Gɛlaɠaa 5 - Yálá laawoo hɛɓɛ (dc)

Ananiasə da nɛ̨ą Safira

¹ Hulɔnu ta ə kɛ laa, diɛ kɛ naa ɓaa: Ananiasə Diɛ kɛ nɛ̨ą laa ɓaa: Safira. Ɉulɔnui ti da nɛ̨ą di pɛli ɉu, di di wɔ lɔi lɔwɔ́tɔɔ.

² Yili pulu, ɉulɔnui ti ə li a nwali bələ tɔ̨nɔ̨ gɛlaɠaa pɔ, ə naa di lííla; ə bələ tɔ̨nɔ̨ lɛɛ ɲee pulu. Da nɛ̨ą di hee mąą woo li kɛ.

³ Kɛlaa, Piɛrə ə mo ɉulɔnui ti ɓa, yɛ mą: «Ananiasə, lə ɓə kɛ yai ɓilihi aa lɔ kpɔ ti ə́ lii hu kɛnɛ̨, yɛ́ lɛɛ kɛ Kili-Mąąhəɠɛɛ ɓa? Yɛ́ nɔi hɔ̨nwɔ̨ ta lɛɛ ə́ yee pulu.

⁴ Gɛɛ hvo nɔi ti lɔwɔ́tɔɔ kɛi, ə kɛ a ə́ wɔ́ɔ́, nɔwɔtɔɔi nwɔ̨nɔ̨ ə́ mo, nwali ə kɛ a ə́ wɔ́ɔ́. Lə mɛ̨nį ɓa, ə́ giliŋąhiɛ yii ŋɛ̨i ɉuwu kɛ? Hvo kɛ lɛɛ kɛ li nuą diɛ, kɛlaa, Yálá ka ti ə́ lɛɛ kɛ mą.»

⁵ Nwooɠaa ti mɛ̨n Ananiasə ə mo, ə too, ə haa. Nuą kpɔ mɛ̨nįi ti mɛ̨n, ɲɔw kɛnɛ̨ ə too di hu.

⁶ Hilɛ lɛa di pa, di bowa mąą kpinįn gɛ, dəli di noo.

⁷ Lɛɛlɛ haaɓa tɛɛ pulu, Ananiasə nɛ̨ą ə pa, mɛ̨nįi ti tɛɛ laa, gili hvo kɛ ɉu.

⁸ Piɛrə ə nɛ̨ɛ̨nui ti mąąni kɛ, yɛ mą: «Ka wɔɔ lɔi lɔwɔ́tɔɔi ka mo, nwali kəlee ɓəi?» Nɛ̨ɛ̨nui ti yɛ mą: «Ee! Nwali kəlee li.»

⁹ Nąąlɔwai Piɛrə ə mo mą, yɛ mą: «Lə mɛ̨nį ɓa, ka nu hveelɛ ka pɛli mɛ̨nį tɔ̨nɔ̨ ɓa, ə gɛ, ka Kili-Mąąhəɠɛɛ hukɔɔn? Nɛ̨ɛ̨nu, 'ə́ wəli tɔɔ, nuąi li ə́ hilɛ looi, daa gbɛa həli ɓɛ, yɛ́ kpɛli, di kaa pai lii a yɛ́.»

¹⁰ Ɲąąɓa, nɛ̨ɛ̨nui ti ə too Piɛrə kɔ́wɔ mu, ə haa. Ɓɛlɔwai ɉilɛlɛai di paa la, di gaa aa haa; di ɉəɠə dəli la, di noo ɉilɛ kwɛlɛ.

¹¹ Ɲɔw kɛnɛ̨ ə too Yálá ŋą nu kpɔn kəlee lɔwai, da nuąi kpɔ mɛ̨nįi ti bələ mɛ̨n.

Gɛlaɠaa di kpalo mɛ̨nįɠaa kɛ

¹² Gɛlaɠaa di kɛi kpalo mɛ̨nį tamąą da kwəi pilimąą mɛ̨nįɠaa kɛ nɔi nuą lɔwai. Laa na nuą kəlee di kɛi di ɲąąkpɔn Salomɔn yəi ɲumąn mu.

¹³ Kɛlaa, nui lɔpee ta hvo lii hvo kɛli kpələ hvo too di pɔ, bələi mąn di kɛli di mąątɛ̨nɛ̨ la.

¹⁴ Ɛlɛɛ, hinąą mąn, nɛ̨ąą mąn di kɛli too di a di kpulu kɛnɛ̨ɛ̨, a laai di kɛli mo Ną́mu la.

