Gɛlaɠaa 27 - Yálá laawoo hɛɓɛ (dc)

Də li a Polə Romə

¹ Ɓɛlɔwai di mo la diɛ ku tɛ gələn ɉu kwəli Itali lɔi hu, di Polə da gaho nąmįną takpɛliɠaa tɛɛ holahi nwun dɔ̨nɔ̨ nwun nąmu pɔ, diɛ kɛ mą Ɉuliusə, a gɔ́laɠai di kɛli kɛ mą, Augusta, ɉu yalanąmu ta.

² Ku tɛ Adramitiumə kələn da ɉu, yɛ li Asi lɔi gbonwo ɓa pələ, ku bələ hon gɛa. Masedoanə mun da ə kɛ ku pɔ, naa ɓaa: Aristarkə, bɔ taai ɓaa Tesalonikə.

³ Mąą yələ laa ɓoɔ, ku tɔɔ wolo ɓo Sidɔn. Ɉuliusə ə kɛli Polə hon a ɲɛ̨imąąwɛli kaa pələ, ə Polə lɛɛ laa, ə li nwɛlikɛmąą nuą pɔ, ə gɛ, ə mąąkpaan gbɛɛ hɛnŋąa hɔlɔɓo di yəi.

⁴ Ku həɠɛɛ laa, ku laa a Siprə lɔi goo. Mąąhɔlɔɓo, vaŋą ə kɛli hee gələn ɉu ku yəi.

⁵ Ku Silisi gboloyá da Pamfili nwɛi teen, hvoló pow gɔw lɔɔli kulaa ɉu, ku həli Mirə daai Lisi lɔi hu.

⁶ Ku həliɛ laa ɉolahi nwun dɔ̨nɔ̨ nąmu ə Alɛsandri kələn da kaa laa yɛ li Itali pələ, ə ku tɛ ɉu.

⁷ Hvoló tamąą yee mu, ku hvo kɛli hiɛ a wala, ɛlɛɛ, ku həli mɛ̨nį Knidə tənən ma ə walawala, vaŋą hee pələ ku hu, ku hvo hvilɛn nɔi ɓa; ku tɛɛ Krɛtə gahin goo ɓa ɉɛɠɛɛ pələ, Salmonɛ tənən ma,

⁸ ku tíliin nąą ɓa, ku həli kɛɛnąą ta ɓa, diɛ kɛ mą: Kələn dɔɔi lɛlɛɛ Lasaia daa lee kwɛlɛ.

⁹ Yíi kuu tamąą aa kɛ tɛɛ, ɛlɛɛ, hiɛ kulɔ laa walawalaai kɛa kɛ gboloyá ɲą. Mąąhɔlɔɓo, hin nɔ yələ aa kɛa kɛ tɛɛ. Polə ə nuą kili pu tii ɉu, yɛ diɛ:

¹⁰ «Náwəini, gələn ɉu hiɛ kulɔ mɛ̨nį kɛa, gaa pai kɛi a yee lɛɛ ɉu, ɛlɛɛ, a hɛn damąą kala mɛ̨nį; diɲɛ̨ɠaa da gələn nɔ vəi, kɛlaa ə mą kɛ, kuɔ kpinįlee.»

¹¹ Ɉolahi nwun dɔ̨nɔ̨ nąmui tii, laai kɛ gələn nwun nąmu da gələn nąmįną la, ə tɛɛ Polə woo ɓa.

¹² Gələn dɔɔi hvo kɛ lɛlɛ li, kuɔ pɛli lɛɛi laa hamąlɔɔ yee mu, nu mɔlɔɓɛlaa di kɛ bɔ ku həɠə laa, ɛlɛɛ, pɛlimąą a kɛ ɉu, ku həli Fenisə Krɛtə lɔi hu kələn dɔɔi ta li kɛ, ɲɛ̨i tínɛ̨nŋąą voló tooi pələ, kuɔ pɛli hamąlɔɔ kɛi laa.

Tulɔ-hvąŋą

¹³ Hvaŋą hviikpɛɛ ta wolo ə muhəɠə, di gaa, diɛ, da pɛli di wɔ kilii tii pɔ mɛ̨nį kɛi, ya ɓə di gələn voloon, diɛ hiɛ Krɛtə lɔi koo ɓa

¹⁴ Kɛlaa, ɉu hvo kpɛli kwɛa, tulɔ-hvaŋą kɛnɛ̨ ta ə həɠə nɔi ɓa pələ, diɛ kɛ naa ɓa: Eurakilon, ə kpɛ̨ɛ̨ di hu;

¹⁵ Ə gələn nwɛan, yɛ li la ɲą hąąi pələ, gələn hva pɛli kɛ tɔɔi vąŋą tɔwɔ, ku ku kpɔɔ lɛɛ lɔ kɛa ɲee kɔnma.

