Gɛlaɠaa 8 - Yálá laawoo hɛɓɛ (dc)1 Solə ə kɛ a nuąi hvaa nu paa mɛ̨nįi tii ɓa di tɔ̨nɔ̨. Mąą yələ tanɔ̨n ti, kɔ́ ɲąąnwąnąą ə pɛlɛ gbɔn ɉu nuąi kɛ Ɉerusalɛmə diɛ. Ə kulɔ gɛlaɠaa pulu, di kəlee di taɠa-taɠa Ɉude lɔi da Samari lɔi ɲɛɛkɔwɔɠaa hu. Solə ə gbɔn mɔ̨nɔ̨ɓo 2 Nuąi kɛi ɲɔw Yálá ɓa, di Etiɛnə powa həɠə di noo, di ɉaa wɔlɔ ɓo kpɔ kɛnɛ̨. 3 Solə nwɛi, ə ɲąąwala kpɔ, yɛ gbɔn ɉu taɠa. Ə kɛli lɔ bɛlɛ́ɠaa mu, yɛ laa na nuą hon, hinąą da nɛ̨ąą, yɛ di too gaho ŋą. 4 Nuą ti di di hu taɠa, di kɛi lia tɛɛ nɔi nąą kəlee, diɛ nwɛlɛɛ lɛlɛɛ laa həli. Yálá laawoo ə lɔ Samari lɔi hu 5 Filipə ə li Samari lɔi daa-lee ta hu, yɛ Kristə mąą mɛ̨nį laa həli nąą daai nuą diɛ. 6 Nu kpulu ə pa, gəlee di di wəli tɔɔ Filipə woo ɓa, diɛ kpalo mɛ̨nįɠaa kaa yai ə kɛli gɛ. 7 Ɲįnɛ̨nŋaa di kɛli həɠə nuą pulu, diɛ tomą kpɔ kɛnɛ̨. Kpɛlɛɠɛlɛn ɲɔ̨n gɛ nuą tamąą, da kɔ́wɔ nwąną ɲɔ̨n gɛ nuą tamąą diɛ həɠə diɛ tɔɔ. 8 Kwəinɛ̨ɛ̨ kɛnɛ̨ɛ̨ ə kɛ daai ti hu. 9 Yaan, nu ta ə gbɛa kɛ daai ti hu, diɛ kɛ mą: Simɔn, ə kɛ a pənəngɛmun; ɛlɛɛ, ə kɛli Samari lɔi hu nuą kwəi pili diɛ. Ə kɛli gbɔwɔ kɛ yɛ nu walawala. 10 Ə gɔwɔ tɔɔ nɛapɛlɛɛ diɛ, ə həli la nu kpɛa-kpɛa diɛ, nu kəlee di kɛli kɛ diɛ: «Nui ŋɛ̨i kaa a Yálá nwɔ huwalawalaa, yai da kɛ mą: Gɛnɛ̨mun.» 11 Di kanąnŋąąi ti kɛ mą, mąąhɔlɔɓo, aa kɛ lamun di kwəi pilii diɛ a nwɔ pənən gɛɛ. 12 Kɛlaa, laai kɛa di kɛli mo Filipə la, yai kɛi Yálá ŋą tɔɔlaa mąą wəlɛɛ lɛlɛɛ laa həli, da Jesus Kristə laa, di di mąąwaa, hinąą mąn nɛ̨ąą mąn, 13 Simɔn yaa kpɛlimąn ə laa na; di mąąwaa. Ɛlɛɛ, hvo kɛa həɠə Filipə pulu, gbalo mɛ̨nįɠaa da gwɛlɛɛn mɛ̨nįɠaai ə kɛli gaa, yili ə gwəi pili mą. 14 Gɛlaɠaai kɛ Ɉerusalɛmə, di bələ mɛ̨n diɛ kɛ: Samari lɔi hu nuą daa di yee hee Yálá lawoo mu, di nɛɛ mą di Piɛrə da Ɉaan di tɔɔ laa. 15 Yii kɛa yiliɠaai dəli Samari, di Yálá hvɛli laa na nuąi kɛ laa diɛ, ə gɛ, di Kili-Mąąhəɠɛɛ hɔlɔɓo. 