¹⁵ Di kɛi pa a ɲɔ̨n gɛ nuą tamąą diɛ di laa bələ kwɛlɛ, ə gɛ, ɓɛlɔwai Piɛrə aa kɛi pa tɛɛi la, nįnįn ə hee kpɛli mąn di ta ɓa.

¹⁶ Nu kpulu kɛnɛ̨ɛ̨ ə kɛi həɠə Ɉerusalɛmə da gwɛlɛ taaɠaa hu, diɛ pa a ɲɔ̨n gɛ nuą, ə mą kɛ nuąi Ɲįnɛ̨nŋaa di kɛ di pulu; gəlee kɔ́lɔi yɛ pono, Ɲįnɛ̨nŋaa diɛ həɠə di pulu.

Di gɛlaɠaa hon di pənə ɓo diɛ

¹⁷ Ɉaláá laa həli mun gɛnɛ̨ da ɲee pɔ nuą; diɛ ɓaa: Sadusiɛ̨ɠaa, ɓɛlɔwai di yili kaa la ti, di líí ə holi kpɔ kɛnɛ̨ gɛlaɠaa pɔ.

¹⁸ Di gɛlaɠaai hon nu kəlee ɲɛ̨i ɓa, di di too gaho ŋą.

¹⁹ Kɛlaa, kwiihąą, Ną́mu nwɔ malaka ə gaho pɛlɛ́ laa ɓo, ə di kulɔ gaho pɛlɛ́ mu, yɛ diɛ:

²⁰ Ka li Yálá hee pɛlɛ́ mu, 'ká nu ɓalo woo ŋɛ̨i laa həli nɔi lonnii kəlee diɛ.

²¹ Di lɛɛ nwoo pulu. Yələ ɓɔi lɔwai, dəli Yálá hee pɛlɛ́ mu, diɛ nuą kalan. Ɉaláá laa həli mun gɛnɛ̨ ə pa, yaa da ɲee pɔ nuą, di tɔ́n vili nąmįną təli nwun dɔɔ hu, di gɛlaɠaa kulɔ gaho pɛlɛ́ mu di paa a diɛ Israɛlə nuą di wɔ ɲąąkpɔn gɛnɛ̨ɛ̨ hu.

²² Nuąi di di tɔɔ, lii di mo di həli gaho pɛlɛ́ la, di hvo di kaa gaho pɛlɛ́ mu. Di pənə di pa, di di woo hukulɔ.

²³ Diɛ mą: «Lii ku mo, ku bɛlɛ́ɠaa kəlee kaa naa kpulɔɔ kpɔ a nɛlɛɛ, gaho pɛlɛ́ mɛ̨ikaa nuą kaa di ɓo heeni bɛlɛ́ laaləi. Ku bɛlɛ́ laa ɓo, ku hvo nu ta kaa bɛlɛ́n.»

²⁴ Ɓɛlɔwai di nwoo hukulɔi ti kɛ la, Yálá hee pɛlɛ́ ɲąąwooɓo nuą da ɉaláá laa həli nuą kpɛa-kpɛa diɛ, di kwəi ə pili diɛ, yii kɛ di mo gɛlaɠaa mąą mɛ̨nį hu, di hvo kɛ gɔlɔn. Di kɛi di kee mąąni kɛ, diɛ kɛ mą: Di gɛ pələ kɛ ləi diɛ kulɔ?

²⁵ Kɛlaa, di lɛɛ lɔ moi ti, nu ta ə pa, yɛ diɛ: «Nuą ŋɛ̨i ka di too gaho ŋąi, di kaa Yálá hee pɛlɛ́ mu diɛ nuą kalan.»

²⁶ Nąąlɔwai, Yálá hee pɛlɛ́ ɲąąwooɓomun ə həɠə yɛ li da ɲee pɔ nuą, ə gɛ, di gɛlaɠaa hon di pa a diɛ. Kɛlaa, di ho di yagalanmo. Mąąhɔlɔɓo, di kɛi ɲɔw, ə gɛ, di hvo nəi pa di hɔɔ a kwɛni.

²⁷ Yii kɛa di pa a diɛ, di di tɔɔ dɔ́n vili nąmįną lííla, ɉaláá laa həli mun gɛnɛ̨ ə di mąąni kɛ,

²⁸ yɛ diɛ: «Kɛlɛi ku hiɛ tɔn dɔɔ káá, kuɔ ka hvo kalan gɛ naai ti hu-ee? Akɛti, lə ɓə yai káámun káá Ɉerusalɛmə laahvɛɛ a ka wɔ kalan nwooi, ɛlɛɛ, káá ka wɔ nui ti haa wulu lɛɛ ku nwuɔ̨.»