¹⁶ Ku tɛɛ tín da ɓa, diɛ kɛ mą: Koda. Nąą ɓə ku pɛli gələn non voloon ɉii laa a mɔ̨nɔ̨ kɛnɛ̨.

¹⁷ Ku dɛ gələn gɛnɛ̨ hu, kuɔ kɛa ku nwun mąąkɔ̨nɔ̨ a pələ huwu lɔpee gəlee, ku gələn gɛnɛ̨ hu yili a gɔtɔyɛli, ɛlɛɛ, ku kwɛnį kpuwulu ta hɛlɛn gələn ma, hvo pa nəi li hvo kɛlɛ muugbɛ-kwɛnį ta ɓa, ku ku kpɔwɔ lɛɛ vąŋą yee kɔnma.

¹⁸ Vaŋą ə lɛɛ kpɔ dɛɛi a nwalawala, ə lɛɛ la ɉu, mąą yələ laa ə bɔ, hvo kɛli ku diɲɛ̨ɠaa pili ɲái.

¹⁹ Volo ɉaaɓa yələ, kələn ɉiɛ nuą di gələn ɉu hɛnŋaa kəlee pili ɲái.

²⁰ Yíi kuu tamąą ə tɛɛ, hvóló mąn, pɛmɛ̨lɛ̨n-gɔw mąn, ku hvo da kaa; ɛlɛɛ, dulɔ-hvaŋą ə kɛ lɔ ni a gɛnɛ̨. Ku kili hvo kɛa kɛ tɔɔ li hɛn nɔpee ta ɓa, ku ɓalo mɛ̨nį hu.

²¹ Ɉu aa kwɛa kɛa kɛ, ku hvo ni kɛ hɛn lɔpee ta mįi li. Nąąlɔwai Polə ə həɠə ə tɔɔ yɛ diɛ: «Mɔ́lɔ́ni! Kali kɛ ka wəli tɔɔ nwóó ɓa, Krɛtə lɔi hui, gu hvo li həɠə laa. Mɛ̨nį ŋɛ̨i hvəli həli guɔ, kɛɛ tamąą hvəli kala gu yəi.

²² Kɛlaa yiihu, ə kɛ a pələi lɔpee, gáá moi káá, ka ká liikpələ, ká ta nwun və pai lɛɛi ɉu, gələn yaa tanɔ̨n nɔ ɓə pai kalai.

²³ Háá, a kwii hɛ̨ą, Yálái gáá ɲee kɔnma, gɛ́ tíi mą, nwɔ malaka ta ə gbɔwɔ lɛ mą́ą́,

²⁴ yɛ mą́ą́: ‹Polə! 'Hvó ɲɔw, mąąnɛ̨ɛ̨ ə́ həli nɔi nwun nąmu nwɔ kiti haŋai ɓa, ɛlɛɛ, nuąi kpɔ ka diɛni ka káá gələn ɉu, Yálá aa di wɔ yɛnɛ̨ɛ̨ lɛɛ di yəi ə́ háálai.›

²⁵ Yili ɓa, mɛ́laani, ka ká liikpələ kani, mąąhɔlɔɓo, gílitɔɔi Ɲálái ti ɓa. Bələi ə mo la, pələ ɓə gaa kɛi la.

²⁶ Vąŋą kaa pai gu pilii tín da ɓa.»

²⁷ Gbini pow-kɔw-nąąn nąą li kɛ, ɛlɛɛ, vaŋą ə kɛli lɔ ni ku takpa-takpa ɓo Adriatikə gboloyá ŋą; kwii hɛ̨ą ɓɛla ɓoi lɔwai, gələn ɉiɛ nuą di gaa diɛ ku kaa lɛɠɛi kahin da ɓa.

²⁸ Di kwɛli kpuwulu ta kpúlon yɛli ɓa di doo ɲái, diɛ ɉukwɛa pələ kɔɔn na, ə kɛ a yeehaŋąnna pow-hveelɛ, di di mąą ta wolo tɛ, di bili, di ɉɔlɔɓo pow kɔw lɔɔli.

²⁹ Di kɛi ɲɔw diɛ gələn və pa kɛlɛ kwɛni ta hu. Yili ɓə gɛ, di gələn dɔɔ kwɛli nąąn yɛɛ ɲái gələn bulu pələ, di ɲɛ̨i ə ɓo yələɓɔɔ tɔwɔ a nwalawalaa.

