Gɛlaɠaa 28 - Yálá laawoo hɛɓɛ (dc)

Polə ə həli Maltə

¹ Ku nwun gulaa mɛ̨nįi tii hu, ku mɛ̨n diɛ Gahin ti laa ɓa: Maltə.

² Maltə nuą di ku hon gbɔ a nulaa yii naa hvo kɛ too li. Hvo gaai di nwɔ̨n gɛnɛ̨ hee, a ku kəlee ku mąą mɛ̨nį, mąąhɔlɔɓo, túlɔ aa kɛ pu, ɛlɛɛ, gwɛlɛ yɛ pa.

³ Polə ə li yɛ kwɛi pɛlɛɛ yɛɠɛ, yɛ pa, yɛ bu nwɔ̨n ma. Túmó ə kɛ gwɛi ti ta hu, nwɔ̨n nwəleen ə hee mą, ə yili Polə yee ɓa.

⁴ Yii kɛa nɔi ti hu nuą di gaaləi ti kaa hɛlɛn ni Polə yee ɓa, di mo di kee lɔwai diɛ kɛ mą: «Nui ŋɛ̨i, nu paamun ga. Mąąhɔlɔɓo, pələi mąn aa kulɔ la gboloyá yəi, Yálá nwɔ kitii hvo bɔ hvo kɛ yɛnɛ̨ɛ̨.»

⁵ Kɛlaa, Polə ə gaalə kulɔ ɲee ɓa, ə doo nwɔ̨n ɉu, mɛ̨nį ɲɔ̨n nɔpee ta hvo kɛ a Polə.

⁶ Ə kɛ nuą kwəi, Polə kaa pai hvɛɛi, ə too a powa. Di nąą mąąkpɔn a ɉu kwɛaa, yii kɛa di gaa diɛ mɛ̨nį ta hvo Polə ɓa, di di woo mąąhvalin, diɛ kɛ: «Yálá ta ka.»

⁷ Kɛɛnąą ta ə kɛ nąą kwɛlɛ, a nɔi ti nąmu nwɔ lɔi; nui ti laa ɓa kɛ a Publiusə. Ə ku nwɛ̨ąlaa kɛ kpɔ a gwəinɛ̨ɛ̨, ku hvoló haaɓa kɛ gɔwɔ mɛ̨i.

⁸ Publiusə nąn ə kɛ ɲɔ̨n ɉaɠa ɓa, ɓahiwəlaa ə kɛ mą, da himangban gwəi kulɔ. Polə ə lɛɠɛ mą, ə Yálá hvɛli mą, ə ɲee pɛlɛ mɛ̨i, gɔlɔi ə pono.

⁹ Nąą kaai nɔi ti hu ɲɔ̨n gɛ nuą di mo, diɛ kpɛli, di kɛli pa, ɛlɛɛ, yɛ di ɓalo.

¹⁰ Di ku mąąwiɛ a ɉuwu tamąą. Ɛlɛɛ, ɓɛlɔwai ku tɛ la gələn ɉu, hɛn kpɔ kɛ mąą kpaan ə kɛ ku yəi, di dɛɛ ku pɔ.

Polə ə həɠə Maltə ə li Romə

¹¹ Ɲąnįn ɉaaɓa kulaa ɉu ɓə ku ku muhəɠə la ku tɛ kələn ta ɉu; gələn tii aa kɛ hamą lɔɔ kɛ laa, Alɛsandri kələn da li kɛ. Gɔlɔn ɉɛn ɓa kɛ a: Dioskurəɠaa mąą nįnįn.

¹² Ku kulɔ gələn ɉu Sirakusə daai, ku hvóló haaɓa kɛ laa.

¹³ Ku həɠə laa, ku lɛɛ gahin goo ɓa, ku həli Rezio, mąą yələ laa ɓoɔ, vaŋą ə həɠə ɉɛɠɛɛ pələ, ə hee gələn ɉu, hvóló hveelɛ kulaa ɉu, ku həli Puzolɛsə.

¹⁴ Daai ti hu, ku ku nąn nonnii taɠaa kaa laa, diɛ kɛ ku lɔwɔ tɔ̨nɔ̨ kɛ di kɔwɔ mɛ̨i. Bələ ɓə ku həli la Romə.

¹⁵ Ku nąn nonnii kɛ daa ti hu, di ku pa mɛ̨nį bələ mɛ̨n, di pa ku laakwiɛn ɉii Apiusə nɔwɔ-kpalan ŋą, di pa kpɔ di həli nwɛ̨ą laa pɛlɛ́ haaɓai nąą; di kaai ə mo, Polə ə Yálá hɛɠɛɛɓo, yili ə nįilɔ.

Polə kɛɛ Romə

¹⁶ Ɓɛlɔwai ku həli la Romə, di hvaa mą, Polə ə kɛ gbɔwɔ pɛlɛ́ mu, holahi tɔ̨nɔ̨ yɛ ɲɛ̨i kaa.

¹⁷ Hvóló haaɓa kulaa ɉu, Ɉuifə kalanɉonŋaai kɛ laa, ə di təli. Ɓɛlɔwai di di ɲąąkpɔn na, ə mo diɛ, yɛ diɛ: «Ną́n nonnii, ɲą́ą́ ŋɛ̨i hvə́ hɔn da kɛ li yɛ hvilɛn na, gu wɔ tɔn ɓa, da gu yíi pələi gu ɉɔlɔɓo gu nąnni yəi, mą. Ɲą́ą́ ka, a gaho nąmu, ə həɠə kpɔ ɲələi di dɛ́ɛ́ la Romə holahiɠaa pɔ Ɉerusalɛmə.

