Gɛlaɠaa 6 - Yálá laawoo hɛɓɛ (dc)

Nu mɛ̨ihveelɛ hee mɛ̨nį

¹ Naalɔwai, galan nɛa kpulu hu ə kɛi kɛnɛ̨, Ɉuifə yiiɠaai kɛi Grɛkə woo ɓo, di kɛi Hebreuɠaa laa ɓo, kɔ̨nɔ̨n mɛ̨nį hu, mąąhɔlɔɓo, di hvo kɛi di wɔ kalaninŋaai mąą mɛ̨nį ɲɛ̨i kulɔ a dənən gɔ̨nɔ̨n ɲąąkwɛlɛi lɔwai.

² Gɛla pow kɔ́w hveelɛi di galan nɛa kəlee ɲąąkpɔn, diɛ diɛ: «Ku mąą hvo nɛ̨ɛ̨li ku hvo Yálá lawoo laa həliɛ lɛɛ laa, kuɔ ku yee lɔ kɔ̨nɔ̨n ŋąąkwɛlɛ mɛ̨nį hu.

³ Yili ɓa, Nán nonnii, ka nu mɛ̨ihveelɛ həɠə ka lɔwai a nuąi Kili-Mąąhəɠɛɛ kaa di yəi, mɛ̨nį hukpɛ kili ə ɓo diɛ, ə gɛ, ku gɔ̨nɔ̨n ŋąąkwɛlɛ kolói ŋɛ̨i tɛɛ di pɔ.

⁴ Ku wɛi, ku kaa ku ɲɛ̨i lɛɛi Yálá hvɛliɛ da Yálá lawoo laa həliɛ ɓa.»

⁵ Nwóó ti ə nɛ̨ɛ̨ kpɔ galan nɛa kəlee wəlii. Di nɛɛmą di, Etiɛnə həɠə ɉu, yai Kili-Mąąhəɠɛɛ kaa ɲəi, da laa na laa, ɛlɛɛ, Filipə, Prokorə da Nikanɔrə, Timɔn, Parmenasə da Nikolasə yai a Antiɔsə mun yaai wɔlɔ lɔ Ɉuifəɠaa di wɔ kalan hu.

⁶ Di pa a nuą ti gɛlaɠaai pɔ, di di yee pɛlɛ di mɛ̨i, di Yálá hvɛli diɛ.

⁷ Yálá lawoo ə kɛi taɠa kɛɛnąą kəlee, kalan nɛa kpulu hu yɛ kɛnɛ̨ Ɉerusalɛmə, ɛlɛɛ, ɉaláá laa həli nuą tamąą diɛ di yee hee Jesus mąą mɛ̨nį mu.

Etiɛnə hon mɛ̨nį

⁸ Etiɛnə pilaai kɛ a Yálá ŋą mɛ̨inɛ̨ɛ̨, huwalawala ə ɓo yei, yɛ kpalo mɛ̨nį da kwəi pilimąą mɛ̨nį kpɛa-kpɛaɠaa kɛ nuą lɔwai.

⁹ Kɛlaa, di lɔwai, galan gbɔn ti da kɛ mą: luwɔ pɔlɔɠaa, da Sirɛnə nuą Alɛsandri nuą Silisi ɛlɛɛ, Asi nuą, hvaa ə too Etiɛnə ni lɔwai.

¹⁰ Kɛlaa, di yee hvo lɔ Etiɛnə ɓa, mąąhɔlɔɓo, Kili-Mąąhəɠɛɛ ə kɛ bɔ, yɛ mɛ̨nį ɓo la a kilikɛɲəi laa.

¹¹ Yili ɓə gɛ, di lɔ nuą hu di lɛɛ pɛlɛ a Etiɛnə laa, diɛ kɛ mą: «Ku nwoo mɛ̨n yɛ Moisə da Yálá di ɓɛlɛtoo wooɠaa ɓo.»

¹² Bələ ɓə di lɔ la nuą hu, da galanɉonŋąa ə mą kɛ tɔ́n galamɔ̨ɔ̨ɠaa. Di Etiɛnə hon də li la tɔ́n vili nąmįną lííla.

¹³ Di liɛ, di lɛɛ hvaa tamąą ɓo a Etiɛnə laa di kɛ mą: Nui ŋɛ̨i ka káá gaai, hvo ta kpəla li woo ɲɔ̨n moɔ ɓa a guɔ Yálá hee pɛlɛ́i laa da Moisə nwɔ tɔ́n laa.

¹⁴ Ku nwoo mɛ̨n yɛ kɛ diɛ Jesus Nazarɛtə mun ti kaa pai Yálá hee pɛlɛ́ pui, dɔ́nŋąai Moisə ə dɛɛ gu pɔ, ə gəlee mąąhvalin.

¹⁵ Nuąi kpɔ kɛ dɔ́n gələ mu, di kəlee di di ɲɛ̨i hee Etiɛnə ɓa, ɲɛ̨ilaai ə ɓo yɛ Yálá nwɔ malaka ta.