³⁰ Kɛlaa, gələn ɉiɛ nuą di kɛi di pu pələ kwɛli, di gələn non yɛɛ gboloyá hu, diɛ nuą ɓowo, diɛ kɛ diɛ, ku kaa lii gələn dɔɔ kwɛli kpuwuluɠaa tooi gələn dɔwɔ pələ ɲái.

³¹ Polə yɛ ɉolahi nwun dɔ̨nɔ̨ nąmu da nwɔ holahiɠaa diɛ: «Gələn ɉiɛ nuąi ŋɛ̨i da wala lɛɛ gələn ɉu, ká nwun hva kulɔ ɉu.»

³² Ɉolahiɠaa di nɛɛmą di gɔtɔyɛli tee gələn non ma, di doo ɲái, di nɛɛ laa ə li.

³³ Di kɛɛ yələɓoɔ mąąkpɔn ɉii, Polə ə mo, nu kəlee ə kɔ̨nɔ̨n da wolo mįi; yɛ kɛ diɛ: «Háá ɓaa volo pow-kɔw-nąąn, káá pulu həɠə a liihɛlɛn, ká hvo hɛn da mįi.

³⁴ Gáá ká mąąnɛ̨ɛ̨i, gɛ́ ká gu kɔ̨nɔ̨n mįi, mąąhɔlɔɓo, yili ɓə a ka nɔ̨ɔ̨ lɛɛ ka hu. Ka ta nwun nɛɠa tɔ̨nɔ̨ kpɛli hvo pai lan ɉii ɉu.»

³⁵ Moi Polə ə mo tii, ə lɛɠɛ həɠə, ə Yálá hɛɠɛɛɓo nu kəlee ɲɛ̨i ɓa, ə ɉu yali, yɛ kɛa mįi.

³⁶ Nu kəlee hvaŋą ə lɔ, diɛ kpɛlimąn di kɔ̨nɔ̨n mįi.

³⁷ Kuɔi kɛ gələn ɉu, ku lonoɔ ə kɛ a nu nwun-veelɛ-yee-mɛ̨ihveelɛ-kɔw-mɛ̨ida.

³⁸ Yii kɛa di kɔ̨nɔ̨n mįi, di pilɛ, mɔ̨nun mɔlɔɠaai kɛ gələn ɉu, di bili gboloyá hu, gələn, da wolo lɛɛ mɛ̨nį ɓa hoa-hoa.

³⁹ Yələ ɓɔɔ kɛa, gələn ɉiɛ nuą, di hvo nɔi tii kɔlɔn, gbonwo ɲą ta lɔ ɓə di kɛli gaa, nɔɔ nɔi hu pələ, di kɛli kɛ, a kɛ a pɛlimąą mɛ̨nį, di li laa a gələn, di nɛɛ laa.

⁴⁰ Di gələn dɔɔ yɛliɠaa hvólóon, di bu ɲái, di gələn dənən dɔɔ hɛn nwɔ yɛli hvólóon. Di ɉəɠə ɓɛla hu hvólóon gələn ɲɛ̨i tɔwɔ pələ, ə gɛ, vaŋą ə dənən dɔɔ ɲá kwɛlɛ.

⁴¹ Kɛlaa, gələn ɉɔnwɔ̨ ə lɔ ɲɛa-koonɛ̨ą hu, ə kanąn naa, ɲá yɛ kɛlɛ bulu pələ hu, ə gulɔ gee la.

⁴² Ɉolahiɠaa di kɛ bɔ di gaho nąmįną paa, ə gɛ, di hvo pa too ɲą ŋą, di hvo pu di yəi,

⁴³ kɛlaa, ɉolahi nwun dɔ̨nɔ̨ nąmu nwɛi, ə kɛ bɔ ə Polə nwun gulɔ ɉu, ya ɓə gɛ, hvo hvaa di woo ti ɓa. Ə mo yiiɠaai kɛ di wəlɛɛ yá kɛlɛi, di too ɲąi, di li tɔlɔɔ gbonwo ɓa.

⁴⁴ Nuą yiiɠaai ti, di tɔɔ a di nwąnąi, di ɲá teen di həli gbonwo ɓa wulu ɓɛlaɠaa mɛ̨i, awala kɛ tii, gələn ɉu hɛn da mɛ̨i. Bələ ɓə di kəlee di həli la nɔi ɓa a di hvulúmąą.