Gɛlaɠaa 4 - Yálá laawoo hɛɓɛ (dc)

Dəli a Piɛrə da Ɉaan kiti haɠa ɓa

¹ Piɛrə da Ɉaan di lɛɛ lɔ pələ ɓoi nuą diɛ, nąąlɔwai, ɉaláá laa həli nuą, da Yálá hee pɛlɛ́ ɲąąwooɓomun, ə mą kɛ da Sadusiɛ̨ɠaa di pa di pɔ.

² Di liiholiɛ kɛ kɛnɛ̨, di kaai di mo diɛ nuą kalan, ɛlɛɛ, diɛ haaɓɛlaa nwun mɛ̨nį ɓo, yɛ hvilɛn na Jesus ɓa.

³ Di mo di di hon, di di too gahoŋą, diɛ yələɓɔɔ mąąkpɔn, mąąhɔlɔɓo, yələ aa kɛa kɛ wulu.

⁴ Nuąi galan nwoo mɛ̨n, di damąą di laa Jesus la, di lononŋąą a pɛli nu waa lɔɔli kulɔi.

⁵ Mąą yələ laa ɓoɔ, Ɉuifə nwun nąmįną da galanɉonŋąa, ə mą kɛ dɔ́n galamɔ̨ɔ̨ɠaa, di di ɲąąkpɔn Ɉerusalɛmə.

⁶ Nuą kpɔ kɛ laa diɛ ɓaa kɛ a: Ɉaláá laa həli mun gɛnɛ̨ Hanə, Kaifə, Ɉaan, Alɛsandrə, da ɉaláá laa həli mun gɛnɛ̨ yəi bɛlɛ́n nuą kəlee.

⁷ Di mo, di pa a Piɛrə da Ɉaan di lííla, di di mąąni kɛ diɛ diɛ: «Huwalawala ləi ɓə da gbɛɛ laa hu ɓə ka ɲɔ̨n gɛ mun ŋɛ̨i kɔ́lɔi pono la?»

⁸ Nąąlɔwai, Kili-Mąąhəɠɛɛ ə Piɛrə lii kpələ yɛ diɛ:

⁹ «Kaai ɓaa nɔi ɲɛ̨i tɔwɔ nuą, kaai ɓaa galanɉonŋąa, káá hee ku hu háákəi, mɛ̨inɛ̨ɛ̨ ku gɛ gɔwɔ haa mą, mąą mɛ̨nį ɓa, diɛ bələi ku tɛɛ la nui ŋɛ̨i yɛ ɓalo, hvo kɛli kwa mo;

¹⁰ mąąnɛ̨ɛ̨ ka kəlee ka gbaɠala kaa, ə mą kɛ, Israɛlə nuą kəlee, kaa kɛ: Jesus Kristə Nazarɛtə mun ti ka gbanwo kolɔwa ɓa, yai Yálá ə gulɔ haaɓɛlaa lɔwai ə gɛ a vulú, naa hu ɓə ɉulɔnui ŋɛ̨i kaa la tɔɔni ka lííla a gɔlɔi ponoɔ̨.

¹¹ Yaa ɓə a gwɛnii kaai a bɛlɛ́ tɔɔ nuą ka lənə mą, aa kɛ a bɛlɛ́ nwun ɉon gwɛni.

¹² Ɓalo mɛ̨nį lɔpee ta hva hɔlɔɓo pələ takpɛli, ə kulɔ yaa ti bulu, gbala ə tɔɔ, laa ta kpɛli hvo yələkɔlɔn mu, ə ɓo nuą yəi, yai mąąnɛ̨ɛ̨ di tɛɛ la diɛ pɛli ɓaloi ɉaalai.»

¹³ Di kɛi Piɛrə da Ɉaan di liikpələ pələ kaa; ɛlɛɛ, gbaɠala ə ɓo diɛ, diɛ kɛ, di hvo ta hɛɓɛ́ mąąkwɛli li, di hvo a mɛ̨nį kɔlɔn nuą. Yili ə di kwəi pili diɛ. Di kɛ di kɔlɔn nɔ a nuąi kɛ Jesus pɔ.