²⁹ Kɛlaa, Piɛrə da mɛlan di di woo ŋąapənə, diɛ mą: «Mąąnɛ̨ɛ̨ nu ə Yálá woo hon ə tɛɛ nu woo ɓa.

³⁰ Jesus ŋɛ̨i ka ɉon ka gbanwo kolɔwa ɓa, ə haa, ka nąnni pɔlɔɠaa di wɔɔ Yálá, ə gulɔ haaɓɛlaa lɔwai ə gɛ a vulú.

³¹ Ya ɓə Yálá ə gɛnɛ̨ ɉee mamįiyee hu, yɛ gɛ a tɔɔmun da nuą ɓalomun, yɛ Israɛlə hɔn mąąpənə mɛ̨nį, da ŋą nɛ̨ŋɛ̨nŋaa mąąhvaalɛɛ mɛ̨nį.

³² Ku kaa a mɛ̨nįɠaa ti kəlee mąą kɛla, kuɔ, kwa Kili-Mąąhəɠɛɛ ti Yálá ə dɛɛ nuąi lɛɛ woo mu, di pɔ.»

³³ Nwoo taaləi ti mɛ̨n di mo, ə di lííholi kpɔ kɛnɛ̨, di di kiliŋąhiɛ di paa mɛ̨nį ɓa.

³⁴ Kɛlaa, nu tɔ̨nɔ̨ ə muhəɠə nwun dɔɔ hu, ə kɛ a Farisiɛ̨, naa ɓa: Gamaliɛlə, ə kɛ a tɔ́n galamɔ̨ɔ̨ kɛnɛ̨, mɛlɛ ə ɓo nɔi lonnii kəlee kwəi, ə mo, di gɛlaɠaa kulɔ woloɓo ɲɛnɛ̨ɛ̨.

³⁵ Yili pulu, Gamaliɛlə yɛ diɛ: «Israɛlə lonnii, mɛ̨nįi ka káá naa nuą ŋɛ̨i diɛ, ká ɉukpɛ a nɛlɛɛ.

³⁶ Ɉu hvo ni kwɛa li, gu hulɔnu ta kaa diɛ kɛ mą: Teudasə. Ə kɛi gbɔwɔ kɛ mɛ̨nį kɔ́lɔn mun; nu nwun nąąn ɲɔ̨nwɔ mąn ə həɠə ə hvilɛn bɔ. Di yaa kpįnį baa, bɔ nuą di taɠa-taɠa, nąą ə tɔɔ tin.

³⁷ Yili pulu, nonoɓo kɛ lai, Galile mun da kɛ mą: Ɉudasə, yaa kpɛli ə pa, ə nu kpulu kɛnɛ̨ həɠə ə di pu bɔ. Kɛlaa, yaa kpɛli, di baa, bulu nuą di taɠa.

³⁸ Yii ɓa, gáá moi káá: Ká ká laa kulɔ nuą ŋɛ̨i mąą mɛ̨nį hu. Mąąhɔlɔɓo, akɛ ə həɠə nuą pɔ, daɠa hiɛ ka ti.

³⁹ Kɛlaa, akɛ ə həɠə Yálá pɔ, ka hva pɛli ɉu taɠai. Ka gɛ a nɛlɛɛ, ka hvo pa kɔ́ pɛlɛ Yálá ɓa.» Diɛn hvaa nwoo ɓa.

⁴⁰ Di gɛlaɠaa təli, di di kɛlɛ a galakpa, di tɔn dɔɔ diɛ, diɛ di hvo Jesus laa ɓo. Di ɓo diɛ.

⁴¹ Gɛlaɠaai di həɠə dɔ́n vili nąmįną lííla a di kwəinɛ̨ɛ̨, diɛ li, mąąhɔlɔɓo, Yálá aa hvaa mą daa kɛ a nuąi mąąnɛ̨ɛ̨ di di mɔ̨nɔ̨ɓo Jesus laa mąą mɛ̨nį ɓa.

⁴² Hvóló kəlee, di kɛi li Yálá hee pɛlɛ́ mu, da bɛlɛ́ɠaa laaləi diɛ nuą kalan a Jesus ŋɛ̨i gaa a Nwun mąąɓomun Yálá ə naakwɛlanmo nwɔ wəlɛɛ lɛlɛɛ.