Gɛlaɠaa 26 - Yálá laawoo hɛɓɛ (dc)Polə ə nwoo hukulɔ tɔɔmun Agripa lííla 1 Agripa yɛ Polə ɓa: «Mąąlaa kaa ə́ yəi, yɛ pɛli ə́ nwun mąąkɔ̨nwɔ̨i.» Polə ə ɲee haŋą, yɛ kɛa nwoo hukulɔ, yɛ kɛ: 2 «Mɛ̨nį tamąąɠaai kpɔ Ɉuifəɠaa daa ɉee nwúɔ, Tɔɔmun Agripa, gwə́inɛ̨ɛ̨i háákələi, gɛ́ pɛli də́lənmoi mɛ̨nįɠaa ti hu, ə́ lii la. 3 Hvo gaai Ɉuifəɠaa yíi pələ, da mɛ̨nįɠaai da kɛ ɉɛa tooi, gəlee kpaɠala kaa yɛ́. Nɛ̨ɛ̨ yɛ́, 'ə́ wəli tɔɔ kani nwóó ɓa, a liinɛ̨ɛ̨ gwəilaa. 4 «Ə həɠə ɉúlɔnon ɲələ ɓa, bələi ŋą́ nwɔ́ yɛnɛ̨ɛ̨ kɛ la nwɔ́ nuą lɔwai Ɉerusalɛmə, gbaɠala kaa Ɉuifəɠaa kəlee diɛ. 5 Di gɔ́lɔn gbɔ a ɉu kwɛa, ɛlɛɛ, da kɛ bɔ, da pɛli di mą́ą́ mɛ̨nį kɛla hvaaɓo, diɛ ŋą́ nwɔ́ yɛnɛ̨ɛ̨ kɛ a nuąi da ku wɔɔ kalan mɛ̨nįi mąą yɛlɛkɛ, nu kəlee ɓa, di wɔɔ pələi mɛ̨i, Farisiɛ̨ laa hu. 6 Háákələi ŋɛ̨i kɛa, da kɛli pa a ɲą́ą́ kiti haɠa ɓa, mąąhɔlɔɓo, gílitɔɔ ɓə mɛ̨nįi Yálá ə naakwɛlanmo ku nąnni diɛ mą; 7 a mɛ̨nįi tii ku huwu heei pow kɔ́w hveelɛi kilitɔɔi ɉəli mɛ̨nį ɓa, di yee ə ɓo mą a hvaŋąlɔ, a yələ kəlee, diɛ kwɛli hvilɛn na Yálá ɓa; gílitɔɔi mɔ̨ɔ̨ mɛ̨nįi ti ɓa, tɔɔmun, ya ɓə gɛi, Ɉuifəɠaa diɛ gálamąɓo la. 8 Kaai ɓaa Ɉuifəɠaa, lə mɛ̨nį ɓa yai, haanuą nwun mɛ̨nį Yálá yəi, hva pɛli kɛi a tɛ̨ą, ká taɠaa gwəi? 9 «Ɲą́ą́ nwɛ́i, ə kɛ kpɔ gwə́i, gɛ́ kɛ, mąąnɛ̨ɛ̨ kɛ, ŋį́ kɔ́ pɛlɛ Jesus Nazarɛtə mun laa ɓa, a pələ huwu lɔpee gəlee. 10 Ɛlɛɛ, bələ ɓə, ŋą́ kɛli túwɔ́ la Ɉerusalɛmə. Ŋą́ą́ gbínįlee gɛ́ mąąhəɠə nuą tamąą too gaho ɲą. Ɉaláá laa həli nuą kpɛa-kpɛaa daa kɛ yili mąą laa tɛɛ bɔ́, ɛlɛɛ, da kɛi di paa kɛ, váái kɛ mą. 11 Ŋį́ kɛli lia tɛɛ Yálá hvɛli pɛlɛ́ɠaa kəlee mu, gɛ́ di laa nɔ̨nwɔ̨ ɓo a pələi lɔpee, gɛ́ hee di hu, gɛ́ kɛ, di Yálá ɓɛlɛtoo woo ɓo; gbɔ́lu pələ di la, ŋą́ kɛli kpɔ hvilɛn di pulu nwɛ̨ą