¹⁴ Nui kɛ gɔlɔi ə pono, ə kɛ tɔɔ ni di kwɛlɛ, di kɛi gaa, ɉutoo lɔpee hvo kɛ di la.

¹⁵ Nąąlɔwai di Piɛrə da Ɉaan di kulɔ ɲɛnɛ̨ɛ̨. Yili pulu, di di kee mąąni kɛ.

¹⁶ Diɛ di geeni diɛ: «Lə ɓə gwa pɛli gɛi a nuą ŋɛ̨i? Mąąhɔlɔɓo, daa kpalo mɛ̨nį ta kɛ, ponoɲą mɛ̨nį li, Ɉerusalɛmə daa kwəi nuą kəlee ɲɛ̨i ɓa; ɛlɛɛ, ku hva pɛli ɉɛatooi.

¹⁷ Kɛlaa, ə mą kɛ tii, əgɛ, bələ hvo pa taɠa-taɠai nuą lɔwai, gu tanŋąn dɔɔ diɛ, gu haŋą diɛ, ə gɛ, di hvo pa Jesus mąą mɛ̨nį ta ɓo.»

¹⁸ Yili pulu, di Piɛrə da Ɉaan di təli, tɔn dɔɔ diɛ a nwalawalaa diɛ mą: 'Ká hvo kɛa Jesus laa ɓo, 'ká hvo kɛa nuą mąąkwɛli naa hu.

¹⁹ Kɛlaa Piɛrə da Ɉaan di di woo hutoo diɛ diɛ: Nɛlɛ ɓə ɉaŋąą Yálá ɲɛ̨i ɓa? Ku lɛɛ ká woo mu, awala kɛ tii ku lɛɛ Yaa ti nwoo mu? Kaa kpinį ka mɛ̨nį ŋɛ̨i hutɔɔ.

²⁰ Kɛlaa, ku wɛi yii ku mɛ̨n, yii ku gaa, ku hvo pai lənəi yili ɓo mɛ̨nį ɓa.

²¹ Tɔ́n vili nąmįną di haŋą diɛ kpɔ nwɔ̨nɔ̨ a nįnɛ̨, yili pulu, di ɓo diɛ. Pələi kɛ di tɛɛ la di mɛ̨nį ɲąnwąnąą laa diɛ, di hvo yili bələ hɔlɔɓo. Mąąhɔlɔɓo, mɛ̨nį ti nuą kəlee di kɛi Yálá hɛɠɛɛɓo yili mąą mɛ̨nį ɓa.

²² Nui ti di malo a kpalo mɛ̨nį, gaa kwɛlan dɛɛi kɛ pow nąąn ɉu.

Laa na nuą di wɔ Yálá hvɛliɛ

²³ Yii kɛa di ɓo Piɛrə Ɉaan da diɛ, də li di ɓɛlaa pɔ, mɛ̨nįi kpɔ ɉalaa laa həli nuą nwun nąmįną, da galanɉonŋąa di mo, di gəlee hukulɔ di mɛlaa diɛ.

²⁴ Ɓɛlɔwai di mɛ̨nįi ti mɛ̨n na, di kəlee di bɛlɛ gee ɓa, di Yálá hvɛli diɛ mą: «Hɛn gəlee pɛli mun Yálá! Yɛ́ ɓə yələkɔlɔn da lɔi di pɛli, ə mą kɛ, gboloyá, da ɉu hɛnŋąa kəlee.

²⁵ Kili-Mąąhəɠɛɛ háálai, ə́ bu ə́ wɔ tímun Davidə, ku kalaɓɔlɔ la, yɛ mą: «‹Lə ŋą ɉuwu ɉuwu ɓə lɔiɠaa di hvo ɉui, nu kanŋaa diɛ hvaa lɔ di nwun ɉu nwɔ̨ɔ̨? Ya pa di yee hva lɔ.