¹⁸ Yiliɠaai di mą́ą́ mɛ̨nį hukpɛ, di kɛ bɔ di ɓo mą́ą́; Mąąhɔlɔɓo, di hvo hɔn da kaa li mą́ą́ gɛ́ pɛli ɉu haa ɓoi.

¹⁹ Kɛlaa Ɉuifəɠaa di wɔ kili mąą ɓə gbáán, gɛ́ kɛ: di nwɔ́ kitii tee mɛ̨nį lɛɛ nɔi nwun nąmu ɲee kɔnma. Kɛlaa, və́ kɛ bɔ və́ gu wɔ lɔi too mɛ̨nįi.

²⁰ Mɛ̨nįi gɛ, ŋį́ ɉuhvɛli, gɛ́ kɛ ŋį́ ɲɛ̨́i tɔɔ káá, ɛlɛɛ, ŋį́ ɉukulɔ kaa, yaa li. Kɛlaa, a tɛ̨ą leelee, mɛ̨nįi Israɛlə kilitɔɔi mą, mąą mɛ̨nį ɓə ɲɔwɔn ŋɛ̨i kaa la ɲéé ɓa.»

²¹ Diɛ mą: «Ku wɛi, ku hvo hɛɓɛ́i lɔpee ta hɔlɔɓo li, yɛ həɠə Ɉude, ə́ mąą mɛ̨nį ɓa; ɛlɛɛ nwɔ̨nɔ̨, gu nąn nonnii ta lɔpee hvo ə́ mąą mɛ̨nį ta ɓo li kuɔ, di hvo nwɔ̨nɔ̨ ə́ mąą mɛ̨nį ɲɔ̨nwɔ̨ɔ̨ ta hukulɔ li kuɔ.

²² Kɛlaa, yii ə́ kwəi, ku kaa bɔ ku mɛ̨n ə́ la. Mąąhɔlɔɓo, ə́ wɔɔ kpɔn tii nwɛi, da mąą hɛatoo kɛɛnąą lɔpee gəlee ɓa.»

²³ Da diɛni di kuu hee, ɲələ həliɛ, di pa ɲəi bɛlɛ́n a di kpulu kɛnɛ̨. Gɛɛ nwoo hukulɔi, ə Yálá ŋą tɔɔlaai mąą kɛla hvaa ɓo, yɛ gɛ pələ kwɛli mą, ə gɛ, di yee hee Jesus mąą mɛ̨nį mu. Ə gɔwɔ tɔɔ Moisə nwɔ tɔ́n ɉɛɓɛ́i ɓa, da Yálá kwəi mɛ̨nį hukulɔ nuą di wɛiɠaa; di tuwɔ ɉu, ə həɠə yələwala pɔ ɓa, ə həli la yələwulii pɔ ɓa.

²⁴ Daɠaa di hvaa nwoo ɓa, daɠaa di hvo gaa a tɛ̨ą.

²⁵ Di kɛɛ pai taɠai, di woo hvo ni kɛ laa li mą, ya ɓə Polə ə nwoo kpuɔi ŋɛ̨i ɓo diɛ, yɛ diɛ: «Tɛ̨ą ə kɛ Kili-Mąąhəɠɛɛ pɔ, ɓɛlɔwai ə kɛli mo la ka nąnni diɛ, gwəi mɛ̨nį hukulɔ mun Esai laaləi,

²⁶ yɛ kɛ: «‹'Li nuą tii pɔ, yɛ́ diɛ: 'Ká mąn kpɔ ká wəli tɔɔ, ká hva gbaɠala kaa; Ká mąn kpɔ ká ɲɛ̨i kpɛ̨ɛ̨, ká hva kɛɛ mąąkpɛɛ.

²⁷ Mąąhɔlɔɓo, nu huwui ŋɛ̨i kili mąą pɛlɛɛ ɓə. Daa di wəli laa kpulu, Daa di ɲɛ̨i laa kpulu, Ə gɛ, di ɲɛ̨i hvo nəi pa kɛɛ kaa, Di wəli hvo nəi pa mɛ̨nį mɛ̨n, Di kili hvo nəi pa mɛ̨nį kpaɠala kaa, Diɛ di hɔn mąą pənə la, diɛ pa Yálá pɔ, ɛlɛɛ, və́ pa nəi di ɓalo.›

²⁸ «Ká kili ə pu kani ɉu káá, huwu takpɛliɠaa ɓə Yálá nwɔ ɓalo mɛ̨nįi tii aa tɛɛ di pɔ, diɛn di kaa pai di wəli tɔɔi mą.»

²⁹ Ɓɛlɔwai Polə ə nwooɠaa ti ɓo la, Ɉuifəɠaa ti di kɛli li, diɛ hɛatoo di kee lɔwai a di nwąnąi.

³⁰ Polə ə kwɛlan veelɛ ɲąąkpalaa kɛ laa bɛlɛi ti mu, yɛ ɉala. Nuąi kɛi pa bɔ, ə kɛli ɲee hee gəlee mu;

³¹ Yɛ Yálá-taa tɔɔlaa mąą mɛ̨nį laa həli, yɛ gu Ną́mu Jesus Kristə mąą mɛ̨nį laa həli, a kilitɔɔmąą laa kɛnɛ̨, a ɲee həɠɛɛ giimɛ̨i.