taaɠaa hu.» Bələi Polə ə laa la Kristə la ( Gɛlaɠaa 9.1-19 ; 22.6-16 ) 12 «Yili ŋą laa hu ɓə ŋą́ lɛɛ ɉu, a yələ ta, ŋį́ kɛi li Damasə, ɉalaa laa həli nuą kpɛa-kpɛaa daa kɛ dɔ́ɔ́ ti laa, daa yili mąą laa tɛɛ bɔ́ mɛ̨nįi ti hu. 13 Tɔɔmun! Gɛ́ɛ́ bələ pɔ, a hvoló haŋąnŋąą; ŋį́ kɛɛ pono ta kaa a həɠə yələi pələ, gwələ pələ yee tɛɛ hvóló nwɛi ɓa; nən ə mą́ą́ ə mą́ą́ pono, ə mą kɛ, kwa nuąi kɛ bələ pɔ. 14 Ku kəlee ku too nɔi ɓa, ɛlɛɛ, ŋį́ woo ta mɛ̨n hebre-woo hu, yɛ kɛ mą́ą́: ‹Solə, Solə! Lə ɓə kɛ yai, ə́ kaa mɔ̨nɔ̨ɓoi? Gbalai ŋą́ą́ gbɔn yɛ́, ə́ kulɔ laa walaai ɓə ŋą.› 15 Ŋą́ mąąni kɛ gɛ́ mą: ‹Ną́mu! Gbɛɛ ɓaa a Yɛ́?› Gu Nąmu yɛ mą: ‹Jesus ɓaa a Ɲą́ą́, ɲą́ą́ ka tii ə́ kaa mɔ̨nɔ̨ɓoi. 16 Kɛlaa, 'ə́ muhəɠə, 'ə́ haŋąn ə́ tɔɔ, Mɛ̨nįi ŋį́ gbɔ́ɔ́ lɛ la yɛ́, ya ka: Ŋą́ ə́ həɠə ɉu, yɛ́ kɛ a nwɔ́ tímun, da gwɛlɛɛn gɛɛ ŋɛ̨i ə́ gáá ɉu, mąą kɛla, da gwɛlɛɛn gɛɛ yiiɠaai kpɔ nwɔ̨nɔ̨, gáá pai gbɔ́wɔ́ lɛ ɉu yɛ́. 17 Gáá pai ə́ kulɔi Ɉuifəɠaa yəi, da ɉuwu takpɛliɠaai ti gáá ə́ tɔɔi di pɔ, di yəi. 18 Yɛ́ di ɲɛ̨i hvoloon, yɛ́ di kulɔ kpinį hu, yɛ́ pa a diɛ kɛɛ pono hu, yɛ́ di kulɔ ɓilihi nwɔ huwalawala yəi, yɛ́ pa a diɛ Yálá pɔ, akɛ tii, da mą́ą́ mɛ̨nį kaa a tɛ̨ą, di nwɔ nɛ̨ŋɛ̨nŋaa mąąhvaa ə lɛɛ; ɛlɛɛ, diɛ di wɔɔ hɔlɔɓo mąąhəɠə nuą kwɛlin ɉu.›» Polə ə gɛ kólo hukulɔ 19 «Tɔɔmun Agripa! Yili ɓə gɛ, gwɛlɛɛn gɛɛ ti ŋį́ gaa yɛ həɠə yələi pələ, və́ nwún gulɔ mu. 20 Kɛlaa yaamun, ŋį́ gbɛa tɔlɔɔ Damasə nuą diɛ, yili pulu, Ɉerusalɛmə daai, da Ɉude lɔi hu nuą, ə mą kɛ, lɔi takpɛliɠaa hu nuą. Gɛ́ kɛ diɛ: 'Hvo kɛli da di hɔn mąą pənə, di di ɲɛ̨i tínɛ̨n Yálá pɔ pələ, da di kili mąą hvalin, diɛ túwɔ́ a nąą mąą hon bələ. 21 Yili mąą mɛ̨nį ɓə gɛ, Ɉuifəɠaa di ɉón ɓɛlɔwai ŋį́ kɛ la Yálá hee pɛlɛ́ mu, diɛ kɛ di nwɛ́i kpɛɛmą. 