16 Mąąhɔlɔɓo, Kili-Mąąhəɠɛɛ hvo ni kɛ too li di tɔ̨nɔ̨ kpɛli hu, daa di mąąwaa lɔ kɛ gu Nąmu Jesus laa hu. 17 Piɛrə da Ɉaan di di yee pɛlɛ Samari nuą mɛ̨i, di Kili-Mąąhəɠɛɛ hɔlɔɓo. 18 Ɓɛlɔwai Simɔn ə gaa la yɛ kɛ, gɛlaɠaa kaa di yee pɛlɛi laana nuą mɛ̨i, diɛ Kili-Mąąhəɠɛɛ hɔlɔɓo, ə wali həɠə ə dɛɛ Piɛrə da Ɉaan di pɔ, 19 yɛ diɛ: «Ɲą́ą́ gbɛlimąn, 'ká ɉuwalawalai ti ta tɛɛ bɔ́, ə gɛ, nui ŋą́ ɲéé pɛlɛ mɛ̨i, ə Kili-Mąąhəɠɛɛ hɔlɔɓo.» 20 Kɛlaa, Piɛrə ə nwoo ɲąąpənə yɛ mą: «Yɛ́, ká ə́ wɔ hɛn gɔw, ka nwun na ə pili. Gɛ mɛ̨nį, yáá ə́ kiliŋąhiɛ yɛ kɛ: Da Yálá nwɔ mɛ̨nįnɛ̨ɛ̨ yá a wali. 21 Mɛ̨nįi ŋɛ̨i kɛi ɓɛ, ə́ wɔɔ nąą hvo ɉu, ə́ wɔɔ hɔlɔɓoi hvo laa, mąąhɔlɔɓo, ə́ kwəi hvo kwələ li Yálá ɲɛ̨i ɓa. 22 Gili ɲɔ̨nwɔ̨ɔ̨ ti gaa yɛ́, 'həɠə bulu, ə́ nɛ̨ɛ̨mąą hvə gu Ną́mu ɓa, gaa pai kiɛ hvaa mą; ə ə́ mąąhvaalɛɛ. 23 Mąąhɔlɔɓo, ŋą́ą́ gaa, liikələn gwəi kaa yɛ́, ə́ ɓo kiliŋąhiɛ ɲɔ̨nwɔ̨ɔ̨ ŋą gaho ŋą.» 24 Ya ɓə, Simɔn ə di woo ɲąą pənə yɛ diɛ: «Kaa kpinįlee 'ká mą́ą́ nɛ̨ɛ̨mąą hvə gu Ną́mu ɓa, ə gɛ, mɛ̨nįɠaai ŋɛ̨i ka moi, da hvo həli mą́ą́.» 25 Piɛrə da Ɉaan di kpɛɛ a gɛla hvaa ɓoɔ da gu Ną́mu lawoo laa həliɛ, di di pulu pənə diɛ li Ɉerusalɛmə, diɛ nwɛlɛɛ lɛlɛɛ laa həli Samari lɔi hu taa tamąą hu nuą diɛ. Filipə da Etiopi mun 26 Gu Nąmu nwɔ malaka ə kɛ Filipə ɓa: «'Li ɉɛ̨ɠɛɛ pələ, bələi ti a həɠə Ɉerusalɛmə yɛ li Gaza, ə́ hvilɛn mą. Bələi ti mɛ̨i tɔɔi kɛ ton-ton.» 27 Filipə ə nɛɛɲąąɓa ə li, ya ɓə, ə kwiɛn a Etiopi mun da, ə kɛ a gbɛtɛgbuwulu, yɛ ɓo a nɔi mɛ̨nį ɲɛ̨i kulɔmun gɛnɛ̨, a Etiopi nɛ̨ɛ̨nu Kandasə ŋą hɛn gɔw mɛ̨ikaamun; aa kɛ li Yálá mąąwiɛ hiɛ ɓa Ɉerusalɛmə. 