²⁶ Yɛnɛ̨ɛ̨ tɔɔɓɛlaa daa di muhəɠə a kɔ́, lɔi ɲɛ̨itɔwɔ nuą diɛ nwun dɔɔ ɲɔ̨nwɔ̨ɔ̨ kɛ, a Yai-Laa da nui ə dɔɔwulɔ hiɛ mą, di laa.›

²⁷ «Mąąhɔlɔɓo, gaa a tɛ̨ą, Herodə da Pɔnsə Pilatə di di yee lɔ gee hu ɓɛ daai, da nwea, ə mą kɛ da Israɛlə nu huwu, ə gɛ, di kɔ́ pɛlɛ Yálá nwɔ tímun Jesus ɓa, yaai Yálá ə ɉəɠə ɉu ə gɛ a nuą Nwun mąąɓomun.

²⁸ Yii kpɔ wɔlɔ ə́ mąą kili tee ə́ kwəi, ya ka tii daa bɔ mɛ̨nį ə kɛ.

²⁹ Yiihu kɛa, Hɛn gəlee Nąmu, ə́ kili lɛɛ di wɔɔ nu mąąɲɔw wooɠaai hu, ɛlɛɛ, gɛ, ə́ wɔɔ nuąi di ə́ woo laa həli a liikpələ kɛnɛ̨ɛ̨.

³⁰ Ə yee haŋą, ə gɛ, kpalo mɛ̨nį da kwəi pilimąą mɛ̨nįɠaa di kɛ ə́ nwɔ tímun Jesus laa hu.»

³¹ Ɓɛlɔwai di kpɛɛ la a Yálá hvɛliɛ, ɓɛi ti di ɲąąkpɔn ŋąą kɛ laa, nąą ə kpɛlin, di kəlee di pilɛ a Kili-Mąąhəɠɛɛ hvaŋą, diɛ kɛa Yálá lawoo laa həli a liikpələ.

Laa na nuą di kɛi di yəi hɛnŋąa ɲąąkwɛlɛ di kee lɔwai

³² Laa na nuą kəlee yee lɔ kɛ gee hu, di yəi hɛnŋąa kəlee pɛlɛɛ gee ɓa, kiliŋąhiɛ tɔ̨nɔ̨ hu. Nu tɔ̨nɔ̨ kpɛli hvo kɛi kɛ diɛ: «Yii ɲə́i, ɲą́ą́ dɔ̨nɔ̨ nwɔ́ɔ́ li.»

³³ Kɛlaa, hɛn nɔpee kɛ di yəi, gəlee pɛlɛ kɛ gee ɓa. Gɛlaɠaai di kɛi Nąmu Jesus nwun mɛ̨nį həli a huwalawala; Yálá yɛ lúwɔ́ too di kəlee diɛ kpɔ a ɉu kɛnɛ̨.

³⁴ Nui lɔpee ta hvo kɛi hvɛɠɛ a yii mąąkpaan a kɛ mą. Yaan, nuąi kpɔ hihɛn ɲɛa ə kɛ di yei, da pɛlɛ́ɠaa, di kɛi nɔwɔtɔɔ, diɛ pa a ɉɔ̨nwɔ̨, diɛ bɛlɛ gee ɓa,

³⁵ diɛ dɛɛ gɛlaɠaa pɔ. Ɉɛn gɔwi ti ɓə di kɛi ɲąąkwɛlɛ nu kəlee ɓa, yɛ pələi di mąąkpaanŋąą kaa la.

³⁶ Ɉosɛfə ə gɛ lɔ ti, yai gɛlaɠaa di naa mɛ̨i hee a Barnabasə, mukulaa ɓaa: Liilaa lon. Ə kɛ a lévi ta, gaa lɔi ɓaa kɛ a Siprə tíi ə kɛ ɲəi,

³⁷ ə díi ti lɔwɔtɔɔ ə pa a nwali, ə dɛɛ gɛlaɠaa pɔ.