22 Kɛlaa, Yálá tɔɔi mɔ̨ɔ̨ búlú a nwalawalaa, ə mą kɛ, háákələi hvólói yee mu, yili ɓə gɛi, ɲéé kaa lɔ ni gɛla hvaa ti ɓoɔ ɓa, lɛapɛlɛɛ, da nu kpɛa-kpɛaa ɲɛ̨i ɓa. Mɛ̨nįɠaai kɛ mąąnɛ̨ɛ̨ di kɛ, Yálá kwəi mɛ̨nį hukulɔ nuą, da Moisə, di di lɛɛ tɔwɔ di di ɓo; ɛlɛɛ, və́ mɛ̨nį ta ɓoi yɛ laŋįn di woo mɛ̨i. 23 Di mo diɛ: Nwun mąąɓomun Yálá ə naakwɛlanmo, gaa pai mɔ̨nɔ̨ mįi, ə haa, ə nwun, ə kɛ a nu tɔlɔɔ yɛ kulɔ haaɓɛlaa lɔwai, ya ɓə pai kɛɛ pono laa həlii nɔi lonnii da huwu takpɛliɠaa diɛ.» Polə ə kɛ bɔ tɔɔmun Agripa ə laa Kristə la 24 Polə ə lɛɛ lɔ nwoo hukulɔi, Fɛstusə ə bələ hon na, ə tomą kpɔ a nwoo kɛnɛ̨, yɛ mą: «Polə, ɓowo ɓə yáá mo? Nakwəli kɛnɛ̨i ŋɛ̨i ə́ gɛi, yɛ ə ə́ ɓowo?» 25 Polə ə nwoo ɲąąpənə, yɛ mą: «Ŋą́ mɛ̨nį nąmu Fɛstusə! Və́ ɓowo li, nwooɠaa ŋɛ̨i gáá moi, gaa a tɛ̨ą, ɓowo woo hvəli. 26 Dɔɔmun ŋɛ̨i gáá nwóó hukulɔi mą, giliŋą ponɔɔi mɛ̨nįɠaa ti kəlee hu, ɛlɛɛ gíli kaa ɉu gɛ́ da hvo loo li mą. Mąąhɔlɔɓo da hvo kɛ kpinįn ɉu, da hvo nwɔ̨nɔ̨ kɛ kpowəi. 27 Tɔɔmun Agripa, mɛ̨nįi ŋɛ̨i Yálá kwəi mɛ̨nį hukulɔ nuą di mo, ə́ laai na? Gílí kaa ɉu, gɛ́ diɛ, ə́ laai na.» 28 Agripa yɛ Polə ɓa: «Nąą wolo aa lɛɛ kpɔlɔ tikpə, yɛ ə́ gɛ́ a Kristalon.» 29 Polə ə nwoo ɲąąpənə yɛ mą: «Ə kɛ a yiihu-o, ə kɛ a ɉu kwɛa-o, yii gáá Yálá hvɛli la, ya ɓaa: yɛ́, ə mą kɛ a nuąi di kaa di wəli tɔɔi mą́ą́ háákələi, ka kɛ yɛ ɲą́ą́, ka hvo kɛ a gaho nąmįną.» 30 Gɛɛ tii, tɔɔmun da gbahalanąmą, Berenisə da nu kpului ti kɛ laa, di kəlee di di muhəɠə. 31 Di kɛɛ kulɔi, di kɛli kɛ di kee ɓa: «Ɉulɔnui ŋɛ̨i, hɔn da hvo mą, yii a ɉu haa ɓo, a wala kɛ ti, diɛ doo la gaho ŋą.» 32 Agripa ə mo Fɛstusə ɓa, yɛ mą: «Ɉulɔnui ŋɛ̨i, akɛ hvo nwɔ mɛ̨nįi lɛɛ li nɔi nwun nąmu yee kɔ̨nma, yɛ gwə li ɓo mą.» |