28 Gɛɛ kɛa bulu pənə yɛ li bɔɔli, ə kɛ heeni nwɔ wotoloi hu, yɛ Yálá kwəi mɛ̨nį hukulɔ mun Esai nwɔ hɛɓɛ́i ta ɓo. 29 Kili-Mąąhəɠɛɛ yɛ Filipə ɓa: «'Ə́ mąą lɛɠɛ nwotoloi ti ɓa.» 30 Filipə ə gilɛ həɠə ə mąą lɛɠɛ laa, ə Etiopi mun ti woo mɛ̨n yɛ Yálá kwəi mɛ̨nį hukulɔ mun Esai nwɔ hɛɓɛ́ nąą ta ɓo, ə mąąni kɛ yɛ mą: «Ɉɛɓɛ́i ŋɛ̨i ə́ kaa moi, ə́ kaa ɲąą kaai?» 31 Yili ə nwoo ɲąąpənə yɛ mą: «Ŋą́ ɲąą kaa pələ kɛ ləi, gíliɲą ponomun və ɲə́i?» Yili pulu, yɛ Filipə ɓa: «'Tɛ́ ə́ hee gwɛ́lɛ.» 32 Ɓɛi ti ə kɛi nąą ɓo, ɉɛɓɛ́ hu, nąą ka: «Ə kɛ yɛ ɓɛlaai di lii baai, naa pilaa kɛ yɛ ɓɛlaai di ka nɛɠa mɛ̨i teei, naa pilaa lɔ kɛ, hvaa hvo kulɔ na. 33 Nwɔ kpɔwɔ mąąyɛɛ laa hu, di hvo nwɔ tɛ̨ą mɛ̨nį ɓo li. Gbɛɛ ɓə pai ɉuwu mąą mɛ̨nį ɓoi? Hvo gaai, daa nwɔ yɛnɛ̨ɛ̨ kulɔ yɛnɛ̨ɛ̨ nuą lɔwai.» 34 Gbɛtɛgbuwului ti ə Filipə mąąni kɛ yɛ mą: «'Nɛ̨ɛ̨ yɛ́ Nán! Gbɛɛ ɓə tii, Yálá kwəi mɛ̨nį hukulɔ mun gaa mąą mɛ̨nį ɓoi? Gbɔwɔ kpinįi ɓə, a wala kɛ tii, nu takpɛli?» 35 Filipə ə gɔwɔ tɔɔ ɉɛɓɛ́i ti hu woo mɛ̨i, yɛ Jesus ŋą wɛlɛɛ woo lɛlɛɛ hukulɔ mą. 36 Di kɛɛ kɛa bələ pɔ, di həli kɛɛnąą ta, yálee yɛ ɓo laa, gbɛtɛgbuwului ti yɛ Filipə ɓa: «Yálee ka, lə mɛ̨nį ɓə a pɛli kpɛ̨ąn ɉii mą́ą́waa mɛ̨nį hu?» 37 Filipə yɛ mą: «Akɛ yáá Ɉésu mąą mɛ̨nį kaa a tɛ̨ą a ə́ kwəi kwɛlɛɛ, ŋą́ pɛli ŋą́ ə́ mąąwaa.» Gbɛtɛgbuwului ti ə nwoo ɲąąpənə yɛ mą: «Ŋą́ą́ gaa kpɔ a tɛ̨ą, gɛ́: Jesus Kristə kaa a Yálá lon.» 38 Ə mo di nwotolo tɔɔ, di nu hveelɛ di yɛɛ ɲái, Filipə ə gbɛtɛgbuwului mąąwaa. 39 Kulɔi di mo ɲái gu Ną́mu nwɔ Kilii ə Filipə həɠə ə li la, ɛlɛɛ, gbɛtɛgbuwului hvo kɛa ɲɛ̨i tɔɔ mą. Kɛlaa ə mą kɛ ti, gwɛi ə lɛɛ lɔ a nɛ̨ɛ̨ yɛ li. 40 Yii ɓaa Filipə nwɛi, ə gbɔwɔ kaa kɛa Azotɔsə. Ə kɛli kɛa nwɛlɛɛ lɛlɛɛ laa həli daa kpɛa-kpɛaɠaai ə kɛi tɛɛ ɉu, ə lɛɛ ɉu, ə li ə həli Sesare. |