə nuą da gwɛli diɛ mɔ̨nɔ̨ mįi kpɛli kpɛli yili kəlee a həɠə Mɛ̨nį Kəlee ŋą Hééɓomun Yai-Laa pɔ.

¹⁴ A tɛ̨ą, Yai-Laa, nwɔ mąąwiɛ kɔ́lɔn ŋąą a lɔi mɛ̨i kəlee laahvɛɛ, yɛ pələi yaɠaa da gboloyá hu hvɛɛ la.

Nąąn nąą

¹⁵ Kpalo ɓɛlaai kaa! Kaai ka lɔɔ kpəɠiɛ tɔɔ ka ɓɛlaa la, yɛ pilimąą, yɛ di hon, diɛ di kpúwúlú lɛ.

¹⁶ Nwumɛ̨ ka tii, ka káá ka kpɔwɔ kwɛlii la, mąąwiɛ hvo li. Kaa kpɛli, ka nɔɔ tii ta kpələ, ka ka kpuwulu lɛ. Yai-Laa, kaa pai ka ɲee tɔɔi ka kwaną, Nwɔ liiholii yɛ ka kɛlɛ́ yɛ lɔɔ, ka wɔ mąąwiɛ mąą a pənə a ɓɛlɛkpɛɛmąą.

¹⁷ Mɛ̨nį ɲąą nwąnąąi tii laa Liban ɓa, ɲɔ̨nwɔ̨mąn gaa pai ka nwun mɛ̨i pui. Gɛɛ kala huwɔɠaa kəlee hu kala pələ kaa pai ka mąąkpɛlin ɉi. Ɲąmąi ka bu da nwąnąlɔ tuwɔi ka mo nɔi hu, daaɠaa hu da ɉu nukanŋąą diɛ, mąą mɛ̨nį ɓa.

¹⁸ Hali pɛliɛ nwun maa a lə? A yɛlɛ kɛ nuą yee pɔɔ ti. Yai a kwɛli həɠeeiŋąą, diɛ nuą nwunɉu lan la, nui bɛli yɛ gilitɔɔ mą, hva kpɛli kan hvaa ɲəi.

Nɔɔlinąą

¹⁹ Kpalo ɓɛlaai kaa! Kaa ɓə ka hee, kaa kɛ kwɛi kpuwɔ ɓa: «Ə́ ɲɛ̨ilaa ɓo!» Kaa kɛ kwɛni kpuwulu ɓa: «Ə́ muhəɠə!» Yaan, ɉɛnŋąą tii di hva pɛli mɛ̨nį ta lɛi kaa. Ə mą kpɛli kɛ, kaa hɛni ya, da wali ya hiɛ diɛ, di hvo a di hvulú!

²⁰ Kɛlaa, Yai-Laa kaa nwɔ pɛlɛ́ mąąhəɠɛɛ mu. Lɔi kəlee, ka ka mɛ̨i haa nííla.